كلمتين بالبلدي
==========
النهاردة عندي مشاعر حنين لبلدي .. مصر.. الغالية غير عادية .. كما لو أني قد غادرتها.. وعاوزة أرجع ليها تاني .. وعمّالة أردد المقولة دي : المصري .. حيفضل طول عمره .. مصري .. النيل رواه .. والخير جواه .. ربما نظراً لما يحدث من تغييرات في بلدي ..خلّتني أشعر بالغربة وانا داخلها ربما !.. لكن ده إحساس جالي النهارده .. وع شان كده .. عمّالة أسترجع بعض الصور الجميلة في بلدي .. ودي بقى .. الصورة الأولى ..
.. مصر دي فعلاً فيها حاجة حلوة .. تيجي تحدّدها متعرفش هي إيه بالظبط .. تلعن أبوها زي ما بيقول صلاح جاهين .. لكن ترجع تحبها وتبوس ترابها ..مصر دي البلد الوحيدة اللي تحس فيها بشهر رمضان .. وتلاقي البنات الصغيرة بتخبط على باب شقتك وتقولك يا تانت .. هاتي عشرة جنيه عشان حنعلّق زينة رمضان .. والكلام ده إمتى بأى .. قبل رمضان بإسبوعين ..لأ وإيه تلاقي كل جارة بتقول لجارتها ..شوفي انا خزنت إيه لرمضان .. خزني زيي خليكي جدعة ..إيشي لحمة مكعبات ومفرومة وإيشي فراخ وإيشي بط وأرانب وإيشي سبيط وإيشي سمك وإيشي طماطم وإيشي سجق وإيشي .. لأن في رمضان الحاجة .. سعرها بيزيد .. ولما يجي رمضان تلاقي كل واحدة من جاراتِك تجيبلك طبق قبل الفطار علطول وممكن والمدفع بيضرب كمان وانت قاعد ع الطبلية ولا السفرة .. والطبق بقى مليان وانت وبختك بقى ..فيه كنافة ..فيه بسبوسة ..فيه محشي ..انت وبختك بقى .. وبعدين يا سلام على مسجد السلام وصلاة التراويح فيه .. وبعدين وانت خارج من الصلاة تلاقي الناس كلها بتتكلم مع بعض .. وبيقولوا لجارهم المسيحي مجتش تصلي معانا ليه التراويح النهارده.. يرد عليه المسيحي ويقولوا أصل الفطار كان تقيل عليا النهارده شويتين نمت محستش معلش بقى بكرة اصلي معاكم .. ويضحكوا ويقهقهوا كلهم مع بعض ما تعرف مين فيهم مسلم ولا مين مسيحي .. وكلهم مع بعض عمّالين يشتروا ما لذ وطاب من قدام الجامع وجمبه .. وفي العشر الأواخر تلاقي صلاة التهجد .. وتلاقي الستات .. اللي بتصلي التهجد وتطلع من الصلاة تعمل الكحك والبسكويت والغريبة والبيتيفور وكل واجدة تخبط عليك عشان تدوقك عمايلها .. ولو انت مسافر في رمضان تلاقي المصريين واقفين على الطريق .. بيوزعوا بلح وميه وعلب فيها وجبات جافة وفاكهة ع الناس اللي مسافرة ع الطريق .. وأجمل حاجة بقى إنك وانت بتوزع الحاجات دي وبتحدفها جوه العربيات .. واللي بيحدفها لا يعرف مين اللي جوة العربية مسلم ولا مسيحي .. ولو طلع اللي في العربية مسيحي ومش عاوز يآخد الوجبة تلاقيك بتقله يا راجل .. ودي كلمة ميعرفهاش إلا المصريين .. فيقوم وآخد الوجبة وهو بيقلك كل سنة وانت طيب يا طيب والابتسامة على وشه .. لأ وإيه تلاقي مينا بيبيع خضار وفاكهة على ناصية الشارع تنزل تشتري منه وانته بتعاكسه وتقوله إنت صايم رمضان يا مينا ولا فاطر .. بقلك آه صايم وحافطر على أنارب بالملوخية وهو بيضحك .. مش باقلكم مصر بنت الإيه دي فعلا فيها حاجة حلوة ميعرفهاش إلا المصريين .. ويجي العيد .. تلاقي كل ست مسلمة بتدي طبق كحك وبسكويت وغريبة وبيتيفور ومنين وقرص بالعجوة لجارتها المسيحية ..ما هي جارتها المسيحية بتديها بردوو كحك وبسكويت وغريبة وبيتيفور في العيد بتاعهم .. والنبي .. حتلاقي الروح دي فين بس إلا في مصر.. وكمان بزمتك حتلاقي حد بيقول والنبي إلا في مصر ما المصريين كلهم بيحبوا النبي وآل بيت النبي والصحابة آجمعين .. وكله كوم وتنظيف الشقة ع العيد ده بقى كوم تاني .. تلاقي كل بنات مصر شعرها منكوش وعاملة زي الفنكوش .. وإيه بقى ..البلاط بيتمسح والحيطان بتتغسل والموبيليا كلها بتتلمع والملايات والستاير كلها بتتغسل .. مصر دي فيها حاجات متلاقيهاش إلا فيها هي وبس .. وعلى فكرة مفيش حد في مصر بيبص للي راكب عربية إذا كان معلّق فيها سبحة ولا صليب .. وكل اللي بيحصل فيها ده دخيل وغريب ويقلك قال إيه فتنة طائفية ..ومش عارفة إيه .. كل ده المصريين واخدين بالهم منه قوووووي ولا حد حيقدر عليهم .. دي مصر يا عم .. مصر دي تلعنها وتلعن أيامها .. وأول ما تسيبها وتروح أي مكان بعيد عنها .. تلاقيك عاوز ترجعلها بسرعة وأول ما تنزل المطار تبقى عاوز توطي على أرضها تبوسها .. ووالله كلنا عملنا كده لما اتغربنا عنها .. فعلا مصر دي حُبّها غريب على رأي الأغنية اللي بنقول .. يا بووووووي يا مصر أما الواحد بيحبك حُب .. فيها مشاكل كتير قووووووي .. وبردوووو..مصر دي فيها كل المعاني الحلوة قوووووي.. اللي متلاقيهاش إلا على أرض مصر وبس .. مصر دي هي اللي في كتير من ولادها مسبوهاش ومش ناويين يسيبوها بالرغم من المشكلات الكتير قووووووي اللي فيها ومش هيسبوها أبداً .. وهم مصممين ميسكتوش ع الظلم اللي فيها ومصممين أنهم يقضوا على الظلم ده ويرجعوها حرة مستقلة أبية عزيزة قوية .. تحيا مصر .. تحيا مصر .. تحيا مصر ..
--------------
د.شهيرة عبد الهادي
ليست هناك تعليقات:
إرسال تعليق