لو كانَ لي قلبان لعشت بواحدٍ ..
وأفردت قلباً في هواك يعذبُ ..
لكنَّ لي قلباً تّملكَهُ الهَوى ..
لا العَيشُ يحلو لَهُ ولا الموت يقربُ ..
كعصفورة في كف طفلٍ يهينها ..
تُعَانِي عَذابَ المَوتِ والطِفلُ يلعبُ ..
فلا الطفل ذو عقل يرق لحالها ..
ولا الطيرُ مطلوقُ الجناحينِ فيذهبُ ..
لـ قيس بن الملوح
بجد
صعبان عليا قووي .. إني بقيت أفضل التعامل مع الناس من خلال العالم
الافتراضي .. وعارفة أن انا غلطانة في ده .. بالرغم أنني قد تعرفت على
شخصيات في غاية الاحترام في هذا العالم الافتراضي .. وأتمنى دوام المعروف
والود والمحبة في الله بيننا .. وعارفة أن التعامل مع البشر في أرض الواقع والمواجهة والصبر على أذى الناس هو الصح والأفضل والأوفق والعلاج لظواهر
سلبية كثيرة .. لكن في حقيقة الأمرالوضع سئ جداً.. التعامل مع الناس في أرض الواقع
بقى صعب ..النفوس شايلة من بعضها بدرجة غير عادية بسبب وبدون سبب ..
الأحقاد كتيرة .. لو قعدت مع الستات تلاقي غيبة ونميمة .. لو قعدت مع
الرجالة تلاقي غيبة ونميمة ..بل كمان الرجالة بقوا أفظع من الستات في الغيبة والنميمة.. و تلاقي من الجميع ست ولا راجل ..كذب ونفاق ورياء
.. وكلمة من قدامك وكلمة من وراك .. وشللية وأحزاب .. وخناقات على أشياء
ذات مستوى دنئ .. واستغلال لبعض وسرقة بعض حتى في المشاعر والسطو على النفوس .. وضحك على
الدقون .. وده بيخطط لده وعاوز يموته وبيكرهه وعاوز يآخد مكانه وبعدين لما
يشوفه ولما يقابله في حتة يآخده بالحضن ولا كأن حاجة حصلت .. .. وده
بيحسب لده فلوسه خد كام ووصل لكام .. وده باصص لده في لقمة عيشه .. واللي
في إيده مركز عاوز يذل اللي تحت إيده .. ومتعرفش هو عاوز إيه.. عاوز رشوة
ولا عاوز حاجة تانية .. وده بيقول على ده حرامي وده بيقول على ده مرتشي ..
وجو مسمم .. وأخلاقيات منهارة .. و إذا قلت يا ناس الأخلاق يا ناس الأخلاق
..يقولوا عليك طيب يعني عبيط واهبل وانت مش عارف تمشي مع الناس
..وبيتهيألهم أنك مش شايف الدناءات اللي بيعملوها .. حاجة سيئة بجد ..
-------------
د.شهيرة عبد الهادي
29 /4 /2013 م
الإسكندرية
مصر الحبيبة
كلمتين بالبلدي
كلمتين بالبلدي
=========
طبيعة الدنيا هي كده .. يوم حلو ويوم مر.. وفيها الحزن وفيها الفرح ..
وفيها الزعل وفيها العشم .. وفيها الخصام وفيها العتاب .. والواحد ممكن يزعل
مع أخوه مع أخته مع جاره مع جارته مع زميله مع زميلته مع حبيبه مع حبيبته .. ومشاعر الزعل دي
قاتلة بجد خصوصا عند الواحد اللي بتبقى نفسه وسريرته شفافة طاهرة نقية بيضاء محبة للحب نفسه .. لكن بجد
أشد أنواع الزعل قتلاً للإنسان .. هي أنه يكون زعلان من نفسه ..لأي سبب من
الأسباب مهما كانت درجة تفاوتها وقوتها
وشدتها من أبسط الأشياء إلى أعقدها .. والأكثر قتلاً على البارد للإنسان
أنه يكون مش قادر يحط إيده على المكمن والجوهر وبيكون متلخبط بين مفاهيم مغلوطة كثيرة عنده وعند الغير .. يلا .. هي .. بس خواطر بتجيلي كده
بالبلدي .. بـ احب اشرككم فيها .. وعلى رأي مريومة .. يلا باي ..........................
مريومة دي بنت
اخويا شقيقي بنوتة زي العسل عندها 7 سنين وحافظة 20 جزء من القرآن الكريم .. باتعلم منها ..
-----------
د.شهيرة عبد الهادي
2 /6 /2013 مـ
كلمتين بالبلدي
=========
أتاري كل اللي فات في الشهر اللي فات .. كان برومو مسلسل انقطاع الكهرباء
اللحظي اللي بدأ اليوم .. في أول حلقة من المسلسل اللي ظهر بنجاح باهر في
ثوبه الجديد للمشاهدين اليوم .. وبلاش اقول ظهر للنور.. ما هو مفيش نور أصلاً .. يا
سادة .. الكهرباء النهارده بتتقطع طول النهار .. اتقطعت 4 مرات متتاليات
ومرتين متفرقتين بداية من الساعة 2 الظهر .. كانت مدة الانقطاع تتراوح بين
نص ساعة إلى ساعة .. لغاية ما جاء وقت
المغرب .. مكدبتش خبر وزي ما هي معودانا من السنة اللي فاتت .. محبتش تقطع
عادتها وتزعلنا وليه تزعلنا ما احنا حنحل كل حاجة بالحب.. قامت عاملة إيه
.. قامت مقطوعة من قبل أذان المغرب كمان ومجتش الا دلوقتي .. يعني قعدت
مقطوعة 5 ساعات متتاليات .. وكمان عمومي .. وقعدنا عايشين من غير ماء ولا
كهرباء والدنيا حر وفترة اختبارات وعمل مكثف .. ودي كانت نهاية الليلة
السعيدة بتاعة أول حلقة في مسلسل انقطاع الكهرباء عن مصر .. وانتظرونا في
باقي الحلقات القادمة .. مع ملاحظة أن مسلسل انقطاع الماء يتم الإعداد له
من الآن حتى يأتي في موعده مع اتمام بناء سد النهضة الإثيوبي وعصر النهضة
المصري ..وكل نهضة وانتم طيبين .. # النهضة في خدمة المشاهد ..
-------------
د.شهيرة عبد الهادي
2 /6 :2013 مـ
