زى اليمام
هديله بينقَّر فى قلبى
و بيشرب التنهيدة زى الندا
و يحلى بيها القهوة و الأحلام
يا بنت ليه
قلبك سلام
بيطرى روحى و فرشتى و غطاى
و ضحكتى اليابسة
و كأنى مت و صاحى فى الجنة
باشرب معاكى الشاى
و الناى
بيعزفنا على الطرقات ملكين
و كأننا للناسكين
ملابس الإحرام
عمرى ما باكتب غير على قلبى
فمافيشى حاجة تمسح المكتوب
و انا فى الهوى مغلوب
و جناحى ليه مقلوب
يطير لحد السما
لكن البلاد الضنا
بتحدفه بالطوب
....................................
و دمعتين نزلوا على حرفين
متشبكين على وش القصيدة
ما اعرفش فين سرهم
و لا طريقهم فين
حاميين قوى كالشعر
خاطفينى من بحرهم
إهدى يا شاعر بقى
و امسك كتابك صح
معكوسة صورتك زى صوت أخرس
و عنيك جزيرة مجهولة
و الشمس ماشية فى هدى العنواين
و انت اللى عنوانك هناك
ما بين غمام و غمام
فامسك كتابك صح
و اعرف بأن السر مش بيبوح
إلا لروح درويش
ليست هناك تعليقات:
إرسال تعليق