هو ده رمضان في مصر ولما تشوف ده يبقى إنت في مصر ..بقلم د.شهيرة عبد الهادي

هو ده رمضان في مصر .. أجمل رمضان في العالم تلاقيه في مصر .. قيمها وثوابتها وعاداتها وحضارتها .. فانوس رمضان والمسحراتي ومدفع رمضان الأثري لا يُمكن تلاقيهم إلا في مصر .. كل عام وانت طيبة يا مصر ..
================
أجمل رمضان تلاقيه في مصر .. في مصر رمضان بيبدأ قبل ميعاده بثلاثة شهور .. أروح بلدنا الفلاحين ألاقيهم بييربوا فراخ وبط ووز .. أسألهم ليه كده هو لسه فيه حد بيربي دلوقتي في البيوت يا ناس ..يقولولي دي عوايدنا يا حيلي .. هو احنا نعرف ناكل الفراخ البيضة دي اللي انتوا بتاكلوها .. دا لا ليها طعم ولا شوية شوربة يرومو العضم  .. ورمضان هو عاوز إيه يعني غير شوية شوربة حلوين كده على الفطار .. متقوليش كده يا عينيا عشان نجيبلك الموسم ونيجي نعيد عليكي ..ولما تشوف ده وتسمع ده يبقى إنت في مصر .. فوانيس وزينة بتتعلق في كل البلكونات وعلى كل البيوت و أولاد الشارع   يخبطوا على البيوت ويجمعوا فلوس  عشان يعلقوا الزينة في كل الشوارع قبل رمضان بإسبوع .. لما تشوف ده  يبقى إنت في مصر .. ياميش رمضان بيتباع في كل حارة وشارع قبل رمضان بشهر مش بس بإسبوع ..لما تشوف ده يبقى إنت في مصر .. والعرقسوس كمان والسوبيا والتمر هندي بيتحضروا في كل دكان ومحل ومع السريحة .. لما تشوف ده يبقى إنت في مصر.. والمخللات والطرشي دا بتنجان بخل وده بتنجان محشي بشطة .. لما تشوف ده يبقى إنت في مصر .. ولا مية الطرشي اللي بتتباع في أكياس مقلكش عليها واااو .. لما تشوف ده يبقى إنت في مصر.. ولمبات زينة بتتعلق على كل المساجد أو الجوامع زي ما بيقولوا المصريين تنور المساجد والشوارع .. لما تشوف ده يبقى إنت في مصر ..وكل واحد قبل رمضان ما يُدخل علينا يقول للناس سامحوني لو أخطأت في حقكوا عاوز أصوم وأنا مرتاح .. لما تشوف ده يبقى إنت في مصر ..وجارك المسيحي يقلّك كل سنة وإنت طيب وتعالى إفطر عندنا أول يوم في رمضان .. لما تشوف ده يبقى إنت في مصر .. قرآن كريم في كل بيت طول النهار وفبل المغرب علطول ومدفع رمضان الأثري يضّرب ويقولك الفطار قرّب وبعده الآذان علطول .. لماا تشوف ده  يبقى إنت في مصر .. وصلاة المغرب بعد الفطار فوراً في بيتك في جماعة أو في المسجد.. لما تشوف ده  يبقى إنت في مصر .. ومسلسل جميل بعد الفطار تتجمع العيله حواليه ونسمعه مع بعض .. لما تشوف ده يبقى إنت في مصر ..لمة العيلة في الفطار عند تيتة أول يوم رمضان .. لما تشوع ده يبقى إنت في مصر .. وكل واحد وهو داخل شايل حاجة في إيدوا : ده جايب فراخ وده جايب لحمة وده جايب رز وده جايب طبيخ وده على قدحالوا يادوب قدر يجيب العيش والبيبسي والسلطة وده جايب صينية كنافة وشوية قطايف وده جايب جلاش حلو بفول سوداني أو بمكسرات وده مجبش حاجة خالص .. لما تشوف ده يبقى إنت في مصر .. وصلاة العشاء والتراويح تجمع العيلة وعيلة العيلة وكل ناس الشارع .. لما تشوف ده يبقى إنت في مصر .. ومن العشاء للسحور زحمة ولخمة ودوشة في الشوارع ودا رايح وده جاي وده بيشتري فول للسحور وده بيشتري زبادي وجبنة.. لما تشوف ده  يبقى إنت في مصر .. والشوارع تفضل كده لغاية ما يجي المسحراتي الجميل بطبلتة ونغمتة الأجمل ونطلع نبص عليه من الشبابيك والبلكونات ونكّلمه وندّيله من اللي ربنا قسم بيه لينا.. لما تشوف ده  يبقى إنت في مصر .. و يجي وقت السحور نصّحي اللي نايم عشان يتسحر واللي صاحي أهو صاحي ونتسحر ونشرب شاي مع بعض ونستني الفجر يدّن و لما يدّن نقوم نصليه في المسجد وده كله بيحصل عشان إنت في مصر .. ومن عشرين رمضان كل ست بيت مصرية أصيلة عسولة تقوم بعمايل الكحك والبسكوت والغريبة والبيتيفور.. لما تشوف ده  يبقى إنت في مصر .. وقبل العيد بيوم تلاقي كل جارة جابتلك طبق كحك من اللي عملتوا عشان تدوقوا ويتسابقوا وكل واحدة تقلك عمايلي ولا عمايل جارتي ؟ قولي بقى أحسنلك ؟ .. لما تشوف ده يبقى إنت في مصر .. وأول يوم العيد فرض علينا وواجب علينا و كمان هي عادتنا وحضارتنا نعّيد في بلدنا على كل أهلنا الكبار الرموز المقامات .. لما تشوف ده يبقى إنت في مصر .. وكل واحد يوزع العيدية على أطفال العيلة .. لما تشوغ ده يبقى إنت في مصر .. ومريم أم ست سنين والا سبعة مش فاكرة سنها بالظبط تقول فين عديتي إنت نسياني والا إيه يا عمتو ؟ أديها الفلوس وأقولها خدي ياختي عمتك كانت بتاخد ربع جنيه عدية يا  ست مريومة .. تستغرب مريومة قوي وتتريق وتقولي ليه يا عمتوا هو حضرتك من عصر إيه ياعمتوا ؟ أقول لها من عصر حتشبسوت يا مريومة .. تقولي يعني إيه عصر حتشبسوت يا عمتوا ؟ ..ومن هنا بقى تبدأ الحكاية مع مريومة .. يا رب ما تقطع للمصريين الطيبيين عادة .. هي دي مصر الحضارة .. مصر يعني حب يعني لمة يعني ود يعني مودة يعني رحمة يعني ألفة .. يعني مسيحي بيعيد على مسلم ومسلم بيعيد على مسيحي .. يعني لازم نعيد على أهالينا رموزنا كبراتنا .. هي دي فيمنا مبادئنا ثوابتنا في مصر .. هي دي عاداتنا وحضارتنا في مصر .. فانوس رمضان والمسحراتي ومدفع رمضان الأثري لا يُمكن تلاقيهم إلا في مصر .. الله يخليكي يا مصر وتجمعينا دائما في محبتك .. كل عام وإنت طيبة يا مصر ..
-------------
د.شهيرة عبد الهادي
الأسكندرية
19 /7 /2012

‎.‎

ري ّعمْري منْ أكاذيب المُنى .. بقلم الشاعر عبداللطيف_محمد_جرجنازي

ري ّعمْري منْ أكاذيب ِالمُنى
إنّـني ياربّ ذا الـعـبدُ الفقيرْ
كمْ أماني كاذباتٍ فــي الدُّنا
قدْ ظنـنّـاها كذيّـاك النَّـمـيـرْ

ولَـهَـثْـنـا خلْفها فـي عَزْمَـةٍ
كسرابٍ أصبحتْ عـنـدَ الهجيرْ
ولَـهَـونـا فــي ملذّات الهوى
وعَـبَـثْـنـا بـمـقـامٍ ومَســـيرْ
كلُّ يـَوْمٍ ينْقضي مِـنْ عُمْـرِنا
يجعلُ الخطْوَ قريباً مــِنْ قبورْ
#عبداللطيف_محمد_جرجنازي

عبد اللطيف التلباني - بتقولولي إنساه - صوت عالي الجودة

إنه القدر حين يراقص الحلم والأمل .. بقلم د.شهيرة عبد الهادي

ويبدوا ..
أن الإجابة التي نتتمناها ستظل دائماً غائبة ..
وعلينا استشرافها أو استنتاجها ..
إنه القدر حين يراقص الحلم والأمل ..
----------------------------------
د.شهيرة عبد الهادي
Drshahera Abd Elhady Ibrahem

اللي بيشتغلوا في مجلس الدولة هم اللي بيسرقوا الدولة .. بقلم د.شهيرة عبد الهادي

يعني ناس بيشتغلوا في مجلس الدولة هم اللي بيسرقوا الدولة ؟ ..يا رب يعينك يا ريس على اجتثاث رؤوس الفساد اللي مالي كل سنتيمتر في البلد ..عشان تصدقوني لما قلت لحضراتكم أن كل اللي بيمسك حاجة في البلد دي في أي مكان فيها مش عشان إصلاحها . لأ.. دا عشان يلهط وينهب على قد ما يقدر ..ويجيب ولاده في مكان عمله بردوو ويورثهم كل اللهط ده والنهب ده ..و تشوفه بقى وهو كان عمال يتكلم عن المثل العليا وينتقد في اللي قبله ويجمع عنه معلومات في مرحلة تشوقه للمنصب و للكرسي .. تقول دا حيصلح ويعدل المايلة .. وأول ما يمسك المنصب ويقعد على نفس الكرسي .. يكون زي اللي قبله وماشي على نفس دربه وفي ظله بل و بيكون ألعن منه في الفساد .. الله يعينك يا ريس ..

لأجمل ناس.باشوفها بعينيا الاتنين .. بقلم د.شهيرة عبد الهادي

لأجمل ناس باشوفها بعينيا الاتنين ..

مساء الورد  والفل والياسمين ..

مساء قلوب طهرها المطر ..

وأضحت وأمست  قدوة لكل البشر ..
يتعلم منها الورد والزهر والشجر..
--------------------------------
د.شهيرة عبد الهادي
  

ومن الشخابيط والتخاريف أحياناً ما فيه كل جمال ..فلنستمر ما دامت الحياة .. بقلم د.شهيرة عبد الهادي

ومن الشخابيط والتخاريف أحياناً ما فيه كل جمال ..فلنستمر ما دامت الحياة ..
-------------------------------
د.شهيرة عبد الهادي Drshahera Abd Elhady Ibrahem