كلمتين بالبلدي ...... راح التوت وفضل النبوت ......... بقلم د.شهيرة عبد الهادي

كلمتين بالبلدي
==========
**متى ينتهي شغل الفهلوة والضحك على الدقون في مصر .. للأسف .. هذا موجود في كل القطاعات والمؤسسات في مصر باختلاف أهدافها وتوجهاتها.. والمضحوك عليه عارف أن اللي قدامه بيضحك عليه .. وهو بدوره بيضحك علىه.. وكله بيضحك على كله.. وكله شغّال فهلوة على كله .. وهكذا تدور الدائرة .. وأسفاه على السلوكيات في مصر..

**
 صعبان  عليا قوووي  أن  الناس  زهقت  وبدأت  تقول   ولا يوم  من أيامك  يا مبارك .. وكمان عاوزين حكم العسكر يرجع تاني  .. بعد ثورة أبهرت  العالم  .. راح   فيها  أجمل  شباب مصر البرئ الطاهر النبيل الشريف النزيه .. اللي .. لا كان  عاوز  كرسي في برلمان  ولا  رئاسة للميدان .. 

** 
إمبارح شفت منظر بجد وجع قلبي .. أم  واخدة عيالها من المدرسة  ورايحة تركب " تمناية"  من شهر العسل .. على قمة أو ناصية الشارع  ..كانت فيه عربية كاروا واقفة  .. وعليها برنقال  للعصير حجمه صغير .. التمناية وقفت ليهم جمب العربية الكاروا  علطوول .. لقيت  الولد الكبير ابن الست دي وهو جاي يدخل العربية مع أمه بيتلفت يمين وشمال  ومد إيده على برتقالة  عشان يسرقها .. قلتلوا  أنا .. لما شفته  وهو بيحاول يسرقها .. "لأ "  .. " حرام" .. سابها .. بصيت  لأمه تاني .. أخدت عنها انطباع أنها "غلبانة" .. أو ممكن  تكون " تعبانة" .. والولد نفسه يحمل نفس الصفات .. مش عارفة.. قلت اشتري ليهم برتقال واديهلهم.. تراجعت مش عارفة ليه.. جايز خوفي من أني أحرجهم.. لكن تعبت قوووي من  اللي حصل ده .. وصعب عليا الولد قوووي .. # حرمان وشقى 

**
إمبارح بردوو  شفت  منظر عجيب وانا رايحة الإشراف على التربية العملية في إحدى المدارس..  فيه عربية "قمامة" .. قطاع خاص تقريباً .. صاحبها  رابط  في ظهرها من ورا .. كلبين .. معرفش بقى  هما حراسة والا إيه .. وقعت   "دمية"   على شكل عروسة   في حجم  طفلة  عمرها  مثلاً  4 سنوات   من العربية دي .. لقيت  الكلبين   واحد فيهم  بيمسك رجلها ويعضعض  فيها .. والتاني  ماسك إيدها  وبيعمل نفس الشئ .. وشوية يمسك رقبتها .. وشوية  يمسك دراعها .. وشوية يقلب فيها .. والناس  عمالة تتجمع  وتقول تعليقات  .. اللي  يقول  هو  بيعمل إيه .. واللي  يقول ى هو بيعزبها .. والملاحظ .. أنهم كلهم كانوا بيرددوا  الكلمتين دول " هو بيعزبها " .. ويضحكوا .. # على رأي  ستي  كانت تقول  ما  اهبل  إلا بني  آدم ..

**
كيلو التوت بـ 15 جنيه .. وطعمه مش حلو ..وكمان   مهما  غسلته ..  تلاقي  فيه رمل وتراب .. كنا زمان .. بنفرش  أي  حاجة تحت  سجرة التوت " بالسين" .. سجرة التووووت  ..ممكن مفرش ..ممكن ملاية  ..ممكن مشمع .. ممكن  حصيرة ..  ونهزها .. ينزل التوت .. ناخده ناكله  علطووول.. ومن غير ما نغسله كمان .. وكان طعمه زي العسل ..  مش زي توت  اليومين  دوول ..فينك يا زمان .. فينك  يا تووووت  #  راح التوت  وفضل النبوت

-------------

د.شهيرة عبد الهادي

18 /4 /2013مـ

الإسكندرية 

مصر الحبيبة