مما أعجبني ...........

**من تعليقات الدكتور حسن عبد العليم التي أعجبتني ..
1-الحياة كلها ألم...ألم يشفيه أمل....أمل يصنعه عمل....عمل ينهيه أجل....وبعد ذلك سيحاسب كل امرىء بما عمل...
2-من يغلق عينيه دون النور يضر عينيه ولا يضر النور...وكذا...من يغلق قلبه دون الحق ...يضر قلبه ولا يضر الحق....وقد يكون التلوث ضرورة لمعرفة الحق....وجمال الكون...والجمال صفة من صفات الكمال...والكمال صفة من صفات الخالق عز وجل...

مَطلبنا المُلِّح من رئيس مصر ... بقلم د.شهيرة عبد الهادي

سعيدة جداً .. كل يوم .. تخريج .. دفعة جديدة من أسود مصر ونسور مصر.. من الجيش والشرطة والفنية العسكرية .. الدعائم القوية للدولة المصرية .. بقيادة .. سعادة الرئيس الخلوق .. الرئيس السيسي .. إلى الأمام يا رئيسنا .. مطلبنا المُلِّح .. هو .. منظومة أخلاقية تتناسب مع حجم مصر .. يتم تدريسها وتعليمها وتعلّمها من الروضة وحتى الجامعة وما بعد الجامعة .. وتتناسب مع خُلق رئيسها الخلوق .. الله يعين حضرتك .. على ما في مصر من مشكلات ..
-----------------------------
د.شهيرة عبد الهادي

( مواقف حياتية ) من الواقع المؤلم ... بقلم د.شهيرة عبد الهادي

من الواقع المؤلم ........
كلما دخلت في مناقشة مع مجموعة من المصريين والمصريات حول القيام بأي عمل جماعي .. في أي مكان .. تضطرني مجالات الحياة التواجد فيه والتعايش مع مشكلاته التي نريد حلها .. أجدني أعيش في دوامة من التوهان .. ومعرفش الحقيقة فين.. يا الله .. كل واحد بكلمة .. وكل واحد بيتكلم على التاني .. وكل واحد بيتهم التاني باتهامات مُعينة .. وعند مواجهة الكل بالكل .. الكل ينكر كل اللي قاله .. وكل واحد عنده أساليب للتحايل غير عادية .. مش ممكن بجد .. فعلاً دلوقتي .. الدين والقيم والمباديء في ناحية وسلوكيات البشر في ناحية تانية خالص .. والسلوكيات كلها أصبحت سلوكيات القاع .. والناس أصبحت جشعة وفلسفتها خد المكسب واجري خد الفلوس واجري إضحك على جارك واجري إضحك على زميلك واجري .. المهم تآخد أي حاجة وتجري .. عيب والله .. بأمانة .. أنا حزينة .. أنا ساعات باحس إني كما لو أني لم أعش في هذا المجتمع .. وأنه كان المفروض أعيش في الشارع ليل نهار ..عشان أعرف أساليب اللوع واللف والدوران دي وعدم الأمانة وعدم الأريحية دي .. اللهم نجيني يا رب من هذا المناخ السيء .. يبدوا أن بعض من جيلنا اللي اتربى تربية مُثل وقيم الكُتب .. ملوش عيشة في الحياة دي ..أنا مش ملاك ولا حاجة .. أنا إنسانة عادية لي ما لي وعليَّ ما عليَّ .. لكن فعلاً .. يبدو كده والله أعلم .. أن مليش عيشة في الحياة دي ..
------------------------------
د.شهيرة عبد الهادي

الصباح بك له زفيرٌ عَطِر .. يجعل لحظات القيظ زخاتٌ من مطر .. بقلم د.شهيرة عبد الهادي

الصباح بك له زفيرٌ عَطِر ..
يجعل لحظات القيظ زخاتٌ من مطر ..

مكنتش اعرف أن للحقارة درجات ... بقلم د.شهيرة عبد الهادي

مكنتش اعرف أن للحقارة درجات ..
درجة وصل بيها الحقير وبقى من البشوات ..
درجة وصل بيها الحقير وبقى من البهوات ..
درجة وصل بيها الحقير وأخد كل الترقيات ..
درجة ارتفع فيها الحقير..
على أكتاف الأحياء و الأموات ..
أما الحقير السوبر ..
فقد عدَّى على كل قيم ومباديء الشرف ..
وداسها بالجزم ..
ووصل لأعلى الدرجات ..
بس ولو .. أكيد بينه وبين نفسه ..
عارف أنه حقير .. وكيف وصل ..
ولا في يوم حيكون من بني آدم ..
ولاحتى من بني الحيوانات ..
وعجبي ..
-----------------------------
د.شهيرة عبد الهادي
‪#‎Drshahera_Abd_Elhady_Ibrahem‬

إغمضي عينيك يا جميلتي .. بقلم د.شهيرة عبد الهادي

إغمضي عينيك يا جميلتي ..
حتى لا تري عالمهم المُزيف ..
إغمضي عينيك الرقيقتين ..
حتى لا تلوثي براءتك ..
بغبار أنفاسهم الشقية ..
إغمضي عينيك الحالمتين ..
حتى لا تعيشي ..
كابوس واقعهم السيء المرير ..
إغمضي عينيك يا جميلتي ..
فـ لم يعد هناك صدق..
لم يعد هناك ود ..
لم يعد هناك حُب ..
فـ قد حُجزت كل الأماكن لهم ..
لنفاقهم .. لخداعهم .. لكذبهم ..
إغمضي عينيك يا نقية..
واتركي لهم حياتهم الغبية ..
لا تندمي ..
وستظلين الوردة الجميلة الندية ..
وستظلين الطفلة البريئة النقية ..
إغمضي عينيك يا جميلتي ..
--------------------------------
د.شهيرة عبد الهادي
‪#‎Drshahera_Abd_Elhady_Ibrahem‬

ومع كل فجر يتجدد الأمل .. اللهم ارزقنا الأمان النفسي .. اللهم ارزقنا الأمل والإرادة للشفاء من كل ألم نفسي وجسدي ..

ومع  كل فجر يتجدد الأمل ..
اللهم ارزقنا الأمان النفسي ..
اللهم ارزقنا الأمل والإرادة للشفاء من كل ألم نفسي وجسدي ..

طاقة النور .. التي ستضيء طريقك .. التي عرقلتها .. نفوس بشرية .. مليئة بالخداع والسواد .. لن تأتي .. إلا من عند الواحد الأحد الفرد الصمد .. بس .. قول .. يا رب ..

طاقة النور .. التي ستضيء طريقك .. التي عرقلتها .. نفوس بشرية .. مليئة بالخداع والسواد .. لن تأتي .. إلا من عند الواحد الأحد الفرد الصمد .. بس .. قول .. يا رب ..

مبروك يا مصريين و #تحيا_مصر_ #مصر_بتفرح_... بقلم د.شهيرة عبد الهادي

اليوم الذكرى الـ 59 لتأميم قناة السويس .. لتعود إلى المصريين شركة مساهمة مصرية في 26 يوليو 1956م .. وبعد 11 يوم سيتم افتتاح التوسعة الجديدة لقناة السويس في 6 / 8 / 2015م .. قناة السويس ساهم في بنائها مليون مصري وأُستشهد في حفرها أكثر من 120.000 مصري من أبناء شعب مصر ..عندما بدأ العمل فيها بطول 193كم في عام 1859م أيام ديلسبس والخديوي سعيد .. والآن توسعة قناة السويس والتي بدأ العمل فيها في 5 أغسطس 2014م .. وهي توسعة في قناة موازية لقناة السويس بطول 72كم.. وقد جمع لها المصريون من شعب مصر 64 مليار جنيه مصري في إسبوع واحد فقط من نفس العام وأيضاً تم حفرها بسواعد أبناء مصر وبإصرارهم وعزبمتهم وإرادتهم شهباً وجيشاً .. قناة السويس مصرية وستظل مصرية .. قناة السويس هدية من شعب مصر إلى شعب مصر ثم إلى العالم أجمع .. نتمنى أن تنعكس كل خيراتها على رفع مستوى الفرد المصري العظيم .. عاشت مصر حرة أبية .. عاش شعب مصر الجميل الصبور المكافح .. عاشت ذكرى جمال عبد الناصر خالدة في قلوب المصريين .. سخر الله عبد الفتاح السيسي وعاش لخدمة شعب مصر.. عاش جيش مصر لحماية وخدمة المصريين .. مبروك يا مصريين .. ‫#‏تحيا_مصر_‬ ‫#‏مصر_بتفرح_‬

الطبيب وحرب اكتوبر 1973م .. بقلم د.شهيرة عبد الهادي

في برنامج  الدكتور .. على القاهرة والناس.. النهاردة  السبت 25 / 7 / 2015م .. جاء  طبيب متخصص في أحد أمراض النساء والولادة .. وهو يعمل في مستشفى كبير معروف  بمصر ..وسوف يؤسس  أكبر مستشفى لعلاج هذا المرض في الشرق الأوسط  في مصر كما قيل  .. وهذا شيء جميل في حد ذاته  ونشجعه عليه  ونتمناه .. وكان لابس الساعة في إيده اليمين .. طبعاً دي حرية شخصية  وأحترمها   وممكن يكون لها أسبابها .. لكن أنا باوصف بس .. مع احترامي  لشخصه الكريم .. وعموماً هو طبيب دائم الاستضافة في هذا البرنامج .. لكن ما لفت نظري في هذا اللقاء  .. أنه  .. قال  لمذيع البرنامج بالاتفاق بينهما طبعاً  ما يلي : حرب اكتوبر1973م كانت الساعة 2 ظهرا ..وانت برنامجك الساعة 2 .. وزي ما مصر أعلنت الحرب  على عدونا الأوحد إسرائيل في الميعاد ده وحطمت خط بارليف  وانتصرت.. أنا باعلن من عندك في نفس الميعاد  الحرب على المرض ده .. وتعالى نشوف مع بعض الفيديو اللي بيوضح الحرب على المرض .. وعرض الفيديو بالترتيب الآتي .. يجيب لقطة من الاستعدادات لحرب اكتوبر  ثم لقطة من استعداداته  في حجرة العمليات .. ثم لقطة من المعدات للجيش المصري  في حرب اكتوبر ثم لقطة لمعداته  اللي حيستخدمها في حجرة العمليات .. ثم  لقطة  لخط بارليف وخراطيم المياه  وهي بتحطم خط بارليف ولقطه له وهو بيستخدم ما يشبه خراطيم المياه أثناء إجراء العملية  لتحطيم المرض.. ثم لقطة  للهزيمة في بعض المراحل  في حرب اكتوبر  ولقطة لهزيمته  في حجرة العمليات وازاي تغلب عليها .. وهكذا   لقطات كثيرة جداً جداً لحرب اكتوبر  ولقطات  لحضرته وهو في حجرة العمليات ..  وفي نهاية  إجراء العملية  جاب لقطة للحظة رفع العلم على سيناء والانتصار على العدو الإسرائيلي  ثم و هو داخل حجرة العمليات مسك علم لمصر صغير كده  عبارة عن قماشة صغيرة  بإيديه الاتنين  وهو بيضحك ومبسوط ومنتصر  وبعد كده  بلحظات  مسك علمين لمصر تانيين في لقطة تالية   وهو بيضحك بردوو ومبسوط ومنتصر.. و قبل الفيديو  وبعد الفيديو .. قعد يقول أن دي هي الوطنية ..  ومفيش حد يفرق بين أبناء الشعب الواحد وكلام جميل من ده .. وكلمة من الدين على كلمة من الوطنية   على  كلمة   حوالين  اللي عملوا الانقسام بين أفراد الشعب وكده    .. وطبعا أنا أتفق مع الطبيب  الفاضل في  أن الوطنية  هي أن يتقن كل إنسان عمله .. بس بصراحة أنا حسيت أن فيه مبالغة  في اللي عمله ده  وأن فيه  استغلال بكل الطرق لظروف مصر من أجل مصالح شخصية .. يعني مشفتش مجدي يعقوب عمل كده ولا  أحمد زويل ولا مصطفى السيد ولا فاروق  الباز ولا  محمد غنيم  ووووو ..  وأنا بقى وبلغة العصر التكنولوجية  التي استخدمها  اليوم  في عرض فيديو  إجراء العملية  وربطها بحرب اكتوبر ..أنا المواطنة   المصرية  باقول لحضرته  .. الموضوع   كده  يا  دكتور  كان فيه " أفورة حبتين "  .. مع تمنياتي    بأمانة   لحضرتك  بالتوفيق  والتقدم في كل ما من شأنه  علاج المرأة المصرية والعربية والعالمية ..
-----------------------------------------------
د.شهيرة عبد الهادي
#Drshahera_Abd_Elhady_Ibrahem

شر البلية ما يُضحك ....

مش عارفة هي حكمة ولا نصيحة .. لقيتها في مواقع الإنترنت .. بتقول :

" متزعلش من المشكلة اللي انت فيها عشان المشكلة الجاية متجيش تلاقيك زعلان "
‫#‏واقع_مؤلم_مُضحك_شر_البلية_ما_يٌضحك_‬

يا صباح الامبور في كوالا لامبور .. هههههههههههه

عرفت المعلومات دي من الدكتور خالد طحان ..
إنه دجاج لامبور غيني وهو أغلى وألذ الدواجن في العالم .. هي سلالة من الدجاج الإندونيسي يتميز بلونه الأسود من الداخل والخارج كل شيء في هذا الدجاج أسود ..ريشه جلده منقاره .. لسانه .. أضافره .. وحتى لحمه وعظمه أسود .. ويصل سعر الدجاجة الواحدة أكثر من 2500 دولار .. ويلاقي إقبالاً واسعاً من قبل اللي ربنا معطيهم ..
يعني الفرخة سعرها بالجنيه المصري 20000جنيه دا بالسعر اللي في البنك ومش بسعر السوق السودة اللي لون الفرخة .. عشان نحمد ربنا ع الفرخة البيضاء اللي من عند ممدوح بتاع الفراخ أم 50 جنيه .. ولو أن اللامبور طعمه حلو .. يا خسارة .. صحيح اللي معاه قرش محيره يجيب لامبور ويطيره .. يا صباح اللامبور في كوالا لامبور .. معلش الدنيا حر هههههههه

سؤال جه على بالي ....

سؤال جه على بالي .. هي الناس قبل ثورة 25يناير 2011م .. كانت بترمي زبالتها فين ؟ .. لما الشوارع بعد الثورة .. بقت كلها عبارة عن تلال   وجبال من الزبالة ؟

أبشروا .. معدناش حنفتح الراوتر ونقفل الراوتر .. يا مسهل .. بقلم د.شهيرة عبد الهادي

وزير الاتصلات.. المهندس خالد نجم .. في برنامج .. لازم نفهم .. على CBC extra .. حلقة الأربعاء 22 / 7 / 2015م .. مع خيري رمضان .. قال : عندنا تقنية جديدة .. مش حتخلي .. إصلاح النت .. هو .. إإقفل الراوتر وافتح الراوتر .. لأ دا فيه تقنية جديدة .. وانا المواطنة شهيرة .. زهقت النهارده .. من كتر قفل وفتح الراوتر .. ومن كتر أن النت كل شوية بيروح .. ولو.. جه .. يجي بطيء جداً.. مع أني .. دافعة الاشتراك لـ Te Data يوم الثلاثاء 21 / 7 / 2015م .. يعني من 3 أيام بس واحنا لسة في أول المدة .. أدينا مستنيين التقنية الجديدة .. يا مُسهل ..

لنا الله ولا سواه ... بقلم د.شهيرة عبد الهادي

في الحياة الدُنيا دي .. التي امتلأت فيها القلوب بالسواد والأنانية المفرطة حتى بين أفراد الأسرة الواحدة .. ولا حد حينفعك .. إلا نفسك .. ولا حد حيحل مشاكلك .. إلا أنت ..  ولا حد حيقف جمبك .. إلا  أنت  ..  ولا حد حيخرجك من الكآبة والاكتئاب اللي انت فيه بسبب تصرفاتهم وأقوالهم وأفعالهم .. إلا أنت .. ليست دعوة لمزيد من الأنانية .. وإنما .. تبصرة .. بأن تطلب العون والتوفيق من الله سبحانه وتعالى .. على أن تفهم .. تُبصر ..تتعلم من أخطائك .. تشد من عضد نفسك .. تُحبها .. تحترمها .. تقدرها.. تعطيها الثقة .. تمنحها القوة .. لعلك تستطيع .. ولعل كل ذي قلب طيب يستطيع .. لنا الله .. ولا سواه ..

الصندل والقطار والإهمال والسلوكيات الضلال ... بقلم د.شهيرة عبد الهادي ..

بعد أن قرأت عن حادثة صندل الورَّاق .. وعلمت .. حجم الإهمال والسلوكيات الرديئة لقطاع عريض من المصريين .. وعدم وجود رقابة صارمة وقوانين صارمة تطبق على الأمير قبل الغفير .. تذكرت مأسآتي مع .. قطار المنصورة - الإسكندرية ..وهو الميعاد الوحيد  المباشر  للإسكندرية  .. الذي يقوم الساعة 5.25 دقيقة فجراً من المنصورة متوجها إلى الإسكندرية .. والتي عايشتها بنفسي .. أثناء رحلة عودتي للإسكندرية يوم الثلاثاء 21 / 7 / 2015م ..لكي  أستطيع مزاولة عملي بالكلية  في الصباح الباكر ..  فقد حدث الآتي ..مُنذ وصولي  وأخي للمحطة.. ومعرفة أن القطار على رصيف 2.. ذهبت وأخي إلى رصيف 2.. وجدتنا  نشم رائحة كريهة جداً  لا تُحتمل .. ثم وجدنا القطار يقف على مسافة  بعيدة من الرصيف .. وعالي جداً جداً .. على كل إنسان مثلي ..يعاني من حادث قديم في إحدى قدميه أو خشونة في الركبة أو شلل أو أعاقة  أو أو أو .. وبالمناسبة  رُكاب كُثر  كانوا  من هذه الفئة  .. ولأننا مُلتزمين   بقدر الإمكان .. فقد  ذهبت  وأخي ..قبل ميعاد القطار بكثير  .. نحاول أن نقرأ على العربات ما يدل على  أرقامها .. فلا نجد شيئاً .. بالمناسبة  هذا القطار هو عبارة عن .. درجة ثالثة ثم درجة ثانية مميزة ثم درجة ثانية مكيفة    فقط   .. _   فاكرين "العيش المميز" _.. ولا توجد أي إشارات .. سوى على عربات الثانية مكيفة .. مكتوب عليها .. ثانية مكيفة  فقط .. بدون رقم .. وانت بقى وشطارتك  ..  دّور لغاية ما تلاقي عربيتك .. ولأن تذكرتي كانت في العربة رقم 3 .. فتصورت أنا وأخي أن عربة 3 هي الأخيرة .. فذهبنا إليها .. وصعد أخي إلى العربة لكي يأخذ بيدي .. لأن العربة عالية جداً.. عايزة  واحدة بتعرف تلعب جُمباز .. وانا بالطبع مبعرفش .. وكانت مُصيبة سودة .. الواحدة لازم ترفع  هدومها   لفوق قوي  عشان   تعرف  تنط  في  القطار .. والحمد لله أن فيه اختراع إسمه البنطلون .. بتلبسه الست الأيام السودة دي .. ركبنا القطار .. فإذا بنا نشم رائحة أكثر كراهة مما كانت خارج القطار .. والقطار مُستهلك  وزجاج الشبابيك مكسور  والكرسي ضيق جداً   والعربات غير نظيفة  .. وإذا بنا نرى ناس كتير نايمة في القطار .. والقطار ضلمة  وحر  ورائحة كريهة  وسواد السواد .. أخي قال لي .. تصدقي أنا سألت على العربة دي اللي نايمين فيها .. طلعت مش عربة 3 .. وعربة 3 في بداية القطار .. قُمنا عشان نروح عربة 3.. بس من داخل القطار .. معرفناش نمشي من الضلمة والكتمة والحر والريحة  .. فقعدنا لغاية ما شغّلوا النور والمكيف .. حبيت أروح  دورة المياه     ومقلكش  على  قذارتها  في منتهى  القذارة .. المصيبة السودة الثانية  بقى .. إن احنا واحنا رايحين عربيتنا .. كل واحد يعرف أننا رايحين عربية 3 بندور على مقعد 24 .. يقول .. يا باشا أأقعد في أي مكان  وبعدين اللي يجي يجي .. دا  احنا بنقعد في الطيارة  من  غير أرقام  !!! .. وكل ما يجي راكب   جديد  يقولوا له نفس الكلمتين  دول .. ليه  ؟  لأنهم محتلين  كراسي غير كراسيهم  ومش حاجزين .. وكأنه بينصحك  نصيحة غالية  وهو بيضحك وفرحان قوي   بالتعدي على حقوق الغير  .. واحنا حنطأ  ومنردش  عليه .. المهم .. قعدنا في مكاننا .. وبدأت مأساة جديدة .. كل واحد جاي ومش حاجز أصلاً من الشباك .. فـ يقعد في أي مقعد مش بتاعه  .. ويبدأ  شغل الفهلوة  والاستعباط والهمجية  والاستظراف واللعب بالبيضة والحجر والضحك ع  الدقون  .. كل واحد  يقعد في المقعد اللي يعجبه ويختار  المقعد اللي جمب الشباك .. ولما يجي صاحب المقعد اللي  التزم  وقطع تذكرة م الشباك قانوني .. يبدأ يعمل عليه تمثيلية  من تمثيليلات المصريين وفهلوتهم المعروفة  ويعمل إنه من بنها .. وميقمش له  ويظل  جالساً  في المكان اللي اغتصبه ..  ويمثل   تمثيليلة  كما لو أنه صاحب المكان ويعمل أنه بيبص م الشباك  .. لأ  ويزود التمثيليلة ويقول له  كمان .. عيب يا ابني دا أنا قد والدك  .. طيب لما انت راجل كبير وبذقن كمان  وماسك المصحف في إيدك  ومش حاجز ما تلتزم   ..  طيب ما تقول الحق   .. لكن ليه يلتزم ؟   ليه   يقول الحق ؟  ..  ليه  ميآخدش  حق غيره ويقول أنا راجل كبير!! .. شوفوا بقى المصيبة التالتة دي ..لما الشاب اللي مسروق حقه  .. طلب الكمساري  عشان يجيب له حقه .. الكمساري  لوّع في الكلام  .. ومرضيش يقول الحق .. شوفوا بقى اللي جاي بعد كده  كمان .. الكمساري نفسه جاب واحد تاني وبيدور له على مقعد .. طبعا  حضراتكم عارفين هو عمل كده ليه ؟ .. يعني هو متأكد أن فيه مقاعد لم يتم حجزها !!!.. والشئ  العجيب  أن كل واحد لما يروح  يحجز من الشباك  .. موظف الشباك يقول له معدش فيه تذاكر .. وتطلع القطار تلاقي فيه  أماكن فاضية .. وتبقى محتار في كل الظواهر اللي إنت شايفها  وسامعها  .. ومش  عارف تحدد مين اللي غلطان  .. شوفوا كمان المصيبة الكبيرة اللي جاية دي .. بدأ القطار كما لو أنه قطار قشاش  وليس مكيف .. كل ما تيجي  محطة  من أول طلخا  لغاية نهاية الخط .. وخاصة أبو حمص ودمنهور وكفر الدوار .. يحمل ركاب يحمل ركاب يحمل ركاب .. لدرجة أن المكيف  .. كان واقف في الطرقة بتاعته  بدون مبالغة   3 أضعاف اللي قاعدين على الكراسي  .. والرائحة كانت لا تطاق   والألفاظ القذرة   التي تسمعها لا تطاق   والخناقات بين الستات والرجالة لا تحتمل .. وقلة الأدب والسفالة والهمجية وعدم الاحترام وعدم النظافة وعدم النظام   وعدم الأريحية ووووو  والسلوكيات الرديئة   الحقيرة  .. تخيل سعادتك لو  هذا القطار  كان عمل حادث .. معنى ذلك أنه  سيكون فيه آلاف الضحايا بدون مبالغة .. لأنه كان مركب أضعاف أضعاف   حمولة الدرجة الثالثة والدرجة  الثانية المميزة والدرجة الثانية المكيفة .. فعلاً إحنا في بلد ملهاش صاحب .. بلد  لا يُحترم فيها القانون ولا النظام ولا النظافة .. بلد كل سنتيمتر فيه  ملئ بالفساد والرشوة والمحسوبية..   بلد سلوكيات قطاع عريض من شعبها في منتهى الرداءة .. ولن نتغير إلا إذا غيرنا من أنفسنا .. ولا بد من تطبيق قوانين صارمة .. وتفعيل القوانين المحنطة في الأدراج .. وتوقيع عقوبات صارمة على المخالف ..عاوزة أأقول  حاجة    حصلت في القطار بردوو .. على هامش هذا الواقع المرير .. وهي .. من المفارقات  العجيبة  .. أن  طفلة  في سن الرابعة عشرة تقريباً .. كانت أمامي وكان كرسيها مسروق بردوو .. سمعتني وانا  باكلم نفسي  " زعلانة من تصرفات البشر  دول " .. فقالت لي : " هو انت  من مصر؟ " .. قلت لها : " نعم من مصر" .. ولاحظت أن لهجتها  غير مصرية .. فسألتها  .. " إنت منين يا قمر" .. قالت :بابا  مصري  بس ماما عراقية  .. واحنا  كلنا جايين " سياحة في مصر ورايحين  اسكندرية  سياحة   بس بصراحة   العراق أحسن " ..وكنت  قد سمعت والدها يُناديها  " فاطمة" .. قلت لها : إزاي  يا فاطمة ؟ .. دا  العراق فيها حروب .. قالت  : فعلا  بس  مش في كل الأماكن .. إحنا  في بغداد   ومفيش  الزحمة  والحاجات اللي انا شايفاها دي  هنا  .. طبعاً أنا قلتلها وانا قلبي  بيتقطع   على بلدي   وأعصابي تعبانة  م  اللي شفته  وسمعته  : مصر أحسن بلد في الدنيا .. إحنا بننتقد أنفسنا .. عشان عاوزين بلدنا  تظل أحسن بلد في الدنيا ..يا فاطمة ..
----------------------------------------------------------------
د.شهيرة عبد الهادي
#Drshahera_Abd_Elhady_Ibrahem

تحية إلى ناصر في ذكرى ثورة 23 يوليو .. بقلم د.شهيرة عبد الهادي

تواريخ شكَّلت وتُشكِّل  وستُشكِّل ..ماضي وحاضر ومستقبل مصر .. يربط بينها .. أن الهدف واحد .. وهو .. الأمل في تحقيق .. العيش والحرية والعدالة الاجتماعية والكرامة الإنسانية .. لكل فرد من شعب مصر .. بدأت بثورة 23 يوليو 1952م .. وانتفضت في ثورة 25 يناير 2011م .. وصُحح مسارها في 30 يونيو 2013م .. ورُسمت لها خارطة طريق في 3 يوليو 2013م .. وستظل مصر .. بقدرة الله وفضله .. شعباً وجيشاً في رباط إلى يوم الدين .. مصر لن تموت .. كل عام وحضراتكم بألف خير بمناسبة ذكرى ثورة يوليو وتحية إلى ناصر ..

وحشتوني .............

السلام عليكم ورحمة الله وبركاته وكل عام وجضراتكم بألف خير يا أغلى وأجمل وأحلى أصدقاء وصديقات وإخوة وأخوات وزملاء وزميلات وأساتذة وأستاذات وأبناء وبنات في العالم كله .. ويا رب تكونوا قضيتوا رمضان جميل وعيد فطر أجمل .. وأشكر كل محترم ومحترمة قد سأل عني في فترة غيابي سواء بالتليفون والموبايل أو الرسائل وبـ اعتذر عن عدم الرد على الرسائل لأني بأمانة كنت لا أستطيع الجلوس أمام الجهاز الفترة الماضية .. ويا رب يعطيكم الصحة والعافية ويبعد عنكم المرض ويبعد عنكم شر الحاسد والكاره والباغض والحاقد والعارض ويجعل أيامكم الجاية أفضل م اللي فاتت ..آمين يا رب العالمين ..

تعالوا مع بعض نقوم بالدعاء لجيش مصر العظيم واحنا بنفطر .. بقلم د.شهيرة عبد الهادي

تعالوا كلنا نقوم بالدعاء واحنا بنفطر ..لجنودنا ..جنود جيش مصر العظيم ولاد فلاحين وعمال وصعايدة مصر .. اللي في سيناء واللي ع الحدود .. اللي صايمين .. وفي حالة حرب دائمة مع الإرهاب الأسود .. جنودنا دول بيستشهدوا وهم صايمين من يوم 10 رمضان وحتى الآن .. ومن قبلها بزمان وهم بيستشهدوا ومن بعدها وهم ح يستشهدوا ..وطول عمرهم بيستشهدوا عشان احنا نعيش .. دوول اللي بيحمونا .. إحنا بنفطر في بيوتنا .. واللي بيفكر يعمل صينية كنافة ع الفطار واللي بيفكر يطبخ إيه جديد كل يوم ع الفطار .. ودول بيموتوا ع الحدود وفي سيناء كل يوم .. اللهم قويهم .. اللهم اهلك أعداء مصر وأعداء الجيش المصري في الداخل والخارج .. اللهم ارحم شهداء جيش مصر العظيم وصبر أهاليهم وصبر شعب مصر كله .. آمين يا رب العالمين ..ولازم نفتكر أن الجيش المصري ده اللي هو من كل بيت في مصر ..راح منه ما بين 120 ألف إلى 250 ألف جندي ما بين شهيد ومفقود  ومبتور أجزاء من جسمه  ووو... إلخ ..عشان مصر وعشان فلسطين وعشان القضايا العربية .. دا بس عشان الناس اللي بتشتم فيه تفتكر ..

قتل أكثر من 100 إرهابي على يد الجيش المصري في سيناء واستشهاد 17 جندي مصري من بينهم 4 ظباط وإصابة آخرين من بينهم ظابط ..

قامت مجموعة  من الإرهابيين مُنظمة مُسلحة تسليح على أعلى مستوى بالهجوم  على 4 كمائن خاصة بالقوات المسلحة المصرية في رفح والشيخ زويد بسيناء  في الساعة السادسة والنصف من صباح اليوم الأربعاء 1 من يوليو 2015مـ الموافق 14من رمضان 1436هـ .. وتعاملت معها  القوات  المصرية التي كانت بتلك الكمائن  وقتلت منها 20  إرهابياً  في البداية .. ثم توسعت المواجهة  واشتركت القوات المسلحة المصرية  واشتبكت مع القوة الإرهابية  براً وجواً باستخام الطائرات الأباتشي ..وأسفرت  المواجهة عن أكثر من 100  قتيل إرهابي   وآخرين  أسرى ما زالوا على قيد الحياة .. ومن جانب القوات المسلحة المصرية فقد  تم استشهاد 17 جندي من بينهم 4 ظباط .. وإصابة آخرين من بينهم ظابط .. وفقاً لما أعلنه المتحدث العسكري باسم القوات المسلحة المصرية محمد سمير .. هذا ويُذكر أن بعض الصحف المصرية والمواقع المصرية كانت  تقول أن هناك أعداداً بالمئات من الجيش المصري قد تم قتلهم ..وقد ثبت إن هذه المعلومات هي شائعات .. مع ملاحظة أن الإرهابيين كانوا يرتدون ملابساً  قريبة في الشكل من ملابس الجيش المصري  وقد يكون هذا هو سبب الارتباك  واللخبطة في التقارير.. هذا ويقال أن بعض هؤلاء الإرهابيين ليسوا مصريين وأن بعضهم من تركيا وإيران وقطر .. الله يرحم شهداء مصر من جنود وظباط القوات المسلحة .. آمين ..
-------------------------------------------
د.شهيرة عبد الهادي 
#Drshahera_Abd_Elhady_Ibrahem

الله يرحمك .. خلص الكلام .. وإلى الأمام يا مصر .. وستبقي ولن تموتي يا مصر .. بالرغم من الحُزن الذي يملأ قلوبنا .. ستعيشي يا مصر ..وستقهري الإرهاب الأسود ..

الله يرحمك .. خلص الكلام .. وإلى الأمام يا مصر .. وستبقي ولن تموتي يا مصر .. بالرغم من الحُزن الذي يملأ قلوبنا .. ستعيشي يا مصر ..وستقهري الإرهاب الأسود ..