مواقف حياتية

من الشخصيات التي تسنفز أي إنسان بيفكر وعنده ضمير.. تلك الشخصية التي تدخل عليك بابتسامة من الودن دي للودن دي .. وبعدين تقوم قايلة حديث وبعدها آية قرآنية ..وضحكة للي قاعدين في اليمين وضحكة للي قاعدين في الشمال .. وبومبناية لده وبسكوتاية لدي ..وهي داخلة تقول السلام عليكم ورحمة الله وبركاته وهي خارجة تقول السلام عليكم ورحمة الله وبركاته .. وطول ما هي قاعدة بتتكلم عن الدين .. وتعالى دور بقى على شغلها .. مفيش مفيش مفيش .. النوم في العسل .. وكل شوية عذر عشان تسيب الشغل وتمشي .. وهي أصلاً بتيجي متأخرة عن ميعاد شغلها بالساعات .. والمصيبة السودة إنك تلاقيها أول شخصية جاية من بدري جداً ساعة القبض وأول شخصية بتعمل الاستمارة .. و المصيبة السودا التانية أن هي وهي خارجة وبتقول ليك وللي معاك السلام عليكم ورحمة الله وبركاته يا إخواني ويا أخواتي ويا حبايبي ويا حبيباتي .. تخرج من عندك و بتروح تدي فيك إسفين وبمبة و مهموز وكل الأسماء اللي في الدنيا لهذا العمل السيء عند رؤسائك .. بعد ما تكون قد أنهكتك في الرد على السلام عليكم ورحمة الله وبركاته بتاعتها ..وكأن الواحد قاعد في شغله والمفروض يسيبه ويرد عليها السلامات بتاعتها وبس ..أهي الشخصية القميئة دي اللي موجودة في كل شبر في مصر .. لو تبطل نفافها ده وحقدها ده وتشتغل شغلها بما يُرضي الله ويكون عندها ضمير في شغلها ..جايز حالنا يتعدل شوية .. روحي يا آدي الشخصبة منك لله ..