أنا كلمت حضراتكم قبل كده عن موضوع الغش المنتشر بصورة فاضحة في كل اختباراتنا بجميع المراحل التعليمية بداية من الروضة وحتى الجامعة وما بعدها .. وحضراتكم عارفين أني بامنع الغش على قدر طاقتي البشرية .. لكني إن شاء الله ح استمر وأمنع وأمنع وأمنع .. في اللجنة اللي فاتت بقى ..اللي أنا كنت مسؤولة عنها .. فيه مجموعة من الطلاب اللي عمرهم فوق الخمسين واللي هم عاملين مع بعض جروب عشان الغش .. أول ما شافوني وأنا داخلة اللجنة وبعد ما وزعنا ورق الإجابة والأسئلة عليهم .. قاموا بعد 10 دقائق .طلبوا أنهم يسلموا الورق فاضي من غير إجابة .. وطبعاً قلت لهم حاضر بس بعد انقضاء نصف الوقت كما يقول القانون .. الظريف بقى اللي عاوزة أقوله لحضراتكم .. أن زعيمة المجموعة دي .. وهي بتسلم ورقتها الفاضية ..جاءت لغاية عندي في مكاني :وبتقول لي .. كل سنة وانت طيبة يا دكتورة .. بس بتقولها بطريقة فيها كلام واضح ومفهوم .. هو إيه بقى الكلام ده .. هو .. أنها بتقول لي .. إنت يا دكتورة السبب في اني سلمت الورقة فاضية .. يا سلام .. يعني مش هي اللي مش حتعرف تغش ما دام أنا موجودة .. المصيبة السودة بقى.. إن اللي بيغشوا دول .. بيجوا بعد كده عندنا يعملوا ماجستير ودكتوراة وبالغش بردوا .. والنتيجة أننا أصبحنا لا عندنا لا علم ولا أخلاق ولا تعليم ولا مدارس ولا جامعات .. بس إيه رأيكم بقى .. حضرتها بتحملني أنا مسؤولية أنها ما عرفتش تجاوب عشان هي كل مرة والجروب الخاص بيها عاملين برتيتة غش .. وآدي أخلاق ومفاهيم الغش عندنا ....
-----------------------------------------------
د.شهيرة عبد الهادي
27 / 5 / 2017 مـ
ليست هناك تعليقات:
إرسال تعليق