وبييجي اصحاب
مفتوح الباب
قدام الرايح قبل الجاي !!
أعمل لك شاي ؟؟؟
ونحكّي شوية ف كام موضوع
شكلك موجوع ....
وعينيك بتقول
حكايات ياما
عن غدر في توب روحك منقوع
سابقاك كده ليه دمعة عينك ؟!
الله يعينك.....
والله أنا زيك وزيادة
وجعوني الناس....!!
والدمعة الناخرة في إحساسي
أكبر من أي كلام اتقال
إنما بنمشّي الحال ونعيش
وما فيش في الإيد
غير ضحكة خجولة بصوت باهت
اضحكها فتضحك ع الدمعات
فاعزف من ضحكي الساهي آهات
واعرف من روح الدمع حاجات
تفرق لي الرايح م الجي
بتجوز الرحمة على الحي
فالله يرحمنا ويرحمهم
ويبشبش طوبة أحلامهم
الفايتة وجعهم ف ايامك
فيه إيه ..... مالك ؟؟؟
وجعك رغّاي ؟!!
استنى .....
هاعلّق ع الشاي !!!
معرفش إزاي الناس ممكن
في ثواني تهون
فتخون عادي !!!
وكأن العادي إنك تتخان
يخرج وجعك برّاك فتبان
مقسوم من برّه ومن جوّه
والهوة سحيقة ما بين اتنين
إنتَ و إنتَ !!!
و لا واحد فيكم يشبه لك
وإن شُفت ملامحك في مرايتك
مابتعرفهاش
فتلف جروح العمر بشاش
منسوج من حزنك على روحك
برّاك متعايش مع شكلك !!
جوّاك ........
فيه لمّة و زفّة و حَضرة و زار
فتتوه من نفسك في الزحمة
و تتوه من رجلك خطاويها
فيضيع العمر في مشوار !!!
مستعجل ليه ؟؟!!!
الشاي ع النار .....!!
::
منى حواس
من وحي اللحظة
#الشاي_ع_النار
- Intro
- Works at ERTU (Egyptian Radio & TV Union)
- Lives in Cairo, Egypt
ليست هناك تعليقات:
إرسال تعليق