في ثالث يوم عيد الأضحى المبارك 1437هـ الموافق 2016مـ

صباح ومساء الخير وعيد سعيد على حضراتكم في ثالث أيام عيد الأضحى المبارك .. وبعد ما عيدنا كلنا مع الأهل والأحباب والأصدقاء اليومين الأوليينيين اللي فاتوا .. باقول لحضراتكم وحشتوني .. ويا رب تكونوا عيدتم عيد حلو يا رب .. بالنسبة لي وزي ما حضراتكم عارفين باكون عند ماما في بيت العيلة ولما باكون عند ماما باكون متفرغة لها تماما كل لحظة كل ثانية ليها .. وملاحظاتي ع العيد بقى .. العيال ولاد اخواتي في العيد ده واللي فات شيء غريب .. ما باقوش يحبوا يآكلوا لحمة خالص.. وكل اللي بيحبوا يآكلوه وعايزينه هو البانيه .. والغريب كمان أنهم بيفطروا ويتغدوا ويتعشوا تشيتوس وشيبسي بالشطة وشيبسي بالجبنة وكمان بتاع كده شكله زي دودة القز اللي كنا بتعملها زمان ونوديها الفصل في المدرسة حاجة غريبة كده و طعمها زي الهباب وبتجيب إسهال .. وهم كل واحد فيهم من اللي في ابتدائي لغاية اللي في الجامعة ماسك كيس منه قد الشوال وبيلتهموه التهاماً وبيآكلوه ازاي مش عارفة بيبلعوه ازاي مش عارفة .. فين زمان لما كانت العيال في بيت العيلة تجري على الصينية الصفراء ولا البيضاء اللي عليها الكفتة الناشفة واللحمة المطبوخة بأنواعها والكبدة والحلويات بتاعة الذبيحة ومعاها الفتة بالزبيب .. وكمان كان فيه صينيه عليها مشمشية وقراصيا وفول سودواني ومكسرات وفطرة والفطرة دي يعني البلح من أجود أنواع البلح و كمان عليها الترمس والحلبة والحمص والمهلبية وكنا نزعق ليهم ونقولهم دي بتاعة الضيوف وحانعملكوا انتوا صينية تانية..وكانت الناس تلم نفسها مجموعات ويتنقلوا من بيت لبيت يعيدوا على أهله.. و كل ولاد البلد والشارع كلهم يعيدوا على بعض بقلوب حلوة كده ومبتسمة .. دلوقتي العيد هو شوية العيال بتوع العيلة بيآكلوا تشيتوس ودوريتوس وشيبسي بالليمون والشطة وآدي وش الضيف.. لأ والخيبة كمان إنهم بيحوشوا عيدياتهم ويطليوا سندوتشات ديليفري من ماك دونالدز ولا كوك دور ولا هارديز ولا مش عارفة إيه و مش عارفة إيه مع إن الستدويتشات بتاعهم والنعمة لا ليها طعم ولا لون وحاجة كده تجيب المرض وما يآكاوش الأكل اللي معمول في البيت على نضافة .. أجيال غير الأجيال وزمن غير الزمن وعيد غير العيد ..