=========
حمدي قنديل .. بيقول : هل ممكن الشعب يعمل زي ما عمل أيام عبد الناصر لما اتعاون معاه ومنع العمرة لمدة سنة عشان حال البلد وقتها بعد الحرب .. ويمنع ذهابه الآن لأداء العمرة ويوفر فلوسها للبلد عشان الحالة اللي احنا فيها دلوقتي ..وعشان يساعد الدخل القومي لمصر في الظروف الحالية .. يا أستاذ حمدي .. أمي بتقول لي : أن عبد الناصر .. كان في عهده الرز بـ 4 قروش ..ولما احتاج فلوس عشان يبني مصنع الحديد والصلب .. اتفق مع الشعب .. يعني كان بيحترم شعبه وبيحبه .. وعشان يحمي الشعب .. قال : أنا حاعمل الرز بـ 10 قروش لمدة سنة بس .. وبعد السنة حارجعه تاني إلى 4 قروش .. ولما بعض التجار الجشعين كالعادة باعوه بـ 20 قرش .. طلع في خطاب وقال : اللي حيزود الرز عن الـ 10 قروش اللي أنا قلت عليها حاعدمه .. وعمل نفس الشئ بالنسبة لـ اللحمة .. وفي تمام السنة بالتمام والكمال وبالدقيقة والثانية رجع سعر الرز إلى 4 قروش وقال بردوو : اللي حيغليه من التجار عن 4 قروش حاعدمه .. واللي حيغلي اللحمة على الشعب حاعدمه .. وعشان كده الشعب حبه واحترمه وفاكره بالخير لغاية دلوقتي .. لكن بعد كده و بداية من عهد السادات والانفتاح السداح مداح اللي عمله واللي السادات قال فيه بالحرف الواحد : إن اللي مش حيغتني في عهدي مش حيغتنى بعد كده ..ثم عهد مبارك اللي خرب البلد وجرفها ونهبها من جميع الجوانب وهوبيقول أنا صاحب الضربة الجوية و قعد يضرب الشعب على بطنه لمدة 30 سنة لما قطع نفسه وجاب له جميع الأمراض.. ثم عهد السنة السودة بتاعت مرسي .. كل ما تيجي .. ثم في السنة السودة بتاعت مرسي .. كل ما تيجي حكومة وحتى حكومة الآن .. تبدأ تحمل المواطن الغلبان عبء الدخل القومي ..وتزود في أسعار الجاز والغاز والبنزين والمية والكهرباء والعيش اللي زي الزفت و اللي الحيوانات تقرف تاكله .. وتغلي في أسعار كل حاجة من الخضار والفاكهة ..والا اللحمة اللي سعرها على الأقل دلوقتي 100 جنيه .. والا أسعار السكن المولعة و الزيادة في كل متطلبات الحياة وووووو ... إلخ ..ومش فاضل غير الهواء يفكرولوا في حاجة هو كمان عشان يغلوه ولا يمنعوه عن الناس .. وكمان سايبين التجار يمصوا في دم الشعب براحتهم .. و كل الحكومات من أيام السادات ولحد دلوقتي بيخضعوا لأصحاب رأس المال .. والباقي حضرتك عارفه يا أستاذ حمدي .. إنتوا عاوزين إيه من الشعب تاني .. حضرتك وباقي الإعلاميين لما بتعييوا بتروحوا تتعالجوا في سويسرا .. أما سويسرا الشعب المصري هي مستشفيات في القرى والنجوع والمراكز والمدن وعواصم المحافظات .. مفيش فيها حتى حتة قطنة .. والعيان فيها بيشتري كل حاجة لعلاجه بداية من السرنجة لغاية أغلى علاج هو محتاجه.. مستشفيات فيها الفيران بتشترك مع معدومي الضمير في نهش جتت المصريين .. حرام عليكوا بقى ..
------------------
د.شهيرة عبد الهادي
المصدر: برنامج الصورة الكاملة على قناة أون تي في
ليست هناك تعليقات:
إرسال تعليق