الثلاثاء، 28 يونيو 2016

حدث بالفعل ..بقام د.شهيرة عيد الهادي

حدث بالفعل ..
--------------------------------------------
الأبنة في ثانوية عامة .. الأب طول النهار عامل مصلح اجتماعي وبيتكلم في الدين ومتعاطف مع الإخوان لدرجة كبيرة لكنه مش إخواني .. الأم منتقبة ومن جامع لجامع ..
-الإبنة بعد امتحان مادة ما .. بابا .. إفرح ببنتك .. أنا لقيت الاختبار متسرب على النت وكمان أخويا جابهولي ومرضتش أغش..
-الأب المتدين .. يثور يزعق يصرخ يتنرفز .. وليه .. دي بلد بنت كذا وكذا وكذا .. كنت شوفتيه وحلتيه واعتبريه زي تمرين .. دا انت اتصرف عليكي 20 ألف جنيه .. ومش مهم الفلوس المهم المجموع ..
-الإبنة اندهشت .. زعلت .. اتصدمت .. لأنها كانت متربية غير كده .. عيطت ..
-الأم المنتقبة .. بتصلح الموقف .. بابا ما يقصدش يا فلانة .. إنت طلع عينك سنة كاملة وشاطرة ومجتهدة وعملتي اللي عليكي .. بس ما فيهاش حاجة .. بابا قصده .. كنتي شفتيه زيه زي أي امتحان من الامتحانات اللي بتتمرني عليها .. وبردوو في اللجنة ويعد ما تخلصي حل .. لو فيه حاجة مش عارفة تحليها .. وما دام فيه غش .. خدي كلمة ولا كلمتين ..
-الإبنة .. راحت الامتحان في مادة تانية .. وهي مادة الاقتصاد ... وكانت شافت امتحان الاقتصاد على النت بالليل قبل ما تروح الصبح للامتحان .. فلما راحت الامتحان.. لقيته هو هو اللي على النت .. حلته كله صح ..
-الإبنة رجعت البيت .. نادت على مامتها .. ماما .. قولي لبابا .. إفرح يا بابا .. بنتك غشت ..
----------------------------------------- ‫#‏شايفين__الأجيال_بتدمر__ازاي‬ ‫#‏نتيجة_التخبط_بين_القيم_ونقائضها_‬
-------------------------------------
د.شهيرة عبد الهادي
Drshahera Abd Elhady Ibrahem

تعليق .. على واقع التعليم في مصر..بمناسبة تسريبات الثانوية العامة ..بقلم ..الأستاذ أمير أحمد


الفشل ليست ورقة مسربة وغش وفوضي ..الفشل ان تتحول المدارس لمجرد كشوف ..وتتحول البيوت لكهوف ..ويتحول التعليم لدرس خاص واصف وموصوف ..الفشل ان نحشي الرؤوس بما ينفع وما لا ينفع ..فنحصل علي خريج ينسي ولا يفلح ..الفشل ان نتوسع بانشاء المقاهي ..بديلا عن الجامعات ..كي تسع من لا عمل له ..وان يتم التعيين بالواسطة ..فيصبح عاملا لا عمل له ..الفشل الا ندرك من نحتاج ..فنعلم ما لا حاجة له ..الفشل يسري بكل بقعة وبكل ركن ..الفشل برؤوسنا جميعا ..ولكي نصلح من كل ذلك ..علينا ان نتعلم لعبة من العاب الصغار ..وهي افضل من تعليم سنوات ..علينا ان نعلم المسئولين والاطفال والاباء والامهات..لعبة اسمها البازل ..كي نتعود علي وضع القطعة الصحيحة بمكانها الصحيح ..ولا نتعود علي رؤية الفوضي والاهمال بكل مكان ..ليصبح امر واقع مفروغ منه ..تعودت عيوننا علي لوحة بازل مقلوبة راس علي عقب ..ومهما حاولنا فلا جدوي من اصلاح الخطأ بخطأ آخر ..هكذا علموا صغارهم علي الترتيب والمفاهيم الصحيحة منذ نعومة اظافرهم ..وعلمنا اولادنا الفوضي والغش والاهمال ..ونحاسبهم الآن ..ونضع علي عاتقهم مبادئ لم يرونها لا بالمدرسة ولا بالشارع ولا بأي مكان..فمع الحفظ والتلقين وغياب الاهداف ..كيف نطلب منهم الحفاظ علي قيم تتلي ولا تطبق امامهم . معذرة علي الاطالة ..وتحياتي
------------------------------------------
أمير أحمد