تعليقا على الخبر المنتشر حول مقولة الرئيس السيسي " على كل مدير أن يطبطب على مرؤؤسيه"

بمناسبة  هذا   المنشور المنتشر على صفحات الفيس بوك  ولا أعلم مدى صحته من عدمها .. والذي يقول  أن الرئيس السيسي قد طالب المديرين في كل مكان بحسن معاملة مرؤوسيهم وأن يطبطب عليهم " .. لأنني لم أسمع الخطاب  لظر..  أريد أن أشكر سعادة الرئيس على هذه الملحوظة وفي نفس الوقت .. أريد أن أقول شيئاً  لسعادته  وهو .. يا سعادة الرئيس ..

فيه ثقافة غريبة في مصر .. يبدو أنها جينات عند المصريين .. أي واحد.. يمسك أي حاجة .. إن شاء الله خولي أنفار في الغيط .. عاوز اللي بيرأسهم.." يصلولوا " ركعتين قبل ما يكلموه .. وعاوز كتر النفاق له.. وعاوز كتر التملق له ..وعاوز اللي يشتغل معاه ..يشتغل خدام له .. وعاوز يذل في اللي بيشتغل تحت رئاسته .. وعاوزه يخضع له .. ويخلي عنده خنوع علطول .. ليه ؟ ..لأنه اتربى كده ..ووصل للي هو فيه بكده .. ثقافة سيئة .. وفي نفس الوقت .. المرؤوسين عندهم نفس الثقافة .. ثقافة التأليه والنفاق للي بيرأسهم ..ان شا الله كان هو نفسه خولي الأنفار اللي في الغيط .. و آسفة لذكر اللفظ .. إلى أن يغتر .. ويتصور أنه هوالإله موزع الأرزاق .. وأنه من يتحكم في مصائر الناس .. وهو عشان معندوش ثقة في نفسه.. بيبقى مبسوط من كده.. فيه فرق بين الأدب والاحترام والذل والخنوع والخضوع .. نعم .. الاحترام والأدب لابد وأن يتوفر لدي كل من الطرفين للآخر .. لكن دون ذل وخضوع وخنوع ومراعاة أدبيات التعامل التي وردت في كل الأديان السماوية ..   ومن العجائب .. أنني وأنا .. أقرأ .. في وصايا وحكم  جدي " بتاح حتب" .. وجدت أن إحدى وصاياه  تقول : " ـ انحن ِ أمام رئيسك ، المشرف عليك فى شئون الإدارة الملكية ، حتى يظل بيتك مفتوحا ، ويستمر رزقك ومرتبك جاريًا ، ولا تعصه ، فإن عصيان من بيده السلطة حماقة وشر مستطير ." .. وبكده بقى .. يبدو  أنها جينات يا سعادة الرئيس .. ونحن نريد لها علاجاً ..
---------------------------
د.شهيرة عبد الهادي
#Drshahera_Abd_Elhady