كام سؤال من نوع خفيف !!
.................................
وانت قاعد بين عيالك
افتكرت عيالنا مرَّة ؟
وانت ماشي كل يوم
وِسْط حُرَّاسك مِتابع
شُفت أطفال الشوارع ؟
وانت بتلف القصور
شوفت أحياء ف القبور؟
وانت بتعيّن وزير
قلت له حق الفقير؟
وانت عايش طول حياتك
والحياه وردي وحلوة
شفت تعذيب معتقل
من امن دولة ؟
لمَّا كان دايما يجيلك
ميَّه صافية
شُفت طفله ماشيه حافية ؟
وانت بتراجع حسابك
فيه مئات أو مليارات
شفت ف الجوع شعب مات ؟
يا اللي كان يرتاح ضميرك
فوق مخدَّه حرير وريش
سِبت إيه للناس تعيش ؟
لو ماكنتش يبقى همَّك
كل مصري يعيش كريم
كنت ليه عامل زعيم ؟
..............................
فاطمة المرسي
ديوان / انتباه يامصر
ليست هناك تعليقات:
إرسال تعليق