الله أكبر............. بقلم الأستاذة فاطمة المرسي

الله أكبر
......................
رجعت تجري ...
يا يوم الفرحة من تاني
فكرتني بالأمل
نورت وجداني
قلبي محبة طرح
على غصن أوطاني
هبيت يامصري بحماس
ورفعت رايتنا
سينا الرمال ألماس
تعرفها وحدتنا
وعبرنا وب اخلاص
والمولى قوَّانا
من كام سنة والفرَح
بيطل على روحك
ترجع يايوم نصرنا
تمسح هنا جروحك
والدم لمَّا يسيل
تعرف كده بروحك
بأنه دم أصيل
مصري وكان واحد
ليه نسيوا و اتفرقوا
وبالكره بقى جاحد ؟
إرجع يايوم العيد
خلي الوطن واحد
إخوات ايديهم تتحد
ع الحمل وتشيله
شجرة محبة الوطن
ضلل على ناسُه
واحنا جميعا فداه
في الأصل حُرَّاسه
إسأل سنين الزمن
دا المصري بأساسه
عارف أمان وحدته
وقايلها فى المواويل
بيجيب نهاره بايديه
من قلب قلب الليل
والدم يرخص مادام
رفع العلم عالي
.........................
فاطمة المرسي
إهداء لأبطال أكتوبر المغاوير
وجيش مصر العظيم