=========
فيه برنامج حيتعمل للرقص الشرقي على قناة القاهرة والناس ..عنوان البرومو الخاص به " ثقافة الرقص الشرقي بين الفن والعيب" .. بيجيبوا في البرومو ده شخصيات من مجالات مختلفة كالصحافة والإعلام والفنانين ووو .. تُدِّعم البرنامج وتبرر القيام به .. من أغرب ما سمعت من الكلمات المؤيدة لهذا البرنامج.. ما قالته إحدى الصحفيات .. " إن الرقص الشرقي مهم لأن كل أم مصرية بتعلم بنتها الرقص عشان لما تتجوز تبقى ترقص لجوزها " .. بجد أنا مذهولة من هذه الكلمات .. ومن أن مثل هذه الكلمات تصدر من صحفية بالذات .. لقد تعاملت أنا مع معظم فئات الشعب المصري في الفلاحين والبندر.. البندر يعني " أهل المدينة " ..ملقتش أم قالت الكلام ده لبنتها .. وبعدين المصرية دي بالذات طفحانة الدم .. رقص إيه اللي حترقصه المصرية لجوزها .. صحيح اللي اختشوا ماتوا .. هي يا دوب فترة الخطوبة فيها شوية فرح كده على قد ما قُسم ..دا إذا مكنش فيه صداع بسبب أعباء الجهاز والذي منه .. وبعد الفرح والدُخلة إسبوع ولا اتنين .. ويبدأوا فعلاً الاتنين يرقصوا لبعض .. بس بيرقصوا لبعض على سلالم البيت وهم بيتخانقوا ..والناس بتتفرج على خناقاتهم مع بعض وردحهم لبعض بسبب ضيق المعيشة وضيق ذات اليد .. بجد عيب قوي يتقال كلام زي ده .. ولا العند السياسي سيسيطر علينا ويؤدي بنا إلى مثل هذه الضحالة في الآراء والبرامج .. إلى درجة تشوية صورة المرأة المصرية .. المرأة المصرية التي هي أكثر إمرأة عربية غير مُرفهة و مكافحة وشقيانة وتعبانة وشايفة المر .. وبتشارك زوجها في تحمل مسؤولية جميع أعباء الحياة بلا استثناء ..
-----------------------
د.شهيرة عبد الهادي
30 / 8 / 2014 مـ
