الربعاء 3 / 5 / 2017 م ..بقلم د. شهيرة عبد الهادي

الأربعاء 3 / 5 / 2017 م .. الحمد لله كما ينبغي لجلال وجهه وعظيم سلطنه .. ربنا راضي عني وبيحبني وبيبعت لي رسائل تطمني على نفسي وأني بإذن الله وتوفيقه ح اكون صح .. .ليه باقول كده .. عشان أنا كنت تعبانة ودخلت المستشقى يوم الثلاثاء 2 / 5 / 2017 م الساعة 2 بعد منتصف الليل .. وبعدين خرجت تاني يوم ..اللي هو يوم الأربعاء ده الساعة 11 قبل الظهر ..والطبيب قال لي ارتاحي ..لكن أنا كان عندي آخر محاضرة مع 3 دراسات و3انجليزي تعليم أساسي يوم الأربعاء ده ..صممت أني أروح وما اخلفش ميعادي معاهم ..مع إن ممكن كنت ألغيها عادي .. وربنا عالم بحالي .. بس هم في آخر السنة خلاص ووقتهم ثمين .. وانا داخلة الكلية بقى وبجد تعبانة والدنيا بتلف بيا .. لقيت مجموعة كبيرة جداً والله .. من الطلاب والطالبات .. بيجروا وجايين عليا في مظاهرة حب لم أحظى بها من قبل .. ووالله كلام الحب اللي سمعته منهم خلاني في صحة جيدة ونساني الوجع كله .. وجع المرض ووجع الناس اللي مزعلاني .. نساني كل الوجع اللي في الدنيا .. لأ .. ومظاهرة الحب دي كانت من مين بقى .. كانت .. من طلاب التعليم المفتوح .. طبعاً أنا عرفت بعد ما سألتهم .. حضراتكم مين .. لأن كل تيرم بادرس لألاف مؤلفة..وطبيعي أنا لا أتمتع بذاكرة فوتوغرافية قوية والكل عارف كده ..بأمانة لم أحظى بمظاهرة حب بهذا المستوى من قبل مثل ما حظيت بها من هؤلاء الطلاب والطالبات ..طلاب التعليم المفتوح .. وطلبوا التصوير معايا واتصورنا بردوا واحنا بنقول بطيخ وفسيخ وكمان كنا بنهتف بجد للحب وخاصة حب مصر .. وإن شاء الله ح انزل الصور فيما بعد ..لأن عندي مشكلة في الجهاز دلوقتي .. ومظاهرة الحب دي لما تيجي من طلاب وطالبات التعليم المفتوح يبقى ليها طعم تاني خالص .. لأن التعليم المفتوح ده قضية في حد ذاته ومن يعملون معنا يعرفون ذلك و يعلمون أبعاد التعليم المفتوح وأبعاد ما أقول .. إنه التعليم المفتوح وما أدراك ما التعليم المفتوح .. وعلى فكرة أوعوا حد يفتكر أن كان ليهم معاملة خاصة .. أبداً .. طريقتي هي هي مع كل الناس ومع كل نوعيات وتخصصات الطلاب والطالبات .. وزعلنا مع بعض وزعقت فيهم وصرخت فيهم ولطمت بردو بحجارة سودة منهم وخاصمتهم وكل حاجة ..بس في النهاية بردوا.. عرفوا أن كل اللي باعمله لمصلحتهم .. والتعليم المفتوح ده بيكون نسبة كبيرة منهم كبار في العمر الزمني .. فربما كان لهذا العامل تأثير في فهمهم ليا ولشخصيتي وإسلوبي وطريقتي ورغبتي في العمل الجاد على قدر الطاقة وأن احنا نعرف حتى ولو معلومة واحدة بس بإتقان ويكون بيننا الاحترام والهدوء والنظام واتقاء الله في العمل ثم في بعضنا البعض .. الحمد لله كما ينبفي لجلال وجهه وعظيم سلطانه .. ربنا بيطمني وبيقول ليا .. إن في النهاية لا يصح إلا الصحيح .. بس الصبر .. وربنا بينصف كل شريف .. وعلى فكرة أنا وقعت امبارح بردو ..وقبل كده بإسبوع بردو من على سلاالم الكلية ..ومرة بنات تالتة بيولوجي شالوني ومرة بنات تالتة دراسات شالوني ومرة العامل وصلني ..وكل يوم عمالة أقع أقع مرة من على السلالم ومرة وانا ع الأرض المسطحة بردو أقع .. وكل ما آجي أجف أجع هههههه.. فيه إيه أنا مش عارفة ..يكنشي معمول لي عمل مرشوش على السلالم ههههههه..
--------------------------------
د.شهيرة عبد الهادي
4 / 5 / 2017 م
Drshahera Abd Elhady Ibrahem