من كلمات وشعر .. سالم الشهابي ..

المطر...
ابن السما...
والبحر..
ما أخدش زرقة السما
ولا خد ملوحة البحر
...........
بينى وبينك..
شىء...
ما أخدش شىء مِنِّنَا
بينى وبينك..
شِتَا...
أربع فصول فى الشهر.

أوّل كلام الحياة...
صرخة وصوت
هربان بطول الحياة
..................
آخر كلام الحياة..
صرخة وصوت
الموت... صداه
....................
بنهرب...
والهروب.. مرسى.
ونفرح...
والبكا.. حارس.
للكون
جهات أربع..
إنتى اتجاه خامس.
فى البدء كان
للسما والأرض
نفس الشكل..
فى البدء كان
للسما والأرض
نفس اللون..
ومن اختلاف المسير
كان اختلاف اللون.
...........
أنا وانتى
أرضين فى اللقا
مالناش سَمَا
وكان ضرورى نفترق..
لاجل اكتمال الكون.

لما بكا الليل...
مِ الوحدة
كان النهار.
واما بكا الريح..
البحر صابه الدوار.
وامّا التقيتك بكيت..
وسألت نفسى بعدها:
هل كان بكايا هزيمة..
أم كان بكايا.. انتصار؟

فى البدء كان
للشمس ضِلّ.
كان الحبيب..
و الفارس.
من عشقه ليها..
-سجنها-
إِنْتَصَبْ على بابها
حارس
.............
بينى وبينك كون..
لم يكتمل.
بينى وبينك فراق..
محتاج ليوم سادس.

أول بكا فى الكون..
للبحركان.
ومن افتراقه عن السِّمَا..
ثمّة شَبَهْ فى اللون.
.........
انتى وانا..
إن نفترق..
نكتمل..
ويكتمل لونْنَا.
وان نقترب..
ننكسر..
نصبح بلا كون.
الموج..
ابن الرياح والبحر..
واخد من الريح
ثورته.
واخد من البحر
اتساعه.
كل الشطوط تستقبله..
وتبكى ساعة وداعه.
للموت سفر فينا..
ولينا حق اختراعه.
---------------------------
سالم الشهباني