..اللي عاوز يتسحر..
من واقع مطبخي أنا مطبخ شهيرة وطبيخي أنا .. بجد..طبق فول ما حصلش ..عشان اللي عاوز يصوم وعاوز يتسحر.. جربته وطلع ممتاز .. شوفي بقى ..كمية الفول اللي حتستخدميها نقيها كويس وانقعيها مع تغيير الماء لمدة 3 أيام .. صفيها كويس خالص.. حطيها في الدماسة أو أي حلة م اللي عندك..سويها ع النار الهادية جداً كويس وتآخد وقتها زي ما تآخد..بعد ما تستوي ..حطي شوية قمح بليلة حصى ..وشوية ارز حصى.. وشوية عدس حصى ..وبصلاية وطمطماية وجزراية وخل كتير وليمون كتير.. وكل ده من غير ملح إوعي تحطي ملح .. وكل ده طبعاً بعد ما تنقيه كويس وتغسليه كويس ..ولو عاوزة تضيفي بطاطساية وقرن فلفل أحمر حطي.. ولما كله يستوي مع بعضه ختاص ويبقى زي الزبدة .. وطبعاً على نار هادية جداً زي ما قلت قبل كده .. خدي الكمية اللي عايزاها واضربيها في الخلاط..وضيفي عليها الملح والكمون والكسبرة والزيت والتوم والليمون والطحينة والبقدونس والطماطم الحمراء الطازة الجامدة والخضار اللي انت عايزاه وبالهناء والشفاء.. بجد كان تحفة ..
ملحوظة مهمة: لما تيجي تزودي ماء في أي مرحلة للفول لازم يكون ماء مغلي وابقي حطي الشياطة تحت الحلة بالرغم أن النار هادية عشان ما يتلسعش منك ويؤثر على الطعم والرائحة .. والباقي من الكمية ممكن تحطيهم في اكياس وتحطيها في الثلاجة لحين الاستخدام ..
----------------------------------------
د.شهيرة عبد الهادي محمد
الجمعة 22 / 9 / 2017 م ..
الموافق أول محرم 14399 هـ ..
ليست هناك تعليقات:
إرسال تعليق