( مواقف حياتية )..عن سلوكيات بعض الشعب المصري

هو ليه احنا شعب ما بيحترمش بعضه .. يعني مثلاًً الشارع لغاية دلوقتي سهران ويا ريته سهران في هدوء .. لأ.. دا في منتهى الصخب والخناقات شغالة والشتايم الخادشة للحياء وسب الدين لزوم الخناقة والسهرة بردو شغال .. و بردوً وعلى رأي صديقة الآن بتقول ..أن ميكرفون المسجد باظ .. يقوم يصلحوه دلوقتي .. يعني بعد الساعة الواحدة والنصف صباحا.. ويقعد يقول وهو بيصلحه و لفاية الفجر ما يطلع ولمدة 3 ساعات ورا بعض ألو ألو ألو ألو ألو الله أكبر الله اكبر الله أكبر الله أكبر الله أكبر.. ليه احنا شعب سلوكياته لا يوجد بها احترام لوقت الغير ولا خصوصياته ولا آدميته ولا احترام النظام ولا القانون ولا للنظافة ولا للجار ولا للكبير ولا لالا ولا ولا .. احنا عندنا جار ما بيحلاش ليه يتخانق مع مراته وولاده كل يوم إلا من الساعة 2 بعد نص الليل ولغاية الفجر ..وبعد كده ينام هو ومزاجه عنب ..بعد ما يكون صحى العمارة كلها وقلق نومها والعجيبة انهم تاني يوم تلاقيهم هو ومراته وولاده بيزغرطوا ويطبلوا مع بعض ولا كأنهم كانوا بيتخانقوا بالليل وقلقوا نومنا كلنا ..يعني ما فيش احترام لوقت الجار خالص لا في الفرح ولا في الخناقات ..
---------------------------------------
د.شهيرة عبد الهادي
24 / 2 / 2017 م
Drshahera Abd Elhady Ibrahem