----------------------------------------------------------------------------
لفت نظري وأنا أقرأ عن الراحل الشاعر الكبير والمذيع المثقف والأديب فاروق شوشة .. المعلومات التالية ..( كما شغل الراحل منصب أستاذ للأدب العربي بالجامعة الأميركية بالقاهرة، وألف دواوين شعرية بينها "العيون المحترقة" (1972)، "لغة من دم العاشقين" (1986)، "وقت لاقتناص الوقت" (1997)، "الجميلة تنزل إلى النهر" (2002).. )
طيب .. إيه اللي لفت نظري بقى .. لفت نظري أنه كان يعمل أستاذاً للأدب العربي بالجامعة الأمريكية وهو يحمل ليسانس من كليه دار العلوم جامعة القاهرة عام 1956 وليسانس لغة عربية من كلية التربية بجامعة عين شمس عام 1957 .. ولفت نظري كمان أنه لو حسبت الفروق الزمنية بين كل ديوان من الدواوين التي الفها .. ستجد بين الأول والثاني 14 عام .. وبين الثاني والثالث 11 عام .. وبين الثالث والرابع 15 عام .. وانا لما حسبت الفروق الزمنية دي بين كل إبداع والإبداع الذي يليه .. ضحكت ضحكاً كالبكاء .. ليه بقى .. لأن دلوقتي .. الواحد ولا الواحدة من دول بيآخد الماجستير قي سنة على الأكثر إن لم يكن في 6 شهور .. وبعدين يآخد الدكتوراة في سنة على الأكثر إن لم يكن في 6 شهور .. وبعدين يسرق بحوث أو يفبركها في دكاكين عمل البحوث أو يسرقها من رسائل الماجستير والدكتوراة اللي بيشرف عليها ويترقى بيها ..وكمان بيترقى عن طريق التنازلات الأخلاقية الرخيصة القذرة .. وممكن بعد كده يأخد مناصب وهو حرامي بحوث أصلاً يعني منتحل إن لم يكن فعلاً يمارس شغلانة انتحال الشخصيات ..وممكن كمان يكون بعد كده عضو في إحدى لجان الترقيات ولك أن تتخيل شكل المخرجات من تحت يديه جينئذ .. وبعد ده كله يعمل عليك أستاذ ويبقى عنده تضخم في الذات غير مسبوق وعايزك تصلي له ركعتين قبل ما تكلمه ..وكل ما يكلمك يقلك أنا أستاذ أنا أستاذ أنا أستاذ .. وهو ما بيعرفش يقرأ كلمتين في اللغة العربية زي اللي كان بيقولهم فاروق شوشة ..ولا حتى بيعرف يتكلم أساساً في اللي أخد فيه الدكتوراة ولما تقعد معاه لا تلاقيه لا قيمة ولا قامة إلا في المقالب والمؤامرات والكلام في أعراض الناس .. يا خسارة يا بلدي على اللي حصل في تعليمك واللي خرج لنا ناس فاضية وفارغة من جوة ومن برة .. الله يرحمك يا فاروق شوشة .. والله يرحم التعليم المصري معاك ..
-------------------------------------------------------------
د.شهيرة عبد الهادي
Drshahera Abd Elhady Ibrahem
ليست هناك تعليقات:
إرسال تعليق