الله يرحمك يا بابا
اليوم الجمعة 14 / 8 / 2015م .. الذكرى السنوية لوفاة بابا الله يرحمه ..
الصورة دي قبل وفاته .. في عيد ميلاد آخر حفيداته أثناء حياته وعمره ..
بابا طول حياته مدَّخلش مليم واحد حرام على أهل بيته مع أنه كان في مكان
عمل يسمح بالنهب واللهط .. بابا كان فقير الفلوس لكنه كان من أغنى وأنزه
النفوس .. بابا عاش فقير الفلوس ومات فقير الفلوس لأنه كان أنزه الأيادي
والنفوس.. بابا ربى ولاده م الحلال الصافي المصفي .. وكلهم الحمد لله
وبفضل من الله ثم بفضل تربية بابا الحلال أعضاء هيئة تدريس وأساتذة
في الجامعات ومراكز البحوث وأطباء ومهندسين ومحاسبين وأحفاده كذلك والحمد
لله .. بابا كان نزيه عمره ماخرج بره ورجع بيته إلا وهو شايل لأولاده من
خيرات الله وميحرمهمش من أي حاجة في أي مناسبة على قدر طاقته .. وكان يلبس
أحلى لبس ويآكل أحلى أكل ويقعدنا في أشيك الأماكن على قد ما ربنا يوسعها
عليه .. ومكنش له غير بيته وأهل بيته .. بابا كان قارئ جيد ومُحلل جيد
للأحداث.. بابا مكنش يتكلم في أي مجلس إلا في الكورة والسياسة وملوش في
الغيبة والنميمة والكلام الفاضي.. بابا كان صريح واضح شفاف وقليل الحيلة
طيب اللي في قلبه على لسانه .. ميضحكش على حد .. ميغشش حد ..مينامش لو عليه
قرش لحد .. أمين في الكلمة و المعلومة والمعاملة .. بابا مكنش يعرف يخاصم
حد حتى اللي بـ يؤذيه .. كان بينسى الأسية بسرعة .. بابا كان أقصاها يقعد
على قهوة يشرب فنجان قهوة وسيجارة مع صديق واحد ويرجع بيته شايل بردو ومحمل
.. وكان يقول لنا .. إنتوا عماراتي إنتوا فداديني إنتوا راس مالي .. يوم
وفاته أولاده وكل اللي يعرفوه كانوا بيقولوا : هو حيتحاسب على إيه ؟ هو عمل
إيه عشان يتحاسب عليه ؟.. دلوقتي أنا بافتكر حاجات كتير كنت باعارض بابا
فيها لكني اكتشفت أنه كان صح جداً فيها وكل يوم باكتشف إنه كان صح في حاجات
كتير .. الله يرحمك يا بابا ويحسن إليك .. الله يرحمك .. أطلب من أحبائي
في الله الدعاء لبابا بالرحمة وقراءة الفاتحة له .. الدعاء لبابا
ليست هناك تعليقات:
إرسال تعليق