في ذكرى وفاة الزعيم جمال عبد الناصر .............. بقلم أ.فاطمة المرسي

يوم ما نكَّسنا العلم
..........................
لسَّه فاكرة
لمَّا كنَّا ف ابتدائي
لسَّه شايفة
شكل مَدرستي وفِنائي
لسَّه سامعة
صُوت مُعلمتي وغِنائي
الطيور ع السور بتسمع
باهتمام
الشجر ينده فروعه
يقول تمام
والفروع تأمر ورقها
بالنظام
واحنا بنحييي العلم
النجوم تنزل بسرعة
للسلام
كل يوم وسط العلم
كان نشيدك يا بلادي
جوَّه فى الروح اتختم
وابتدت كلماتي تحبي
تاتا تاتا
ترسم الصورة البريئة
وبَّساطة
لسَّه بتعلَّم خيالها
يبتدي يحكي أماني
والأماني فى الطفولة
شكل تاني
الحروف لسَّاها طفلة
يوم شقيه ويوم عنيدة
يوم قريبة ويوم بعيدة
خايفه قبل معادها تكبر
خايفه تصبر ...
تتحبس جوَّه القصيدة
كنت بترجاها دايما
إنها تقبل مشاعري
حتى لو كان غصب عنْها
الحروف خانت ضميرها
وكل حرف فى سكة تاه
كل شئ أصبح غريب
والطيور صُوتها نحيب
حتى أغضان الشجر ...
دوغري خاصمت أى نسمة
كانت النجمات حزينة
إنطفى نور المدينة
والدموع مع كل لحظة
فوق خدودنا بتتعصر
كنت وحدي ..
بس تايهه ف الجموع
يومها قالوا وبهدوء
إتخنق نور القمر
شاره سودة ..
شوفتها بطول الطريق
كفّنوا بيها الأمل
والبُكا شلال رمادي
عدّى فوق المُحتمل
كان حدث
كبرت طفولتي معاه سنين
إندفن قلبي الصغيَّر
واتولد عمري الكبير
وانكِسارْنا
يومها كان ماشي طابور
لمَّا نكَّسنا العلم
.........................
فاطمة المرسي
ذكرى وفاة الزعيم جمال عبد الناصر