شايفاها أنا دايماً جنة ..
كل أوان وعصر ..
دا البسمة في مصر .. جوة الإنسان ..
الرحمة في مصر .. وياها حنان ..
البساطة والرقة ..
دي سمة المصري أبو ضحكة جنان ..
المصري يا ناس طول الزمان ..
في السلم نعومة ..
وفي الحرب عمره ..ما كان جبان ..
عنوانه الحب ..
والحب في مصر.. دايماً تلقاه ..
بيدفي البردان الصقعان ..
المصري عاشق ..
وعشقه خلاه يعشق ..
وقصص عشاق الكون وياه ..
مصر دي سحر الشرق مع الأنغام ..
عايشة جوة المصري ..
ومعاه في الأحلام ..
تندهله .. يلبي نداها أوام ..
مصر دي خمر المصريين الجدعان ..
دي الصحبة الفايقة في الأحزان ..
والقفشةالرايقة ..
في الأزمات والحالة جنان ..
وولاد مصر..من بحري من أسوان ..
م النوبة وفي الصعيد الشقيان ..
مسلم مسيحي يهودي ..
بهائي سني شيعي حتى الملحد كمان ..
رجالة وإيد واحدة ..
في كل زمان وأوان ..
ما يفرق بينهم أي جبان ..
يحموها وهي شابة ..
ما يخذلوها .. إن جار عليها الزمان ..
يقفوا معاها ..يرجعوها صبية ..
في طوبة وكياك ..
يخلوا وشها ..لون حب الرمان ..
الله الله على بلدي مصر ...
مطرها.. عطر ريحان ..
شمسها.. أشجار ضل و أمان ..
ليلها زه د.. قمرها حب ..
نجومها لولي ياقوت ومرجان ..
الروعة فيها أشكال وألوان ..
بس اللي يشوفها ..
بعين العاشق الولهان ..
في كل عصر وأوان ..
ويحبها ..مهما غدر بيها الزمان ..
الله الله على بلدي مصر ..
شايفاها أنا دايماً جنة ..
كل أوان وعصر ..
-------------------------
د. شهيرة عبد الهادي
16 / 4 / 2017 م
ليست هناك تعليقات:
إرسال تعليق