ثلاتية الرحيل
(1) ارتحال الشوق
طال السفر
والانتظار شجرة مرار
شجرة بتطرح كل ثانية وكل لحظة
ألف حيرة وألف نار
وكل دقة جوه قلبى بتندهك وبتسألك
إزاى قدرتى ع البعاد ؟
إزاى قدرتى ع السفر ؟
ليه الشراع فتح الدراع لرياح فراق ؟
ليه الاشتياق سلم سلاحه وارتحل ؟
ليه الأمل مارفضش يومها الإنسحاب ؟
ليه الشموس وافقت تغيب رغم الدموع ؟
ليه السفر دايماً بعيد
أبعد كتير من القمر ؟
لما سناه بيسلم الضوء الأخير
لليل طويل .. مالهوش نهار
والقانى نخلة اتسمرت على شط بحر ملوش قرار
نخلة تطول بالانتظار
وسعفها عايش بيحلم بالندى
يروى العطش ويبل ريق
بس الندى سافر وتاه منه الطريق
والنخلة بتعانى الرياح ويّا الجفاف
النخلة بتعانى الحريق
جُمّارها حنضل ف انتظارها للندى
والندى تاه فى المدى
واللقا بقى مستحيل
ولقتنى باسأل عن دليل ياخد بإيدى من حصار الأسئلة
ليه السفر دايماً طويل ؟
ليه البحور من غير شطوط ؟
ليه الأفق من غير أمل ؟
ليه الشموس لازم تغيب ؟
ليه النجوم بتنطفى ؟
ليه النهار عمره قصير ؟
ليه الانتظار دايما مرير ؟
وبرغم مُر الأسئلة أنا لسه عايش ف انتظارك
أنا لسه مش فاهم قرارك ليه الابتعاد ؟
وازاى قدرتى ع البعاد ؟
وازاى قدرتى ع السفر ..جوّه البحار ؟
لكن .. هأقولِك إيه ؟
البُعد بُعد بالغصب أو بالاختيار !
(2) الميعاد كان الشتا
كان رحيلى غصب عنى
مش لأنى تعبت منك
بس حان الحين للحظة الافتراق
وانزوت شمعة لقانا فى لهيب الإحتراق
والحنين لانصهار الروح بعد الجروح
انتصر على الاشتياق
واللى كان محسوب لقا.. اصبح فراق
انا الشجرة اللى ما تعرف معنى الرحيل
والرحيل عند الشجر شئ مستحيل
الشجر مايرحلش إلا غصب
ولا يتركش ارضه ودنيته إلا انتزاع
الشجر مايقواش ع الرحيل إلا اقتلاع
بس الميعاد كان الشتا
لما اخر ورقة دبلت
فاتت الشجرة ورحلت
غصب عنها
كنت عارفه انك مستنى اللقا
يطرح ورق اخضر جديد
جه القدر جّز الجذوع
والفروع صارت بعيد
بس انا روحى لسه عايشة
جوّه روحك
لسه بتلملم جروحك
لسه بتنوّر طريقك
رغم الرحيل
والرحيل كان غصب عنى
ياحبيبى وغصب عنك
(3) عهدى ووعدى
من اول يوم وانا قبل ما انام ماعرفش انام
قبل ما أطبع على خدك وجبينك
عهدى ووعدى
قبل ما اقولك : تصبحى على خير
ولا تطلع شمس ولا ييجى نهار
قبل ما تصبح اول كلمة تخرج من حلقى : صباح الخير
والشمس مصرّة تشرق من تانى
رغم غيابك
والليل لسه بيطّفى الشمس
مع ان سنا قمره بيضّوى الليل
وانا لما الليل بيهل عليا ما عرفش انام
قبل ما أطبع على خدك وجبينك عهدى ووعدى
تلات مرات
وبرغم الليل وبرغم البعد
وبرغم الآهه المكبوتة جوّه القلب
وبرغم الصبح المكسوف من ضيّ عينيكِ المتدارى
وبرغم الصيف وبرغم البرد
لسه ما بقدرش انام قبل ما أقولك :
تصبحى على خير
هيثم كمال
