تقولك يا طاهر..
والطهر باين على وشك ..
وهي في كل لحظة..
بتخونك و تغشك..
--------------------------------
وفيه ناس عاوزة ..
تعيش..
وتموت فيك انت...
وفيه ناس عاوزة..
تعلى وتعلى..
وتوطي فيك انت..
ولو سبتلها الساحة..
بردوو..
بتغير منك انت..
مساكين ..
في قلوبهم الحقد..
ب...........
بغلي ويغلي..
ياريت.....
تسيبك منهم..
وتعيش..
حياتك انت..
-------------------------
وفيه ناس لذيذة أوي..
ورايقة..
تدخلك من باب الحكمة..
وهي بتمزمز ميرندا..
عاوزة تعرف عنك ..
أي حاجة في أي حاجة..
ولو ما عرفتش..
يا ويلك..
لا حتشرب ميرندا..
ولا حتشوف ده من ده..
وهم فاكرينك عبيط..
يا طيب انت ..
و مش عاوزين يعرفوا ..
إنك ما بتحبش أي ميرندا..
(مع الاعتذار لكل المشروبات أصحاب ميرندا)
-------------------------------------------------
وفيه ناس تانية تجيلك..
عشان بتحبك..
وتحب مصلحتك..
وهي في الحقيقة..
ب تكسر في عضمك..
تقرقشه..
بنيابها المبتسمة..
تديك نصايح ..
(والديك بيدن كوكو كوكو)..
تطفي من على وشك ..
كل بسمة..
-------------------------------
وفيه ناس تظهر لك..
كده فجأة..
تقول لك وتقول لك..
تكتب فيك قصايد..
تدلق عليها انت..
بطيبتك..
تخلص لها..
تحبها..
تعطيها وتعطيها..
تضحك عليك هي..
تقول لك ..
يا اهبل..
هو انت ما تعرفش..
شعار المرحلة..
الدنيا مصالح..
والمصالح تتصالح..
مالقيناش عندك مصلحة..
يا صالح..
روح شوف لك ..
حد مع الدنيا متصالح..
احنا كده وما لناش دعوة..
باللي قالوا..
سيدنا الصالح..
( إن أربدإلا الإصلاح ما استطعت) ..
----------------------------------------------
د. شهيرة عبد الهادي
كلها كتبت بتاريخ ..
الأحد 20 / 8 / 2017 م
