الاثنين، 27 أكتوبر 2014

( كلمتين بالبلدي) دووول أعضاء مجلس الشعب المصري في العصور السابقة... بقلم د.شهيرة عبد الهادي


بالصدفة شاهدت  جزء  من حلقة العاشرة مساءً قي إعادتها اليوم الإثنين 27 / 10 / 2014م .. وأكيد حضراتكم شوفتوها.. وكان ضيوفها .. الأستاذ حمدي الفخراني .. والأستاذ البدري فرغلي  .. والأستاذ حيدر بغدادي ..والدكتور طلعت .. وكان على التليفون  الأستاذ علاء عبد المنعم ..وهو الوحيد الذي أنا سمعته من المداخلات.. وساءني  ما سمعته وما شاهدته .. ده يتهم  ده بأنه حرامي .. وده يتهم ده  بأنه خامورجي وريحة بقه دائما خمرة .. وده يقول لده: أنت  سافل و قليل الأدب .. وده يقول لده: من مارس الدعارة الجنسية هو من سيمارس الدعارة السياسية .. وده يقول لده: أنت سرقت  مليون جنيه من الدولة  في بورسعيد .. وده يقول لده : الحزب الوطني نفسه كان بيصرف على الدعاية بتاعتك  .. وده يقول لده: أنت لك سي دي  كله دعارة  جنسية .. وده يقول لده: عاوزين نكشف عليك .. وده يقول لده: إنت حرامي وإيدك طويلة ولسانك طويل .. وده يقول لده: أنت سرقت أراضي الدولة.. وده يقول لده : إنت نجس .. وده يقول لده: كان رئيس المجلس دايماً  بيقولي إني أبعدك عنه لأنك شارب خمرة ع الصبح وريحة بقك منتنة آجي اشم بقك دلوقتي .. وده يقول لده : إنت أفيونجي وحشاش ..وده يقول لده : دا فتحي سرور كان بيقولي  خليه يلف شوية  كده في المجلس ويبعد عني أصل ريحته وحشة .. وده يقول لده :إنت معاك دبلوم تجارة .. وده يقول لده :أنا أشرف منك  وأحسن منك وانضف منك .. وده يقول لده :أنا من عيلة   شوف انت جاي  منين .. وده يقول لده: الشعب ضربك بالجزمة.. وده يقول لده :إنت بترفع قضايا على الناس علشان يدوك فلوس  ويرشوك فتآخدها وتسكت عن القضايا وتسحبها بعد كده..  طيب بالذمة تبقى  إيه المحصلة النهائية بقى  بالظبط  بالنسبة ليهم كلهم ؟؟؟ .. بالطبع حضراتكم عارفين المحصلة النهائية تبقى إيه !!!..  تصدقوا  إن دوووول اللي كانوا في مجلس الشعب المصري  في السنوات السابقة !!!!!  ويمثلون شعب مصر في مجلسه النيابي  ..  في الحقيقة .. ما أستطعت قوله بعد سماعي ومشاهدتي لهذا النمط السلوكي لأعضاء في مجلس شعب مصر  في العصور السابقة  .. وما تذكرته وجاء على بالي علطول  ..هم شباب الثورة  الشرفاء الأنقياء النبلاء.. الذين خرجوا يوم الثلاثاء 25 يناير 2011م بالذات .. ولم يكن لهم هدف إلا الله.. ثم.. تطهير الوطن من كل فساد .. مثل هذا  الفساد..الذي سمعته و شاهدته  في هذه الحلقة ..وما  قد فضحته  هذه الحلقة  من  طرق فسادهم وإفسادهم  للمجتمع المصري .. الله يرحم شهداء ثورة  يناير وكل شهداء مصر منذ قيام هذه الثورة التي بدأت نقية  .. وعلى فكرة .. اللي سمعته  وشفته  في الحلقة دي .. من هذا المستوى غير المقبول والمتدني.. ما زال موجوداً  في كل مؤسسات الدولة ..في جميع المجالات  ..بجميع مؤسسات الدولة .. كلها  كلها كلها كلها كلها  كلها كلها .. الصحية والتجارية والاقتصادية  والسياحية والمالية  والقضائية  والإعلامية  والسيادية  والهندسية    ووووووووووو.. حتى المؤسسات التعليمية التربوية  بداية من الروضة وحتى الجامعة وما بعد الجامعة  .. للأسف من المفروض أنه  كلما ارتقي الإنسان في العلم وفي المنصب  والعمر الزمني  والعمر العقلي .. كلما كان أكثر قربا من الله .. لكن في مصر .. كلما كان  فاسداً مُفسداً  ويجعل المناخ أكثر فساداً بكل ما أوتي من قوة .. يا خسارة يا مصر ..  وبرافو عليك يا وائل يا إبراشي..

--------------------------
د.شهيرة عبد الهادي