لا إله إلا الله .. اليوم وانا راجعة من الكلية وانا قاعدة جمب عم حسن السائق المثقف اللي بيوديني الكلية ويجيبني واللي كلمتكوا عنوا قبل كده من أكتر من سنة .. قعدت اتكلم معاه في حاجات كتير .. وفجأة لقيت عمي حسن .. بيسترجع معايا .. ما قاله لي يوم 2 /10 /2012 مـ .. لما قالي .. بالحرف الواحد.. لامؤاخذة يعني يا دكتورة .. " الجزم نظيفة ومتلمعة ومحطوطة في الفتارين أما العيش فـ مرمي وسط التراب في الميادين ".. وقالي مش قلتلك يا دكتورة الكلام ده من زمان .. قلتله .. بتعيد الكلام ده ليه تاني النهارده يا عم حسن .. قالي .. لما يبقى وضعنا كده بعد ثورة فرحنا بيها وماتت ولادنا عشان تحميها .. يبقى لازم أقول كده يا دكتورة .. لما نكون ماشيين في وسط أكوام من الزبالة في كل شارع وفي كل حارة في اسكندرية يبقى لازم أقول كده .. ولما يبقى لسة مفيش علاج مجاني في المستشفيات للغلابة مع السعر الغالي للدواء يبقى لازم أقول كده .. لما تبقى بنت بنتي اللي في تالتة ابتدائي وقاعدة من مدرستها بقالها شهر في البيت عشان مفيش تدريس في المدارس يبقى لازم أقول كده .. لما نبقى في الشهور اللي فاتت بنقف طوابير و عمالين ندور على السولار ودلوقتي فيه ناس بتسرقه ومش لاقينه يبقى لازم أقول كده .. لما تبقى الدروس الخصوصية لسة موجودة وبنتي تيجي عشان تستلف مني فلوس عشان تدفع فلوس دروس بنتها لأن جوزها مش قادر يدفعها يبقى لازم أقول كده .. لما اشوف المسؤلين في البرامج بيتخانقوا مع بعض ويشتموا بعض عيني عينك قدام الشعب يبقى لازم أقول كده .. لما كل حزب في البلد مبيدورش إلا على السلطة يبقى لازم أقول كده .. لما كلنا ماشيين مكتئبين في البلد بعد الثورة يبقى لازم أقول كده .. لما تبقى الناس دلوقتي بتتاجر بالدين وبلقمة العيش وبالشرف وبيسبوا الناس في شرفها كده طوالي يبقى لازم أقول كده .. لما تبقى البامية بـ 18 جنيه واللحمة بـ 70 جنيه يبقى لازم أقول كده .. دا احنا عايشين بنفطر ونتغدى ونتعشى بطاطس لأنها رخيصة و الكيلوا فيها بـ 3 جنيه يا ناس وده اللى احنا قادرين عليه وبس.. لما يبقى الناس بعد ما قعدت تنادي سنتين وتقول يسقط يسقط حكم العسكر وتيجي دلوقتي تقول عاوزين الجيش يمسك الحكم تاني وبقينا تايهيين ومش عارفين حاجة يبقى لازم أقول كده .. لما كل يوم فيه خناقة بين المسلمين والمسيحيين وشوفي اللي حصل اليومين اللي فاتوا دول في بني سويف يبقى لازم اقول كده .. لما نبقى دلوقتي بقينا نخاف نمشي في الشوارع بعد المغرب من البلطجية وشغل العافية اللي ماشي اليومين دول يبقى لازم أقول كده .. لما تبقى سرقة العربيات وطلب فدية قدام ترجيعها لصاحبها أصبحت شغلانة الناس بتشتغلها وتاكل من وراها عيش يبقى لازم أقول كده .. لما يبقى ابني متخرج من الجامعة وبيشتغل مبيض محارة يبقى لازم أقول كده .. لما خطيب بنتي يسيبها عشان مش لاقي شقة على قد الحال يعني تلمهم الاتنين مع بعض يبقى لازم أقول كده .. لما لسة بنقف في طوابير العيش والناس تتخانق مع بعضها وفي الآخر الرغيف أبو شلم يجي كله تراب وكمان بيرموه على الأرض جمب الفرن أو على الرصيف في الشارع والدبان يشيل ويحط عليه يبقى لازم أقول كده .. بجد أنا قعدت ساكتة وبصالوا .. لعمي حسن يعني .. وهو بيقولي .. والنبي تسكتي أقولك إيه والا إيه وألا إيه .. أأقولك تاني ..ولا كفاية .. بصراحة مردتش .. واسترجعت كلامي اللي قلته عليه من أكتر من سنة .. والكلام اللي قلته هو .. والله براوة عليك يا عم حسن .. لخصت القضية في كلمتين فيهم الشفا .. " الجزم نظيفة ومتلمعة ومحطوطة في الفتارين أما العيش فـ مرمي وسط التراب في الميادين ".. مش قلتلكوا من زمان أن عمي حسن السواق مثقف وفاهم وواعي وانا باتعلم منه .. أصل اللي بيقولوا على نفسهم نحب فاهمين أن هم اللي بيفهموا بس وفاهمين أن الشعب مش فاهم .. والله براوة عليك يا عم حسن .. حاقولهالك تاني وتالت .. وتذكرت نفس الكلام اللي قلته من أكتر من سنة فاتت ..يا ترى الأمراض اللي احنا كلنا بنعاني منها دلوقتي هي من هشاشة العظام ولا من هشاشة تفكير المسؤؤلين اللئام ..
-----------
د.شهيرة عبد الهادي
28 /4 /2013 مـ
بعد مرور أكتر من سنة
على كلام عمي حسن الأولاني
الإسكندرية
مصر الحبيبة
والله براوة عليك يا عم حسن
ردحذففعلا أختي في الله : والله براوة عليك يا عم حسن : تسلمي ويسلم مرورك العطر غاليتي الأستاذة سماح الفاضلة
ردحذف