من أشعار ..عماد طنطاوي

إرسموا ياعيال ع السبورة
شجرة بضلاية وعصفورة
وإرسموا ورد أحمر وبنفسج
حوالين الداير ف الصورة
وإحلموا ببلادكوا تكون هية
وإكتبوا بنحبك يابهية
إصحوا ب أحلامكوا الصبحية
وبوسوها الحلوة القمورة
صبحوا على نرجس وبشارة
باركوا لعم أحمد والحارة
والجارة تسلم ع الجارة
والحب يفيض برة الصورة
إحلموا دا الحلم ماهوش بفلوس
ولاهمه رغيف وشبع وغموس
الحلم دا شىء مخلوق مخصوص
علشان الناس المقهورة
الحلم شجاع وقوى وعنيد
مايهابش شاويش وكلابش حديد
دا براح مفتوح ومداه لبعيد
الحلم وليد لحظة جسورة..!! #عماد_طنطاوى