التاجر المصري أسوأ تاجر على مستوى العالم .. بقلم د. شهيرة عبد الهادي
أنا على يقين الآن من أن التجار أصحاب المحلات والدكاكين والسوبر
ماركت بيحاربوا الدولة المصرية وبيزهقوا المواطن المصري في عيشتو .. أنا
كل يوم ومعايا جارتين تلاته كده .. موزعين نفسنا على المحلات المختلفة
.. كل واحدة تروح تشتري حاجة من محل معين وتتابع معاه سعر نفس الحاجة على
أيام متتابعات وبعدين نتبادل المحلات مع بعض وهكذا .. ح أقول اللي
حصل معايا .. محل اشتريت منه الأرز.. أول يوم قالي بـ 6 جنيه.. رحت تاني
يوم فباعهولي بـ 6.5 جنيه يعني زود نص جنيه ..طبعا كلمته
..فقال نفس الكلام اللي الناس بتقوله ..الأسعار غالية والدولار وما
الدولار.. رجت تالت يوم قالي بـ 7 جنيه .. واتناقشت معاه.. وقال نفس الكلام
.. النهارده كان هو قاعد مداري نفسه في مكان أنا مش شايفاه وإبنه اللي
واقف بيبيع .. الولد ده ..قالي الأرز بـ 8جنيه .. بصراحة زعقت للولد ..
وقلتله مش معقول انتوا كده بتغلوا على مزاجوا ..دا ما فرفتش ساعات
ووصلتوه من 6 إلى 8 جنيه حرام عليكوا وكده يعني .. الولد قام منادي على
ابوه وقالوا الأرز بكام يا حاج النهارده ..وهنا عرفت أن الراجل في المحل
.. قام أبوه رد عليه وقاله بـ 7 جنيه .. قعدت اتكلم واتكلم .. ولا عبروني
..ومشيت وأنا دمي محروق .. لازم يكون فيه رجال تموين شرفاء يقومون بعملية
الرقابة على الأسعار .. سأكرر وأقول ومش ح ازهق.. التاجر المصري جشع
وسيء وربنا ح يحاسبه على استغلاله للشعب.. ولازم تكون فيه رقابة على
الأسعار ولازم الحكومة تشوف طريقة للتعامل مع هؤلاء التجار .. ووالله
اللي بيعمل كده من التجار دول يستحق الشنق يستحق الإعدام في ميدان
التحرير وتنقل على الهواء مباشرة كمان قدام العالم كله لأنهم مجرمين في
حق الشعب ..
ليست هناك تعليقات:
إرسال تعليق