الاثنين، 6 يونيو 2016

إلى كل من يريد أن يعلم أولاد مصر الغش ............

إلى كل الأهالي اللي بتلف بالميكرفونات على لجان الثانوية العامة عشان تغشش ولادهم وبتقف أمام اللجان بالسنج والمطاوي والسلاح الأبيض عشان تضرب المراقبين اللي مش بيغششوا ولادهم ويخلوهم يروحوا من اللجان لبيوتهم في حماية عربيات الشرطة .. وإلى كل مسؤول عن التعليم في أي مكان بمصر وعاوز كل الطلاب تنجح بامتياز وبدون وجه حق وعاوز يغششهم عشان يستمر قاعد على كرسيه ..
-----------------------------------
د. شهيرة عبد الهادي

إحنا وحشين في حق بلدنا .. إحنا المؤامرة ذاتها على مصر ..

أأقولكوا على حاجة ومتزعلوش مني .. إحنا وحشين في حق بلدنا .. إحنا المؤامرة ذاتها على مصر .. هوفيه بلد في الدنيا ..الأهالي فيها بتركب عربيات عليها ميكرفونات وتغشش التلاميذ الإجابات بمكبرات صوت حوالين اللجان الامتحانية وكمان تمسك سنج ومطاوي وسلاح أبيض للمراقبين ويهددوهم عشان يغششوا ولادهم .. هو فيه بلد في الدنيا .. فيها واحد إسمه وحش الرياضيات .. وتمساح الفيزياء .. وأسد العربي .. ونمر الدراسات .. ومعرفش إيه وإيه .. هو فيه بلد في الدنيا .. المسؤولين عن العملية التعليمية في الأماكن المختلفة عاوزين ينجحوا الطلاب كلهم بامتياز .. هو فيه بلد في الدنيا .. كان بيبقى فيها نسبة النجاح في الثانوية العامة لتلميذ 102 % وقال إيه كان فيه مستوى رفيع .. واما تسمع أي واحد فيهم ودانك تتعب ونفسك تتسد لأنه مش عارف ينطق كلمتين عربي على بعض .. وبعد ما يدخل بالـ 102% كلية الطب مبيعرفش حاجة وبيموت العيانين في المستشفيات .. و بعد ما يدخل هندسة يبقى المهندس يغش في المونة والطريق يتعمل النهارده ويتهد بكره.. وغيره وغيره وغيره .. والنتيجة أن الغش بقى في كل حاجة في البلد .. والموضوع ده من الأساس حصل بردوو من ولاد البلد اللي عشوها .. لأن بعض الناس اللي راحت بعثات للخارج ورجعت ومعاها دكتوراة .. رجعت ومعاها شوية أنظمة تعليمية من البلاد اللي كانوا فيها .. وجم هنا .. يعرضوها ويطبقوها في بلدنا التي تختلف في ثقافتها وفي مفاهيمها عن البلاد دي اللي جابوا منها الأنظمة دي .. وعرضوا تطبيقها في مصر .. وبدأوا يتخبطوا وجعلوا التعليم حقل تجارب.. مرة الثانوية العامة سنتين ومرة سنة وبعدين يرجعوهم زي لعبة حادي بادي .. وهم في الأساس مش مثخلصين لبلدهم .. وكانوا عاوزين كراسي وبس ويافطة وبس .. عشان يتقال عليه صاحب المركز الفلاني الأسبق أو السابق .. فعملوا بلبلة وازدزاجية في التعليم .. وخلقوا بعبع من الثانوية العامة .. عشان الوحش والتمساح والأسد والنمر يعيشوا .. أنا مصممة أننا من نهد مصر بأيدينا أننا من نحارب مصر بأيدينا .. إحنا وحشين .. إحنا المؤامرة ذاتها على مصر ..
-------------------------------------------
د. شهيرة عبد الهادي

شوفوا بقى الأخلاق المنهارة وشوفوا بقى الغش على أصوله ......

أنا مُصممة على أن المؤامرة على مصر هي من أبناء مصر اللي عاشوا فيها واتعلموا فيها وكلوا عيشها وملحها وبيخونوها بسلوكياتهم المبنية على غش في غش في غش .. ح أقول لحضراتكم على بعض الأمثلة من مرار الغش الإنساني اللي باشوفه كل يوم .. وبدون ذكر أسماء.. في عمل ما بيتطلب تقويم الطلاب .. كان معايا شخصية ما كبيرة في السن وفي مركز معين متوصلش له إلا وهي على مشارف ترك العمل .. الشخصية دي قالت لي بالحرف .. لأ لأ دول بجد ما يدخلوش في زمتي بنكلة .. دول ضعاف .. ومفيش فيهم حد كويس إلا فلان .. وأعطتهم بالفعل تقويم أمامي وأنا شايفاه والتقويم كان يتناسب مع كلامها ومع مستواهم فعلاً .. وأنا عشان طيبة كالعادة .. صدقتها .. أنا بقى بعد ما خلصت شغلي .. رحت المكان اللي بيتسلم فيه الشغل ده .. لقيتهم قالوا لي .. أن الشخصية دي جت وقامت بتغيير التقويم .. وكان تقويمها كله بعد كده..يعني بعد ما راحت من ورايا ..وغيرت اللي ورتهولي ..هو التفوق للمجموعة كلها .. شوفتوا بقى الأخلاق  المنهارة شوفتوا بقى الغش  على أصوله .. حضراتكم لو شفتوا الشخصية دي .. حتقولوا عليها .. يا سلام على الدين والالتزام والجمال والمعاملة الحلوة وووو ..... إلخ .. شوفتوا بقى ..الغش في حياة حتى الكبير في السن اللي على مشارف أنه يقابل ربه عامل ازاي .. دي قصة .. وح أقول لحضراتكم قصة تانية ليها العجب في اللقاء القادم .. والعجب ده جاي من أنهم المفروض بيعملوا في مجال .. المفروض يكونوا فيه قدوة في العلم والتربية .. لكن يا خسارة .. لا بيحترموا سنهم ولا مكانتهم .. وحسبنا الله ونعم الوكيل في كل من ينشر الغش في مصر.. وطبعاً الشخصية دي  أصبحت في البلاك لست بالنسبة لي ..
----------------------------
د.شهيرة عبد الهادي

مصر تتعرض لمؤامرة كبيرة من أبنائها العاقين في الداخل ..


الناس في الشارع بتقول أن وزير التربية التعليم له بنت في ثانوية عامة وعامل ليها لجنة خاصة ؟؟ .. وقال إيه هو اللي عامل التسريب ده كله عشان بنته ؟! .. الكلام ده صحيح ؟ .. ولا دي إشاعة زي كل الإشاعات اللي بتملى بلدنا ؟؟ ..لما بيكونوا عاوزين يضيعوا الحقيقة في كل شيء ؟؟ .. معلش اعذروني أنا معرفش المعلومة دي بجد .. وكمان أنا مبقتش أصدق كل اللي بيتقال يعني .. طيبة بقى زي ما بيقولوا عليَّ  .. طب واللي بيعملوه الأهالي اللي ماشيين حوالين اللجان بميكرفونات عشان يغششوا ولادهم  وكمان ماسكين سنج ومطاوي عشان يضربوا بيها المراقبين اللي مبيغششوش ولادهم ..دول إيه بقى ؟؟ بجد مصر بتتعرض لمؤامرة كبيرة من أبنائها العاقين بالداخل ..
----------------
د.شهيرة عبد الهادي

حداد على انتشار ظاهرة الغش في مصر ...

طلاب الدبلوم العامة اللي سنهم كبير ومتجوزين ومخلفين ومسؤولين .. عاوزين يغشوا .. قـ باقول لهم .. رمضان بعد بكرة أهوو وبيقول لنا حرام الغش .. ردوا .. لسة رمضان مجاش .. هم يبكي وهم يضحك .. حداد على التعليم في مصر.. وعلى انتشار ظاهرة الغش في مصر .. ‫#‏الغش_منهاج_حياة_في__مصر_‬   
----------------------
د.شهيرة عبد الهادي

حكاية .. بتقول لكوا : شوفوا إنتوا بتدفعوا الشباب فيه ؟ وممكن كمان للاضطراب في الشخصية أو الامبالاة ...

بنت اخويا في ثانوية عامة ولجنتها في القاهرة لأنها من سكان القاهرة.. يعني المفروض أنها في الانضباط ذاته .. عمالة تعيط .. وهي شاطرة على فكرة وجايبة في الابتدائية فوق الـ 99 % وفي الإعدادية فوق الـ 98 % .. ليه بتعيطي يا بنتي .. قالت يا عمتو .. الصبح عطلونا تلت ساعة كاملة عشان التفتيش .. طب الامتحان بيبدأ الساعة 9 وهم بدأوا يفتشونا من تمانية ونص ليه ما يبدأوش يفتشونا بدري عشان يحافظوا على وقتنا ..وأنا سبت تليفوني مع أم واحدة صاحبتي من التزامي ومحافظتي على هيبة الثانوية العامة.. ولما دخلت اللجنة لقيت زملائي معاهم الموبايلات .. وكمان الملاحظين عمالين يزعقوا ويشخطوا وصوتهم عالي ويتصرفوا بهمجية .. وبعد ده كله كمان كل اتنين من الملاحظين عمالين يتكلموا مع بعض ويرغوا وبصوت مسموع وسايبين اللجنة هيصة والعيال تغش .. فـ اتوترت لدرجة أن إعراب مبتدأ مؤخر وانا عارفاه كويس مكتبتوش صح وكتبته غلط وانا مذاكرة كويس ..وكمان أول ما جت نهاية الوقت بقوا يشدوا مننا الورق بهمجية ..مع أنهم مأخرنا تلت ساعة الصبح.. وكمان الدين حيتعاد ..البلد دي فاسدة يا عمتو وانا عاوزة أعمل منحة واخرج منها إن شا الله أروح تركيا .. شوفتوا الفساد بيوصل الشباب لإيه يا مُفسدين يا غشاشين .. قلتلها ربنا معاكي وشدي حيلك وحاولي تنفصلي عن هذا الجو وتركزي في الإجابة وبس وانسي كل اللي حواليكي ومتفكريش إلا في إنك تجاوبي كويس وبس .. وانا بأمانة مش عارفة أأقول لها إيه .. وبعدين قلتلها :وخدي بالك ده كمان اللي بيحصل بردوو عندنا في لجان الامتحانات بالجامعة يا بنتي .. هي دي بلدنا دلوقتي وهي دي حياتنا دلوقتي وهي دي أخلاقنا دلوقتي .. انحدار وانفلات أخلاقي في كل شيء .. بس عندنا في الكلية لما بيكون العيب من عندنا .. أنا باعطي للولاد زمن قد الزمن اللي ضاع منهم بالظبط وفي نفس الوقت بامنعهم من الغش.. وكمان أنا واقفة للملاحظين بالمرصاد.. طول الوقت وانا بابعدهم عن بعض وباطلب منهم قفل موبايلاتهم وبارفض تحايلهم بالأعذار الكتير اللي بيعملوها عشان يسيبوا اللجنة ويخرجوا .. يعني لو رئيس اللجنة عاوز يطبق القانون حيطبقه.. لأن مفيش حد عاوز يشتغل بضمير .. كل واحد عاوز المكافأة وبس .. طبعا هم بيضايقوا مني وبعد كده بيروحوا أماكن آخري باستخدام طرق معروفة طبعا اللي هي الواسطة والمحسوبية .. لكن يكفيني أن واحد منهم قال : دي أول لجنة أشوفها بالهدوء ده دا اللجان التانية مولد .. وواحدة طالبة مع آخر يوم امبارح في امتحانات الأندر وهي ماشية جت عندي وسلمت عليّ وحضنتي وقالت لي: شكرا يا دكتورة على توفير حضرتك الهدوء لنا ومنع الغش عشان نعرف نحل .. وآخدين بال حضراتكم .. ملاحظ واحد وطالبة واحدة من آلاف آلاف آلاف .. هم اللي أشادوا بأداء منع الغش .. وعجبي
‫#‏الغش_سلوك_حياة_في__مصر___‬

مسلسل تسريب امتحانمات الثانوية العامة .........

على فكرة .. طلاب وطالبات الثانوية العامة .. اللي اعرفهم .. م العيلة والأصدقاء والعمارة والشارع .. بيقولوا أن امتحان اللغة الإنجليزية اللي هو بكرة متسرب من امبارح الفجر على النت ..بيقولوا موقع إسمه شاو مينج .. مش عارفة الإسم كده صح والا إيه .. والنبي ده اسمه كلام.. المفروض المسؤولين يعملوا اختبار تاني .. ويتم طبعه قبل الامتحان بساعات في نقس اليوم ..ويسلموه قبل الامتحان بدقائق في نفس يوم الامتحان .. اتعمل كده في الجامعة لما حصل فيها تسريبات للإمتحانات . بس على الله الأهالي ما يطلعوش على المراقيبين بالسنج والمطاوي عشان يسيبوا ولادهم تغش .. منتهى الجهل وتعمد التدمير لبلدنا مصر.. منتهى الفوضى والهرجلة والإهمال .. والنبي ده اسمه كلام . ربنا ينتقم من كل اللي بيخرب في مصر.. لا سبيل إلا تطبيق القانون بحزم وبدون أيادي مرتعشة .. ويجب إصلاح المنظومة التعليمية كلها.. مصر ما تستحقش مننا كده والله.. يا مجرمين يا مخربين ..

لحظة من فضلك ..............

أنا مش عارفة .. كل ما اكتب عن الغش والفساد في مصر.. لأني باشوفه بعيني .. وبالرغم من أن كل أصدقائي وصديقاتي والحمد لله راقيين جداً .. لكن اللي مزعلني أني بالاقي ناس تانية بتدخل بيكتبوا تعليقات تنقسم لقسمين الأول : بتقول لي إنت بتركزي على السلبيات .. شيء غريب جداً ..هو فيه أكتر من دي مصيبة أن الأجيال تكون غشاشة والغش بالطبع سيؤدي إلى الفساد.. أما الناس الثانية بقى: بيدخلوا يشتموا في شخص الرئيس الخلوق السيسي وهذا لا أسمح بيه على صفحتي إطلاقاً .. وكمان لما بـ أروح اشوف صفحاتهم ألاقيهم من الإخوان أو من السلفيين .. أحب أوضح حاجتين . أنا لما باتكلم عن الفساد اللي أساسه الغش .. باتكلم عشان ربنا وحده يعلم أنا محروق قلبي قد إيه على بلدي .. وربنا وحده يعلم أنني بارجع كل يوم لبيتي محروق قلبي ودمي من سلوكيات الناس الغشاسة وصعبان عليَّ بلدي يتعمل فيها كده من ولادها الغشاشين .. بينما هناك رجال من الشرطة والجيش كل يوم بتموت عشانها .. والحاجة التانية بقى اللي عاوزة أقولها .. هي أن الغش ده ظهر في مصر في أوائل السبغينيات وفي الفترة دي بالذات سمح السادات للإخوان والسلفيين في الظهور على الساحة وممارسة دورهم قال إيه الديني وانتشروا في القرى والنجوع في بحري وفي الصعيد ثم في المدن .. وكانت النتيجة أنهم اهتموا باللحية والجلباب القصير اللي تحته بنطلون قصير بردوو وبنطلون الخروج القصير بردوو والشبشب أبو صباع والحجاب والخمار والنقاب والنكاح والمرأة .. لكن إيه هي النتيجة بقى في سلوكيات الأهالي وأولادهم بعد ده كله .. النتيجة أنك بتلاقي في لجان الاختبارات أبو لحية بيغش واللي لابس بنطلون قصير بيغش واللي لابس جلابية قصيرة بيفش واللي لابس شبشب بصباع بيغش واللي لابسة حجاب بتغش واللي لابسة خمار بتغش واللي لابسة نقاب بتغش واللي بشعر بتغش والمسيحي بتغش والمسلم بيغش .. للأسف الموضوع هو فعلاً محاربة الإخوان والسلفيين لشخص الرئيس السيسي الخلوق.. يعني الإخوان والسلفيين ما أصلحوش البلد ولا حاجة.. بالعكس دا هما سبب رئيسي من أسباب الازدواجية اللي احنا عايشين فيها ..وأنا مبحبش أشتم في حد .. لكني لا أتمنى أن يعود الإخوان للحكم وكلامي ده مُعلن وقلته كتير كتير كتير .. كما أنني لا أتحدث في كتاباتي عن أشخاص .. أنا أتحدث عن سلوكيات .. ولحظة من فضلك .. كفاية محاربة في بلدك .. كفاية صراع من أجل السطة .. اللي بيحب بلده بيبدأ بنفسه .. وأنا الحمد لله بابدأ بنفسي وبامنع الغش في حدود ما يسند لي من عمل .. وكلامي مقروء ومتشاف والناس اللي معايا شايفينه ويعرفوا أنني صادقة في كل حرق ..

أين الضمير

أنا مش عارفة ليه لما المصري بيشتغل بره .. حتى في الدول العربية .. اللي عمرها 30 سنة .. بيمشي جمب الحيطة .. بيمشي ع العجين ميلخبطوش .. بيمشي زي الألف.. بيمشي زي ؟؟ ومش عاوزة أأفولها صريحة يعني بس هي مفهومة .. ولما يرجع لبلده مصر تاني .. يخرَّب في مصر ويهين مصر بسلوكيات رديئة زي سلوك الغش والتغشيش في الامتحانات .. وهو هو نفس الشخص اللي كان هناك ميقدرش يغش ولا يغشش وميقدرش يفتح بقه بكلمة .. هنا صوت عالي وجعجعة ولعب بالبيضة والحجر وفهلوة وتحايل على القوانين وعدم احترام النظام وسرقة وقلة أدب وسفالة واستظراف وغش غش غش .. أنا مش عارفة إحنا ليه كده .. هو احنا مش بنقول أن احنا ولاد حضارة 7 ألاف سنة .. هو احنا مش من نسل حواء وآدم .. هو احنا مش من نسل سيدنا إبراهيم .. ولا احنا كان لنا جد مختلف فيه كل الصفات الرديئة دي .. وعشان العرق بيمد لسابع جد ..بقينا كده .. غشاشين غشاشين غشاشين .. الله ينتقم من كل فاسد مفسد ..بيفسد في مصر.. من أبناء مصر العاقين .. ربنا ينتقم منكم يا حرامية يا غشاشين .. عمالين نهني بعض برمضان وفانوس طالع وفانوس نازل .. واحنا غشاشين غشاشين غشاشين.. ويقولك السيسي ..هو السيسي حيوزع حبوب الضمير وعدم الغش على الناس ..عشان يبقى عندكم ضمير وتبطلوا عش .. يا غشاشين ..

الغش في الثانوية العامة مع بداية شهر رمضان .. منتهى الازدواجية ..

مش عارفة أاقول إيه .. بكرة الإثنين أول رمضان 1437هـ/2016مـ.. والنهارده الأحد 5 / 6 / 2016مـ كان أول يوم امتحان في الثانوية العامة .. وينضح أن امتحان اللغة العربية تم تسريبه من أمس السبت 4 / 6 / 2916مـ الساعة 8 مساءً.. وامتحان الدين أيضاً تم تسريبه وقد تم إلغائه وسيعاد يوم 29 / 6 /2015مـ والطلاب كان معاهم ورقة الامتحان وهم على باب اللجنة قبل ما يبدأ الامتحان .. منتهى الازدواجية .. وكمان نسمغ أن صاحب الموقع اللي بيسرب الامتحانات بيقول : أنا حاستمر في كده لغاية ما تتصلح العملية التعليمية ويتصلح وضع المعلم ويكون فيه هناك اختبار قدرات للطلاب ووو.... إلخ الكلام .. حاجة غريبة أوي ..وهو التسريب ده وهي الطريقة دي هي اللي حتحل مشاكل التعليم في مصر ؟!.. وشهود العيان من طلاب الثانوية العامة من العيلة والجيران وفي الشارع وفي المواصلات بيتكلموا عن الغش في الامتحانات والهرجلة والصوت العالي للمراقبين والملاحظين واللجان اللي الغش فيها للركب .. وشهود العيان من المراقبين والملاحظين من العيلة ومن الأقارب والجيران ومن الشارع ومن الأصدقاء في بعض المحافظات ومنها على سبيل المثال محافظة الدقهلية .. بيقولوا أن الأهالي هناك راكبين عربيات وعليها ميكرفونات وبيغششوا اللجان بمكبرات الصوت .. وسبق وقلت لحضراتكم أننا عندما أردنا عمل حملة لمحاربة الغش واتصلنا بالأمهات لقينا أن الأمهات أنفسهم عاوزين ولادهم تغش .. شيء مؤسف وبجد مش عارفة أقول إيه .. بأمانة فعلاً مصر بتتعرض لمؤامرة أكيد ومن زمان .. وأكبر مؤامرة هي من أهلها وناسها اللي عايشين فيها .. اللي بيغشوها وبيغشوا نفسهم .. اللي بيدمروها عن طريق تدمير التعليم فيها .. ومحدش يقولي أن ده بيحصل دلوقتي بس .. لأ دا كان بيحصل منذ أوائل السبعينيات .. واستمر من وقتها لغاية دلوقتي .. خسارة يا بلدي .. أن ولادك هم اللي بيدمروكي بعدم الضمير وبالغش في كل شيء وأخطر هذه الأشياء هو التعليم .. إن سلوك الغش والمؤامرة في الداخل هو السلوك السائد في مصر.. ولا خلاص لهذه البلد ..إلا القانون والحزم والصرامة في تطبيقه وبدون ايادي مرتعشة بعد أن ننظف سلوكياتنا بأيدينا .. يا خسارة يا مصر .. أنا من تجربتي الشخصية باقدر أمنع الغش في اللجنة اللي باكون فيها على قدر الطاقة وأستطيع القول أنني أمنعه بنسبة قد تصل إلى مائة في المائة وحتى لو نجحت في منعه بنسبة 80 % يبقى رائع .. لكن غيري ما بيعملش كده وعايز المناخ كله يكون غش في غش وبنتكلم عن الدين وما الدين .. منتهى الازدواجية .. يعني كل واحد لو عاوز يبقى عنده ضمير ويمنع الغش حيكون عنده ضمير وحيقدر يمنع الغش .. أنا مذهولة من عدم حبنا لبلدنا لهذه الدرجة ..أنا حزينة أننا وصلنا لهذا المستوى المتدني في أخلاقياتنا .. أنا مذهولة من الازدواجية اللي احنا عايشين فيها .. عمالين نهني نفسنا وبعضنا برمضان واحنا غشاشين وبننشر الغش في كل سنتيمتر في مصر ..

من أرشيف المحبة في الله ولله ومن أجل الله ..


من أرشيف المحبة في الله ولله ومن أجل الله .. ساعات كده بتحصل حاجات وقتية .. تخليك تفتكر ذكريات مؤلمة .. وفي نفس الوقت بتفتكر معاها لحظات نصر من الله سبحانه وتعالى .. بالرغم من معاناة شاقة شفتها في حياتك .. فـ بتسترجعها والدموع في عينيك .. وتقوم تجمعك اللحظات دي بأخوات لهم مني كل الحب والاحترام والتقدير .. مع حبيباتي .. الأساتذة الفضليات .. دكتورة هويدا قشلان ودكتورة سوسان ودكتورة نجوى محروس .. واحنا كنا في حفل تكريم بمناسبة حصولنا على الدكتوراة .. كل سنة وحضراتكم إخواتي وحبيباتي في الله ولله ومن أجل الله ..

هي دي الوطنية .. الله يرحمكم ..


عيب والله ..............

اللي حصل من لخبطة في إذاعة حديث رئيس الجمهورية اليوم على تليفزيون مصر الحكومي والإتيان بالجزء الثاني قبل الجزء الأول .. يعني نفس مسلسل الفوضى والإهمال وتكرار الأخطاء اللي ماشي في الدولة .. عيب والله .. وصدقوني الفوضى دي وتكرار الأخطاء ده موجود في كل مؤسسة حكومية .. ولما باقول كده الناس بتزعل مني ..وتقولي إنت بتتكلمي في السلبيات .. يا ناس صدقوني .. العشوائية والتخبط وعدم التخطيط ده .. هو إسلوب حياة في مصر الآن .. وبعدين أديكوا شوفتوا .. بيعملوها مع رمز الدولة ورئيسها والقامة الكبيرة فيها .. صدقوني العيار فلت خلاص ..ولابد من لتباع سياسة الثواب والعقاب وتطبيق فعلي للقانون في كل شيء .. ومحدش يقولي إخوان ولا غيره .. ده إهمال وفوضى وعشوائية وعدم اكتراث عاوز حزم وصرامة وقانون .. عيب والله ..

لما ما تغشش .. يبقى إنت بتحب بلدك ..

لما ما تغشش في الامتحانات يبقى انت بتحب بلدك .. لما ما تغشش في الأكل يبقى انت بتحب بلدك .. لما ما تغشش في الأدوية يبقى انت بتحب بلدك.. لما تعمل شغلك بضمير مهما كانت شغلتك يبقى انت بتحب بلدك .. لما ما تغشش في كل حاجة وأي حاجة تضر أهلك و ناسك يبقى انت بتحب بلدك .. لما تشتغل في بلد عربي وتكون سفير لبلدك هناك إلتزاماً و خلقاً وعلماً يبقى انت بتحب بلدك.. لما يكون وطنك أمانة في رقبتك تحافظ عليها يبقى انت بتحب بلدك .. لما يبقى ضميرك هو وطنك يبقى انت بتحب بلدك .. هو ده فعلاً حبك لوطنك .. أفعال وليست أقوال .. ومش مجرد شعارات وحكم ومواعظ على الفيس ويس ..

الفراخ عند التنجار المصريين .. فيها حاجة بتجيب إسهال ومغص .. أغيثونا ..

هم التجار المصريين الجشعين دووول .. عاوزين يعملزا فينا إيه أكتر من كده .. الفراخ وغلوها .. وكل حاجة غلوها .. لكن الجديد بقى .. أننا كل ما نآكل حتة فرخة مسلوقة والله مسلوقة ببصلة وشوية ملح وفلفل اسمر بس وفيها لسان عصفور بس .. يقوم يجيلنا إسهال ومغص وتبقى ليلة مش باين ليها نهار .. يكنش بيحطو لنا فيها سم مع الهرمونات اللي بيحقنوا بيها الفراخ عشان يخلصوا مننا .. طيب لو خلصوا مننا .. مين بقى حيشتري الفراح بتاعتهم .. أنا مقاطعة اللحمة .. طيب أأقاطع الفراخ كمان .. طب ح نآكل إيه بقى .. ربنا ينتقم منهم .. آمين .. وحسبنا الله ونعم الوكيل في أبشع تاجر على مستوى العالم اللي هو التاجر المصري.. هو فيه حد بيحصلوا كده زينا كل ما نآكل حتة فرخة والا احنا اللي محظوظين بس بالراجل بتاع الفراخ اللي تحتنا ..
..

مبارك علينا شهر الخير والبركة إن شاء الله ..

مبارك علينا  شهر الخير والبركة ..إن شاء الله ..
===============================
عن أبي هريرة رضي الله عنه .. أن رسول الله صلى الله عليه وسلم قال: "إذا كان أول ليلة من رمضان صفدت الشياطين ومردة الجن، وغلقت أبواب النار فلم يفتح منها باب، وفتحت أبواب الجنة فلم يغلق منها باب، وينادي منادٍ: يا باغي الخير أقبل، ويا باغي الشر أقصر، ولله عتقاء من النار، وذلك كل ليلة". ويا رب يكون رمضان فاتحة خير و الشياطين تبعد عن التلاميذ وما تغشش في امتحانات الثانوية العامة بقى .. وزي دلوقتي كده حنكون بنحضر للسحور بإذن الله ..
كل عام و حضراتكم بكل خير

( كلمتين بالبلدي ).. طبيب المخ والأعصاب .. وتعب الأعصاب ..

(كلمتين بالبلدي ): طبيب المخ والأعصاب .. وتعب الأعصاب
==================================
بالصدفة البحتة شاهدت برومو لبرنامج على قناة النهار اليوم .. هذا البرنامج يلتقي علماء مصر في الخارج في مختلف التخصصات ومنهم الأطباء .. وحضراتكم تعلمون أن مُعِّدي البرنامج والمخرج يختارون مقتطفات لإذاعتها في هذا البرومو كعامل مساعد على انتشار البرنامج وتوضيح مدى أهميته .. ما لفت نظري في هذا البرومو .. أن أحد الأطباء المصريين الذين يعملون بالخارج .. قال .. لو مصر .. عاوزاني .. تآخد رقبتي .. إلى هذا الحد .. والموضوع عادي .. لكن في اللقطة الثانية لهذا الطبيب .. موجهاً حديثه للمحاور ..قال : إنت بتكلم دكتور مخ وأعصاب مش بتكلم " منجد" .. بمنتهى الأمانة .. كلام هذا الطبيب استفزني .. وجعلني أكلم نفسي وأنا أصرخ وكأن هذا الطبيب أمامي فـ أقول : كان من الأولى يا سعادة طبيب المخ والأعصاب الهمام .. أن تقول المقطع الأول من كلامك .. ولا تقول المقطع الأخير منه .. ولا داعي للإقلال من شأن "المنحد " .. ألا تعرف يا طبيب المخ والأعصاب .. أنه إذا شعر إنسان بالدونية في حالة سماعه تشبيه سعادتك هذا .. فإن لذلك تأثير سئ على خلايا المخ نتيجة ما يُصاب به من حُزن .. وهذا يؤدي إلى تعب أعصابه يا طبيب المخ والأعصاب .. ألا تعلم يا سعادة طبيب المخ والأعصاب .. أن هذا "المنجد" .. أنت في حاجة إليه .. فهو من صنع لك " تنجيد" الـ كنبة التي تجلس عليها الآن وأنت مسترخي وتتباهى بنفسك وبتخصصك .. وهو الذي صنع لك " مراتب" السرير الذي تنام عليه لأخذ قسطاً من الراحة لكي تنتعش ذاكرتك و ترتاح أعصابك يا طبيب المخ والأعصاب .. ثم من الممكن أن يكون هذا الـ " منجد" أكثر إتقاناً لعمله وأكثر إخلاصاً وأكثر رحمة .. من طبيب مخ وأعصاب يأخذ من مهنته الطبية تجارة للربح المادي ..خاصة في هذا العصر الذي تحول فيه الطب إلى تجارة .. ومن الممكن أن هذا "المنجد" .. لم يذهب بعيداً عن مصر وطنه الأم و استقرفيها وظل بها لكي يخدم أبناء بلده .. بينما سعادتك ذهبت لبلاد الـ " فرنجة " لكي تخدم أبناءهم هناك ولا تستقر في وطنك لكي تخدم أبناء بلدك .. ألا تعلم أن مثل هذه الثقافة التي تحدثت بها سعادتك .. وتعاليت بها على صاحب مهنة لإنسان أراد له الله أن يمتهنها من أجل خدمة البشرية .. هي فعلاً سرِّ تخلفنا كـ أمة .. وسأقول لسعادتك مثالاً عايشته أنا بنفسي ..على طبيب مخ وأعصاب ..كان يأخذ من مهنته مجرد عملية تجارية وفقط .. و المثال هو .. كانت والدتي الله يشفيها .. بـ تتعالج عند طبيب مخ وأعصاب مشهور جداً في القاهرة بل كان طبيب مصر الأول في هذا التخصص حينئذٍ " الله يرحمه " بقى .. كان هذا الطبيب يقوم بـ " رص" المرضى في حجرة بعيدة عن حجرته التي يجلس فيها ليستقبل فيها من يشاء .. على حساب المرضى من عامة الشعب .. مع أن هؤلاء العامة هم سبب ثروته نتيجة الـ " هبش" اللي بـ " يهبشه " منهم .. ثم يأتي يمر عليهم كما لو أنه مفتش في الإتوبيس .. ويسأل كل مربض أو مريضة سؤال في ثانية .. ثم يكتب الدواء بسرعة البرق .. ويذهب لغرفته التي فيها شخصية مرموقة آنذاك وحولها علامات استفهام .. ولا داعي لذكر أكثر من ذلك لأن أخلاقياتي تمنعني .. وكل القصص معروفة في مصر .. وعلى فكرة في هذا الموقف بالذات .. لي أخ شقيق حُر الأخلاقيات والمبادئ يعمل طبيباً بيطرياً .. قام بفضح أمره في هذا اليوم أمام كل المرضى .. ولم نعد نذهب إليه بعد ذلك .. مع ملاحظة أنه في كثير من المرات كان يُرسل طبيباً مبتدئاً للكشف على المرضى بينما يتفرغ هو لزيارات مكتبه الخاص المشبوهة وجمع الفلوس .. يا سعادة طبيب المخ والأعصاب .. إذا كانت هذه هي نظرة سعادتك لأصحاب المهن الآخرى .. فـ فعلاً .. لك الله يا مصر .. ولو أنا صاحبة قرار .. سأقول لسعادتك .. شكراً .. على تقديم عرضك لخدمة مصر..وخليك في بلاد الـ " فرنجة " .. فلا تأتي .. لأن احتمال هذا المنجد البسيط يأتي لكي يقوم بالعلاج عندك .. فبالطبع ستتعامل معه بتعالي .. وربما لاتأخذ بالك أنت بـ تصرف له أي نوع من الدواء .. ما هو " منجد" .. بقى !!!!
--------------------------

د. شهيرة عبد الهادي