...................
إجعله يارب خير
واجعل كلامنا خفيف عليهم
خُف ريشة طير
قلنا دي هانت خلاص
وجالنا يوم الخلاص
مصر النهارده من همومها
بتتغِسِل
وبدم بارد قالوا .. لا
مصر النهارده بتتعِصِر
وبتتنشر
من غير مشابك
والريح شديده معفَّره
والهَم شابك
فيه ناس إيديها مشبكه
وضميرها فاكِك
ناصبين شِباك مترصده
تصطاد تُرابك
وشبابنا شاب قبل الأوان
وشاب شبابِك
يا بلدنا فوقي وصحصحي
علشان ولادك
خايفين عليكي من الوبا
ومن العِدا
وقلوب ما طالهاش الندى
خيَّم على ودانها الصدا
خايفين عليكي من السَبَقْ
والجَرى ورا حبِّة نَبَقْ
خايفين نلاقي يا بلد
خُوفْنا ف مَحلُّه
بيعقَّدوا علشان يِحلُّوا
ولا عننا أبدا يحلوا
والكُل يِثُبت في مَحلُّه
ولمَّا نغرق كلِّنا
نرجع نقول ..
يارب خير
.................
فاطمة المرسي
ليست هناك تعليقات:
إرسال تعليق