بسم الألم
والشوق....
لضحكة تلمّنا
من فوق رصيف الاشتياق
كان الفراق
سكّة عبور
لدموع بتترجّى اللقا
وإيدين بتتهجّى السلام
وعيون تقرر إنّها
تكتب قصايد حزنها
فالحرف يهرب م الكلام
................
(2)
جاني الشتا قبل الميعاد
والبرد زاد...........
رغم إنْ الناس بتحلف
إن لسّه الصيف مطوِّل
والخريف بيهل الاول
بس أنا بردانة جداً
بارتعش.......
ودمعي أكتر م المطر...
شربت دموعي الأرض
تفتكر إيه اللي جد؟!!!
يمكن لأنّك مش معايا
قبل الشتا حسّيت ببرد !!!!
...................
(3)
العتاب نُص المحبّة
وإحنّا نُصِّين من شجن
فامّا اعاتبك
إعرف إنِّي
اشتهيت نُصّي اللي فيك
وامّا ادق الباب عليك
اعرف إني...
محتاجالك
لجل مااتحدى الزمن
::
منى حواس
