بمناسبة أن اختبار الفيس بوك عيني وزيرة التربية والتعليم بمصر في العالم الافتراضي هههههههه وبكده الحمد لله بقيت من ضمن الحكومة الافتراضية على الفيس بوك هههههه ..انا باضحك بس من غلبي .. ودلوقتي بقى أنا أتكلم بمنتهى الجدية و من عشمي يعني .. عندي رسالة إلى وزير التعليم العالي وكل مسؤول عن التعليم العالي في مصر في العالم الواقعي بمصر .. أرجوكم .. انقذوا باستخدام القوانين العادلة التعليم العالي في مصر .. دلوقتي "بعض" رسائل الماجستير والدكتوراة وصلت إلى مستوى من التردي لا يمكن تخيله ولا احتماله .. لدرجة أنني وأقسم بالله العلي العظيم بكيت بالدموع بعد حضوري مناقشة "بعض" هذه الرسائل ..نظراً للمستوى المنحدر المتردي واللا شيء الذي وصلت إليه .. وده ليه بقى .. لأسباب كثيرة جداً حضرتك عارفها .. والكل في مصر عارفها .. ومن ضمن هذه الأسباب .. أن القوانين فتحت الأبواب .. للطلاب اللي جايبين " مقبول " في الليسانس والبكالوريوس وكمان جايبين" مقبول " في كل أنواع الدبلومات اللي في الدنيا كلها واللي دخلوها .. وعلى فكرة بقى .. هم دول اللي بيآخدوا ماجستير ودكتوراة دلوقتي .. بينما اللي جايب جيد جدا وممتاز ممكن يكون مقدمش على دراسات عليا أساساً لظروف حاصة بيه .. بالإضافة لعامل المجاملات الذي انتشر وتوغل عند "بعض" أساتذة الجامعات .. بالإضافة "لدكاكين " الماجستير والدكتوراة اللي تحت بير السلم واللي ذكرها "الدكتور الشوادفي " في مقال له .. بالإضافة إلى اللعب بالبيضة والحجر في العلم .. أه والله متستغربوش .. أيون فيه إسلوب اللعب بالبيضة والحجر في العلم دلوقتي .. وفيه حاجات اتكسف أأقولها من مستوى الانحدار الذي وصلت إليه طرق وسبل التعامل مع منح درجة الماجستير والدكتوراة الخاصة ببعض الطلاب المصريين والطلاب من بعض البلدان غير المصرية و الناس كلها عارفاها .. حرام والله .. الإقلال من شأن العلم والبحث العلمي والتعليم هكذا في مصر ..
------------------------------------------
د.شهيرة عبد الهادي
#Drshahera_Abd_Elhady_Ibrahem
ليست هناك تعليقات:
إرسال تعليق