=========
يعلم الله سبحانه وتعالى : أنني فعلاً أُرشد الاستهلاك الكهربائي في منزلي .. أولاً :لأني مجربة انقطاع الكهرباء .. وثانياً : لكي أوفر في ثمن الفاتورة .. و ثالثاً : وإن كانت هي أولاً والله عندي ولها الأولوية -لكني أخاف أن يُزايد عليَّ أحد - ولا أدعي الوطنية لأني فعلا بحب الخير لمصر بجد وباساعد بقدر الإمكان في حل مشكلة الكهرباء باعتباري مواطن .. وعمَّالة أشيل كل الفيش الخاصة بالأجهزة التي لا أستخدمها في البيت وارجع تاني أحطها لما اكون عاوزة أشغلها .. وهكذا طول اليوم لما دخت م الشيل والحط ..وإذا كنت بـ أستخدم المكيف أطفي المروحة والعكس .. حتى فيشة البوتاجاز باشيلها مع أنه أكتر حاجة بتُستخدم في البيت .. وكمان مبنورش إلا الحجرة التي أنا قاعدة فيها وممكن يكون نور الأباجورة بس وأطفئ جميع أنوار الحجرات الباقية .. قوم .. أخرج الشارع ألاقي ناس عاملين بقالهم إسبوع أو أكثر و في أيام متتاليات .. لا أبالغ إن قلت إنهم مركبين زينة من ملايين اللمبات بتاعة الزينة دي اللي بتعمل شكل مثلثات و لمسافة لا تقل عن كيلو ونصف رايح جاي لحارتي الشارع يعني رايح جاي وكمان رايح جاي .. دا غير السرادق الخاص بالفرح والزينة اللي عليه .. دا غير الـ دي جي اللي شغال ليل نهار ..دا غير الألعاب النارية اللي بقالها سنين بيشغلوها وطبعاً مشغلينها في الفرح ده ..وانا دلوقتي سامعة صوتها وانا باكتب البوست ..و والله العظيم مرة صحيت م النوم في الفجر على صوتها وانا متخيلة أن فيه حاجة حصلت وأسلاك الكهرباء ولعت ولا حاجة ..حاكم الـ " عرب" أفراحهم يومية وطول السنة وبنفس المظاهر وبتفس الآلية .. اللي كايدني وغايظني .. بقى أن النهاردة النور اتقطع من عندنا 5 مرات من الصبح حتى الآن ولسة منتظرة القطع السادس التالي .. بينما النور مبيتقطعش عن الفرح ده لا ليل ولا نهار .. وهما على فكرة الشارع الموازي لشارعي علطوول .. يعني أنا شايفة الفرح كله من بلكونة شقتي .. مش عارفة هو الواحد عايش فعلا في عالم افتراضي خاص بيه والا إيه ؟ ومش عايش في الواقع فعلاً وبيضحك على نفسه والا إيه ؟؟؟ .. وعمال يرشد في الاستهلاك ويتعاطف مع مشكلات بلده ..ويدفع في فواتير كهرباء زادت تقريباً لأربع أضعاف المبلغ الذي كان يتم دفعه على نفس القيمة الاستهلاكية .. والناس اللي عاملة كل الزينة دي معرفش بقى هو مفيش حد بيحاسبهم ؟ ولا اليياعين اللي بيحطوا مئات اللمبات على النصبات بتاعتهم محدش بيحاسبهم ؟ ولا الألعاب النارية اللي طول النهار وطول الليل وهي بتزعجنا بأصواتها محدش بيحاسبهم ؟ وإزعاج المواطن العادي الغلبان زيي حالاتي محدش بيحاسبه ؟ ..وعلى فكرة البياعين بردوو اللي في الشارع كل واحد فيهم مولع مئات اللمبات على النصبة بتاعته !!!!!! وبيساعد الفرح في فرحه .. قوم .. أجي أولع التليفزيون ألاقيه بيديلي إشارات المرور بتاعت الكهرباء اللي هي خضراء وصفراء وحمراء .. والاحمر يقعد يلعب ويقولي الأحمال عالية .. هما قاصديني ولا إيه ولا قاصدين تليفزيوني الغلبان ههههه شر البلية ما يُضحك .. وعموماً المحليات في مصر كلها فساد فما بالك بمحليات العجمي ؟؟؟؟
-----------------------
د.شهيرة عبد الهادي
ليست هناك تعليقات:
إرسال تعليق