( كلمتين بالبلدي ) والسلام عليكم ... بقلم د.شهيرة عبد الهادي

كلمتين بالبلدي
=========
مش عارفة .. ليه احنا شعب ..بيحب.. يا إما التهوين من الأشياء ..يا إما التهويل في الأشياء  .. ثم الحديث في القشور.. والبعد عن جوهر الأمور .. وما قد يُدفع فيها من مهور .. عندما جاء أوباما وخطب في جامعة القاهرة وقال "السلام عليكم" .. قعد الشعب يهلل ويقول يا حلاوة على خفة دمه .. وواحد من الفنانين اللي كانوا حاضرين الحفل في  قاعة الاحتفالات بالجامعة  قام وهلل وقاله : "we love you Obama " .. والنهارده فرحانين قوي بأن بوتين قال للناس الروسيين اللي كانوا في النزهة معاه هو والرئيس السيسي .. لما تسلموا على الرئيس السيسي قولوا له " السلام عليكم" .. والمذيع المصري عمَّال يقول .. خدوا بالكم بقى .. السلام عليكم بتاعة أوباما تختلف عن السلام عليكم بتاعة بوتين .. يعني معقولة يا ناس مش عارفين إن دي سياسات دول ومصالح .. وأن أمريكا وروسيا بتهمهم بالدرجة الأولى مصالحهم .. وأن الكبار في النهاية بالبلدي كده بيتصالحوا وبعدين بيدوسوا الصغيرين .. ويقولولهم بردووو " السلام عليكم " .. فعلاً والله احنا بنعيش الكوميديا السوداء اليومين دول.. و"السلام عليكم " ..
------------------------------
د.شهيرة عبد الهادي

(مواقف حياتية ) وهو ده الشعب المصري .... بقلم د.شهيرة عبد الهادي

الكهرباء النهاردة  الأربعاء  13 / 8 / 2014 مـ ..في انقطاع مستمر من الساعة 12 إلا ربع الظهر.. ومجتش إلا دلوقتي ..الساعة  11 إلا ربع ليلاً .. يعني 11 ساعة متواصلة انقطاع  للكهرباء .. تتخللها يادوب فترات تتراوح من 10 دقائق لربع ساعة   الكهرباء بتيجي فيهم .. بجد مبقاش فيه كلام الواحد يقولوا .. يلا ربنا يستر على مصر.. المهم إنه كان في الشارع فرح اتعمل كله في الضلمة والفرقة بتزمر وتطبل في الضلمة والزغاريط في الضلمة والعروسة دخلت شقتها في الضلمة.. وفي نفس الشارع وعلى بعد 10 متر من الفرح .. كانت فيه خناقة بين مجموعة من الشباب والرجال في الضلمة وكل واحد ماسك نبوت عشان يضرب أخوه في الضلمة .. فجأة النور جه حوالي الساعة 10 و 45دقيقة تقريباً .. اللي كانوا في الفرح قالوا هيه هيه وزودوا الزغاريط والفرقة زودت الطبل والكهارب اشتغلت .. واللي كانوا في الخناقة .. قاموا وقفوا لبعض بالنبابيت تاني عشان يكملوا  الخناقة .. وهو ده الشعب المصري ..

--------------------

د.شهيرة عبد الهادي