والقانون ميعرفش زينب .. قصدي ميعرفش شهيرة ههههه ... بقلم د.شهيرة عبد الهادي

نزلت النهارده اشتري " فاكهة" .. لقيت واحد بيبيع فارش جمب محل شيك غالي .. صِعٍب عليّ الواحد ده .. لأن شكله فقير .. قلت أنَّفْعه .. زي ما اتعلمنا في ديننا من القرآن والسنة .. رحت عنده .. قلتله طلباتي .. وقلتله " هات حاجة كويسة وخد اللي انت عايزه " .. طول ما هو بيجيب الفاكهة  .. عمَّال يقولي : يآ حاجة "سيبيها على الله".. يا حاجة " محدش وآخد معاه حاجة " .. يا حآجة " هو الكفن له جيوب " .. يآحاجة " المهم الواحد يراعي دينه بيقول إيه " .. خدت منه الحاجة واديتوا فلوسه اللي طلبها .. رحت البيت .. بافرغ الحاجة من أكياسها .. عشان أحطها في التلاجة .. لقيت " الكاكا مفعصة ومدهوسة كلها في الكيس" .. ولقيت " البرتقال ضارب " .. ولقيت " الموز كله سايح على بعضه ".. مع أن  " وش القفص في كل نوع كان رائع " .. أقسم أن هذا ماحدث بالظبط .. للأسف  ..يبدوا .. أن هذه .. هي حال .. فئة كبيرة من شعب مصر..  أو لنقل .. إن هذه هي حال مصر .. وعلى فكرة ..هو راجل المفروض إنه راجل كبير في السن فقير عادي .. ولا بينتمي لأي حزب ولا أيديولوجية ولا فكر ولا مؤسسة بالدولة ومعرفش ديانته .. والله أعلم .. بس هو .. مصري .. لكن  اتربى و تبللورت شخصيته في عهدي السادات ومبارك .. آه نسيت أأقول حاجة .. بعد كده وبعد فوات الأوان .. افتكرت إنه كان طول ما هو بيحط الحاجة في الأكياس .. كان مديلي جمبه .. ما هو مفيش فايدة فيا .. حادني علطول كده طيبة وبينضحك عليا ..والقانون ميعرفش زينب .. قصدي ميعرفش شهيرة ههههه ..
--------------------------------------
د.شهيرة عبد الهادي

( مفيش دليل) ...... بقلم د.شهيرة عبد الهادي

 (مفيش دليل) مقالة كتبتها أيام محاكمة مبارك الأولى أعيد نشرها
-------------------------------------------------------------
بتقولوا مفيش دليل ..طيب .. هو مفيش دليل على تفشي الفقر والجهل والمرض  اللي قتل المواطن المصري الغلبان من  زمان ولحد دلوقتي  ؟ .. طيب .. هو مفيش دليل على  الظلم والقهر  اللي بيعاني منه المواطن المصري ؟.. طيب .. هو مفيش دليل على  ضياع حق  المواطن المصري بصفة عامة  وحق الشهيد  الطاهر النبيل العفيف  في بيئة أصابها  الاضطراب  في كل نواحي الحياة والازدواجية والكيل بمكيالين  نتيجة  أنظمة فاسدة سابقاً ..لأ فيه دليل ومليون دليل ..
التعليم المنُهار في ابتدائي في إعدادي في ثانوي في الجامعة دا مش دليل .. التلميذ اللي بيخرج من المدرسة لا بيعرف يقرأ ولا يكتب دا مش دليل .. واللي بيتخرج من الجامعة يعاني في القراءة الكتابة ودي مهزلة في ذاتها دا مش دليل .. والا مستوى الماجستير والدكتوراة المنهار دلوقتي دا مش دليل .. والصحة المعلولة للشعب كله دا مش دليل .. أمراض كثيرة وعشان تعالجها تلاقي اليد مغلولة ودا مش دليل .. دا حتى الأمراض اللي قلنا خلصنا منها رجعت تاني زي الغول يتهش في جسد الشعب ودا مش دليل .. ..واذا راح مستشفى حكومي يتعالج لا يلاقي فيها علاج ولا حتى مستشفى وده مش دليل ..ويطلبوا منه يشتري العلاج لنفسه داخل المستشفى الحكومي دا مش دليل ..يروح يشتري العلاج لنفسه يلاقي الدواء مغشوش وده مش دليل .. واللي بيبيعهوله نفسه هو بوش مغشوش ودا مش دليل ..لا صيدلاني ولا حتى حلاق صحة ودا مش دليل .. أهي شغلانة يكسب من وراها سبوبة.. لا بيدور على شعب ولاحتى على صحة ودا مش دليل .. والغني يتعالج أما الفقير يموت دا مش دليل ..والعلاج بدرجات للشعب : ده للغني وده للفقير دا مش دليل ..والشباب اللي قاعد في البيوت مش لاقي شغلانة من عشرات السنين دا مش دليل .. واذا خرج يدور على شغلانة يلاقي الذمم خربانة دا مش دليل .. والمصانع اتقفّلت والعمالة اتسرّحت دا مش دليل .. والشباب والبنات اللي مش لاقية تتجوز دا مش دليل .. واللي ممعهوش فلوس يجيب شقة دا مش دليل ..واللي مش لاقي رغيف يغمسه بدقة دا مش دليل .. والمية الملوثة دا مش دليل .. دا الميه بقت ملونة وليها ريحة وليها طعم وده بردو مش دليل .. وفي كل عمل تلاقي ذمم ملوثة وأساليب ملتوية ودا مش دليل .. الرشوة والمحسوبية والحلول اللولبية دا بردو مش دليل .. والخضار والفاكهة المسقية بمية المجاري ده مش دليل .. ناكلوا يجي التسمم والإسهال الجاري ودا مش دليل ....راح الصفا من السما وكساها السواد ودا مش دليل .. إسّود لون مية البحر وده بردو مش دليل .. وبكت مية النيل وطلع بكاها على الشاطئ وده مش دليل .. شوارع تترصف بالليل وتتحفر تاني الصبح وده مش دليل .. طوابير على العيش وعلى البوتجاز وعلى السولار وعلى الجاز وده مش دليل .. شعب مش لاقي حتة لحمة ولا فرخة وده مش دليل .. وكانوا بيقولوا له كل مكرونة بدل الرز دا الرز ملهوش لازمة ودا مش دليل ..وبلاها خيار دا بقي بسبعة ودا مش دليل ..شعب عايش في عشش صفيح وفي القبور ومش عارف في الشتاء يدّفى ودا مش دليل .. و عشوائيات وأطفال عايشة ليل نهار تحت الكباري بتتجوز وتخلف تحت الكباري ودا مش دليل ..بلد انهار فيها العلم والبحث العلمي والتعليم والصحة ودا مش دليل .. وتزوير انتخابات الرئاسة ومجلس الشعب  والمحليات .. وتزوير الإرادة الساسية .. وإهمال الصعيد وسيناء والمدن الحدودية  .. وانتشار الرشوة والوساطة والمحسوبية.. والسماح لرجال الأعمال بنهب ثروات البلد .. ومجتمع الـ 5 % الأغنياء وباقي الشعب فقراء  والقضاء على الطبقة المتوسطة ..  والفساد الأخلاقي .. والفساد المؤسسي..  والصمت عن النهب الممنهج لثروات مصر .. والفساد في التعيينات في جميع  الجهات  بالبلد  سيادية وغير سيادية  ..وعن حالة الطوارئ .. وتكوين أقليات مميزة والتواطؤ مع الإخوان والتركيز على البيزنس ..وووو..  وده بردوو  مش  دليل .. وعشان كل ده ..قام ربنا بعتلنا شباب شاف الناس عايشة ازاي في بلاد بتحترم آدمية شعبها  .. صعبت عليه بلده .. بلده الغرقانة في الفقر والجهل والمرض .. قال لازم نطهر البلد من كل ده ..قام في يوم أبيض نادي يوم من أيامك الحلوة يا بلادي ..يوم 25 من شهر يناير كان تلات نادي من سنة ألفين وفوقهم حداشر سنة في بلادي .. شباب مُخلص النية لله والوطن لا عاوز منصب ولا كرسي لكن عاوز يطهر بلده من كل ده.. قام وثار وقعد في الميادين تمنتاشر يوم يواصل الليل بالنهار ..ملى ميدان التحرير والقائد ابراهيم وكل ما في مصر من ميادين ودا مش دليل ..يهتف " الشعب يريد إسقاط النظام " ..يغني ويرقص فرحان ببلده مصر الجديدة اللي بيصنعها ومش عاوز يشوف فيها لا فقر ولا جهل ولا مرض ولا أي حاجة من ده ودا بردو مش دليل .. لقى عربيات الأمن قدامه وقَف قدامها بشجاعة وقال مش مهم ولو حتى مُت بعد ساعة ودا مش دليل ..لقى الغازات قُدامه على الكباري وفي الشوارع .. دموعه سالت نفسه اتكتم ودا بردو مش دليل .. طِلعتلوا القنّاصة فوق البيوت والعمارات ..انضرب بالرصاص استشهد و دمه الزكي الطاهر روى كل الشوارع والحفر اللي فيها ودا بردو مش دليل .. وشباب اتصفت عينيهم الاتنين ودا بردو مش دليل .. وغيرهم .. ده فقد رجله وده فقد إيده وده ملى الخرطوش جسمه ودا بردو مش دليل .. استحمل وصبر لغاية ما خلع المخلوع وده بردو مش دليل .. وبعد كده جم وقالوا : الرصاص اللي انضربوا بيه مش رصاص م الشرطة .. طيب .. هو رصاص مين وتبقى كده جبتلنا الدليل .. عاوزين إيه تاني أقوله عشان تقولوا إن فيه دليل .. لأ يا ناس .. فيه دليل .. فيه دليل .. فيه دليل ومليون دليل .. أنا 85 مليون دليل .. أنا 85 مليون دليل على الفقر والجهل والمرض والظلم .. بس إنتوا يا مسؤليين اللي مش عاوزين لا تعرفوا ولا تجيبوا الدليل ..يا سعادة الريس  : يا ترى هتجيب لنا الدليل ؟ وتحل لنا كل المشاكل اللي في مصر وده يبقى أكبر دليل على أن في مصر قامت ثورة .. جابت لنا رئيس مُنتخب من شعب مصر العظيم .. تعم ثورة اسُتشهد من أجلها خيرة شبابها وده مش محتاج بقى لدليل ؟
---------------
د.شهيرة عبد الهادي
27 / 6 / 2012
الإسكندرية .. مصر الحبيبة