شوفوا حضراتكم عشان الغلاء الفاحش اللي احنا فيه .. جارتي علمتني ازاي أعمل الفراخ البانيه في البيت وخصوصا بعد ما وصل سعر الفرخة البيضاء أم 2 كيلو وجرامات 70 جنيه وأكتر.. وبعد ما وصل سعر البانيه 100 جنيه وأكثر .. والطريقة هي : أنك تجيبي الفرخة وتقطعيها أربعة وتسلخيها وتنقعيها لمدة دقائق معدودة مش كتر في ماء وملح وخل بعد ما تكوني غسلتيها كويس .. وبعدين .. تآخدي كل صدر وتحطيه في كيس وتدخليه الفريزر شوية لغاية ما يتلج ويتماسك .. وبعدين تطلعيه من الفريزر.. وتحطيه على الرخامة أو القطاعة بتاعة المطبخ اللي في كل بيت دي بس تكون نظيفة جداً.. وتمسكي الصدر بإيدك الشمال .. وبإيدك اليمين وبسكينة حامية تبدأي تقطعي لحم الصدر شرايح طبقاً للسمك اللي حضرتك عاوزاه بس تآخدي بالك من إيدك .. أنا بافضل السميك .. تحطيها في البيض والبقسماط وبعدين تحطيها في طاسة التحمير وتهدي عليها خالص وتغطيها لغاية ما تستوي وبالهنا والشفا .. يبقى بكده الفرخة أم 70 جنيه .. استخدمتيها في أكثر من حاجة..جزء شوربة مع الخضار وهي الأوراك ..وعدد 2 صدر بانيه يكفي أسرة كاملة .. يعني ممكن الفرخة للأسرة صغيرة العدد تتطبخ على مرتين وكل مرة اتكلفت 35 جنيه بدل ما تعملي أكلة بانيه بس لوحدها بـ 100 جنيه .. وطبعاً ده كله يتوقف على عدد افراد الأسرة .. واهو لازم نحاول نحارب الغلاء ده بطرق مختلفة ما دام لا فيه حكومة تراقب ولا فيه ضمير عند التجار ولا فيه دولة عارفة تعاقب التجار دول ..
ليست هناك تعليقات:
إرسال تعليق