إلا برجوعك ..بقلم الشاعر هيثم كمال ..

( الا برجوعك )

وآخر يوم اشوف الشمس كان يومها
ومن يومها وانا مستنى تطلع شمس
وشمسي مش هتطلع الا برجوعك
ونهر النيل
برغم المطرة والفيضان
صبح عطشان
وما يرويه سوى طلّة
عليه من جوّه العين
عينيكِ انتِ
وانتِ بعيد
هناك ع البحر
برمش العين
تشيلي الملح م الميّة
تخلّيها عسل ابيض
يداوى لوعة المشتاق
وانا مشتاق
وشوقى خللى نهر النيل
يسيب مجراه
وييجي لحد رجليكي
يفيض بالشوق على ايديكى
يخليكى
تسيبي البحر وتعودى
ويرجع نهر نيل عمرى
الى مجراه
وترجع ميّته الحلوه
تزرّع ارضى وتخضّر
وتطلع شمسي وتنوّر
وشمسى عمرهاش تطلع
ف عمرى
الا برجوعك