مفيش فايدة في أساليب المصريين الملتوية .. والله الواحد خايف أن الناس
تآكل بعضها بعد كده .. في فتح الله ماركت .. ودي مووولز كبيرة وانتشرت
دلوقتي في كل مركز ومدينة في مصر .. تدخل المول.. تمشي وراك البنات اللي
بيشتغلوا في الدعاية وكمان الولاد اللي زيهم .. يقولولك .. ده عليه عرض
ونزل 11 جنيه.. وده عليه عرض ونزل 10 جنيه وده اتنين وتآخد عليهم واحد
هدية وسعرهم حيوفرلك 15 جنيه .. فالطبيعي إنك تشتري بعد ما تتأكد من
تاريخ الصلاحية .. وتروح ع الكاشير بسلامة نية وتدفع ..
فتبص في الفاتورة بالصدفة أو بالعنية .. فتلاقي كل اللي انت اشتريته
واللي المفروض عليه عرض .. ما علهوش عرض وأن الكاشير حسب السعر الأصلي
قبل العرض .. تقو م تقول للكاشير كده .. يقوم قايل ليك.. البار كود
اللي قدامي بيقول لي السعر هو كده وروح كلمهم في الترابيزة الخاصة
بالمبيعات .. تروح للمسؤلين عن المبيعات .. تفعد البنت أو الولد المسؤول
.. ماسك التليفون ..يطلب البنت أو الولد بتاع الدعاية وبتاع الفرع
اللي انت اشتريت منه المنتج واللي هو حط ليك المنتج في العربية بإيده
.. مرات ومرات .. وتحس وانت واقف أن الموضوع ..زي ما تكون خطة .. وعلى
اما الولد أو البنت ده يجي عشان يحل الموضوع ويغير الحاجة مثلاً
.. يآخد وقت من نص ساعة إلى ساعة .. وبعدين لما يجي .. تلاقي المفاجأة هنا
بقى .. يقلك إيه .. يقلك : العرض انتهى .. تقوم الناس زعلانة طبعاً
.. وفيه اللي بيعمل خناقة .. وفيه اللي بيرضى يكون مغلوب على أمره ويآخد
المقلب ويسكت .. وفيه اللي بيرجع الحاجة ويآخد فلوسها .. وفيه اللي بيرجع
الحاجة ويآخد الفرق .. وفيه اللي أساساً ما أخدش باله وروح بيته وشرب
المقلب المتين .. وده إسلوب من أساليب السرقة والنصب اللي بيعملها فتح
الله.. وده طبعاً ..غير أن ما فيش خدمات محترمة .. يعني مثلاً ..
حضرتك اللي بتعبي حاجتك بنفسك في الأكياس .. وإذا طلبت كيس كبير .. يكون
رد الكاشير في منتهى قلة الذوق _إلا القليل _ .. و المهم لما انا
قلتلهم .. حنكتب ع الفيس وحنعمل حملات ضدكوا .. رد عليا وقال .. اعملي
اللي انت عايزة تعمليه .. يعني ما عدش حد بيخاف من حد ولا على حد ولا
على سمعته في مصر . كل حتة في مصر بتسرق المواطن العادي الغلبان ..
أسواق فتح الله دي بقت سيئة جداً جداً جداً .. ومش هي بس .. كل التجار في
مصر سيئين وما عندهمش ضمير ..
