=========
النور كان مقطوع اليوم الخميس 4 / 9 / 2014 م ..من الصباح وحتى العاشرة صباحاً في جميع أنحاء الجمهورية تقريباً يعني حوالي 4 ساعات وفي مناطق آخرى 5 ، 6 ،7 ساعات متواصلة.. أو للموضوعية لنقل في معظم محافظات الجمهورية .. وما زال ينقطع في فترات تقريباً كل ساعتين في المنصورة واسكندرية اللي انا عارفاهم عشان متابعاهم .. وطبعاً المية بتتقطع بالتبعية .. يعني جحيم لا ماء ولا نور .. وما بالك بقى بالمستشفيات والمصانع ووووووو والمليارات التي خسرتها الدولة في هذا اليوم .. وهذا أمر غير مقبول .. ويجب إقالة وزير الكهرباء .. ويجب إعادة النظر في الحكومة وفي طبيعة العمل في جميع المؤسسات بالدولة .. والمحاسبية يجب أن تتم للجميع بداية من العامل البسيط في كل مؤسسة وحتى أكبر قيادة فيها .. على الإهمال وعدم الضمير وعدم تحمل المسؤولية .. وبالعدل والحق والعلم ستتقدم مصر .. وقد حان الوقت لتطبيق علوم الإدارة والأخذ بمبدأ القياس ومبدأ الثواب والعقاب واحترام القانون والنظام والنظافة في كل شئ.. والاستفادة من علم الإدارة والادارة الاستراتيجية ووضوح الرؤية والرسالة فعلاً لا ملصقات تعلق على الجدران .. و من ضمن المأساة اللي احنا عايشنها .. إن أحد المسؤولين .. بيقول : "أن الشهر اللي جاي .. شهر سبتمبر .. حتكون فيه الدنيا برد شوية .. والكهرباء مش حتقطع ".. شايفين حضراتكم العلم اللولبي الجهنمي اللي احنا فيه ؟ .. وبعدين مش وزارة الكهرباء دي من أكثر الوزارات إعطاء رواتب وحوافز لكل من يعمل بها وهي من أعلى الدخول في مصر مثل البترول والاتصالات ؟.. مفيش فايدة
---------------------------
د.شهيرة عبد الهادي
