في يومٍ من أيام العشق التايه
بين قلبين
جلس الطرفان المعنيان على القهوة
وسألها الواد: سرحانة في ايه ؟
جاوبت بعينيها العشقانة
بتفكّر فيه
بتجهز ليه.....
البند الآتي من الأشواق....
أوّل بنود الاتفاق :
مسموح بالعشق لحد الآخرة
الممتدة بحبال الدنيا الموصولة
بقلب العشّاق .....
والبند التاني : بلاها فراق
وإن حصلت مرّة إننا نبعد
مسموح نشتاق
ونكلّم بعض كلام عادي
إزيّك ؟
أخبارك إيه ؟
أنا برضه تمام...
أهو أي كلام
نثبت به قصاد الناس
إنّنا عايشين
في البند التالت : متواعدين
إننا نتقابل في الأحلام
وارسم على كفّة إيدى سلام
متحجّب من رمش كلامك
متحدّي البُعد بأحلامك
ترسم لي البيت اللي ماعُمره
برّه الأحلام راح نقعد فيه
نسكن نواحيه
والحلم اللي ما عُمره ها يكمل
شحـتـفـني عليه....
البند الرابع : مش مسموح
تسألني وقت مااكون جنبك
سرحانة في ايه ؟؟!
::
منى حواس
قصيدة : " اتفاق "
من ديوان : " بنت بتشبه الأيام "
ليست هناك تعليقات:
إرسال تعليق