من شعر .. الإعلامي المهندس الشاعر .. هيثم كمال ..

مفتتح
مانتاش مجبور ع الكلمة الحلوة
ولا يوم جبروك على حب الناس
لو مجبور ع العيشة المرّة
خللى حياتك نور ونّاس

الحلم
طول عمرى بحلم
والحلم للعاشق وصال
الحلم للمظلوم أمل
الحلم للغرقان نجاة
الحلم للغلبان ونس
الحلم للمخنوق حياة
والحلم للوردة ندى
الحلم للسهران قمر
الحلم للحيران هدى
الحلم للخايف أمان
الحلم للتايه وطن
وانا حلمى طول العمر اكون
نقطة مطر
.................................................................. هيثم كمال
31/3/2008

بحبك
بنتواعد ونتلاقى
ونرجع تانى نتباعد
ونتشوّق لبعضينا
كشوق الضى للنني
وشوق الموجة للضفّة
وانا واقف على شطّك
وباحلم باللقا تانى
واخاف لو نلتقى تانى
ما لما بنلتقى تانى
بنتباعد
بقيت خايف أغيب عنك
فادوب م الشوق وم اللهفة
واخاف ارجع لاحضانك
فادوب م الوجد والضمّة
مانيش عارف
اكون دمعة على خدك
بتحلف لك باشواقى
ولاعارف اكون حتى
عرق بيسيل على ارضك
فتطرح بالحنان وردة
بتتفتح على بابك
واصير قطرة ندى
تبات تحلم بنور فجرك
باقول لك إيه ؟
بحبك
بحبك بحبك
.........................................................................هيثم كمال
2/1/2016