يا صباح الامبور في كوالا لامبور .. هههههههههههه

عرفت المعلومات دي من الدكتور خالد طحان ..
إنه دجاج لامبور غيني وهو أغلى وألذ الدواجن في العالم .. هي سلالة من الدجاج الإندونيسي يتميز بلونه الأسود من الداخل والخارج كل شيء في هذا الدجاج أسود ..ريشه جلده منقاره .. لسانه .. أضافره .. وحتى لحمه وعظمه أسود .. ويصل سعر الدجاجة الواحدة أكثر من 2500 دولار .. ويلاقي إقبالاً واسعاً من قبل اللي ربنا معطيهم ..
يعني الفرخة سعرها بالجنيه المصري 20000جنيه دا بالسعر اللي في البنك ومش بسعر السوق السودة اللي لون الفرخة .. عشان نحمد ربنا ع الفرخة البيضاء اللي من عند ممدوح بتاع الفراخ أم 50 جنيه .. ولو أن اللامبور طعمه حلو .. يا خسارة .. صحيح اللي معاه قرش محيره يجيب لامبور ويطيره .. يا صباح اللامبور في كوالا لامبور .. معلش الدنيا حر هههههههه

سؤال جه على بالي ....

سؤال جه على بالي .. هي الناس قبل ثورة 25يناير 2011م .. كانت بترمي زبالتها فين ؟ .. لما الشوارع بعد الثورة .. بقت كلها عبارة عن تلال   وجبال من الزبالة ؟

أبشروا .. معدناش حنفتح الراوتر ونقفل الراوتر .. يا مسهل .. بقلم د.شهيرة عبد الهادي

وزير الاتصلات.. المهندس خالد نجم .. في برنامج .. لازم نفهم .. على CBC extra .. حلقة الأربعاء 22 / 7 / 2015م .. مع خيري رمضان .. قال : عندنا تقنية جديدة .. مش حتخلي .. إصلاح النت .. هو .. إإقفل الراوتر وافتح الراوتر .. لأ دا فيه تقنية جديدة .. وانا المواطنة شهيرة .. زهقت النهارده .. من كتر قفل وفتح الراوتر .. ومن كتر أن النت كل شوية بيروح .. ولو.. جه .. يجي بطيء جداً.. مع أني .. دافعة الاشتراك لـ Te Data يوم الثلاثاء 21 / 7 / 2015م .. يعني من 3 أيام بس واحنا لسة في أول المدة .. أدينا مستنيين التقنية الجديدة .. يا مُسهل ..

لنا الله ولا سواه ... بقلم د.شهيرة عبد الهادي

في الحياة الدُنيا دي .. التي امتلأت فيها القلوب بالسواد والأنانية المفرطة حتى بين أفراد الأسرة الواحدة .. ولا حد حينفعك .. إلا نفسك .. ولا حد حيحل مشاكلك .. إلا أنت ..  ولا حد حيقف جمبك .. إلا  أنت  ..  ولا حد حيخرجك من الكآبة والاكتئاب اللي انت فيه بسبب تصرفاتهم وأقوالهم وأفعالهم .. إلا أنت .. ليست دعوة لمزيد من الأنانية .. وإنما .. تبصرة .. بأن تطلب العون والتوفيق من الله سبحانه وتعالى .. على أن تفهم .. تُبصر ..تتعلم من أخطائك .. تشد من عضد نفسك .. تُحبها .. تحترمها .. تقدرها.. تعطيها الثقة .. تمنحها القوة .. لعلك تستطيع .. ولعل كل ذي قلب طيب يستطيع .. لنا الله .. ولا سواه ..

الصندل والقطار والإهمال والسلوكيات الضلال ... بقلم د.شهيرة عبد الهادي ..

بعد أن قرأت عن حادثة صندل الورَّاق .. وعلمت .. حجم الإهمال والسلوكيات الرديئة لقطاع عريض من المصريين .. وعدم وجود رقابة صارمة وقوانين صارمة تطبق على الأمير قبل الغفير .. تذكرت مأسآتي مع .. قطار المنصورة - الإسكندرية ..وهو الميعاد الوحيد  المباشر  للإسكندرية  .. الذي يقوم الساعة 5.25 دقيقة فجراً من المنصورة متوجها إلى الإسكندرية .. والتي عايشتها بنفسي .. أثناء رحلة عودتي للإسكندرية يوم الثلاثاء 21 / 7 / 2015م ..لكي  أستطيع مزاولة عملي بالكلية  في الصباح الباكر ..  فقد حدث الآتي ..مُنذ وصولي  وأخي للمحطة.. ومعرفة أن القطار على رصيف 2.. ذهبت وأخي إلى رصيف 2.. وجدتنا  نشم رائحة كريهة جداً  لا تُحتمل .. ثم وجدنا القطار يقف على مسافة  بعيدة من الرصيف .. وعالي جداً جداً .. على كل إنسان مثلي ..يعاني من حادث قديم في إحدى قدميه أو خشونة في الركبة أو شلل أو أعاقة  أو أو أو .. وبالمناسبة  رُكاب كُثر  كانوا  من هذه الفئة  .. ولأننا مُلتزمين   بقدر الإمكان .. فقد  ذهبت  وأخي ..قبل ميعاد القطار بكثير  .. نحاول أن نقرأ على العربات ما يدل على  أرقامها .. فلا نجد شيئاً .. بالمناسبة  هذا القطار هو عبارة عن .. درجة ثالثة ثم درجة ثانية مميزة ثم درجة ثانية مكيفة    فقط   .. _   فاكرين "العيش المميز" _.. ولا توجد أي إشارات .. سوى على عربات الثانية مكيفة .. مكتوب عليها .. ثانية مكيفة  فقط .. بدون رقم .. وانت بقى وشطارتك  ..  دّور لغاية ما تلاقي عربيتك .. ولأن تذكرتي كانت في العربة رقم 3 .. فتصورت أنا وأخي أن عربة 3 هي الأخيرة .. فذهبنا إليها .. وصعد أخي إلى العربة لكي يأخذ بيدي .. لأن العربة عالية جداً.. عايزة  واحدة بتعرف تلعب جُمباز .. وانا بالطبع مبعرفش .. وكانت مُصيبة سودة .. الواحدة لازم ترفع  هدومها   لفوق قوي  عشان   تعرف  تنط  في  القطار .. والحمد لله أن فيه اختراع إسمه البنطلون .. بتلبسه الست الأيام السودة دي .. ركبنا القطار .. فإذا بنا نشم رائحة أكثر كراهة مما كانت خارج القطار .. والقطار مُستهلك  وزجاج الشبابيك مكسور  والكرسي ضيق جداً   والعربات غير نظيفة  .. وإذا بنا نرى ناس كتير نايمة في القطار .. والقطار ضلمة  وحر  ورائحة كريهة  وسواد السواد .. أخي قال لي .. تصدقي أنا سألت على العربة دي اللي نايمين فيها .. طلعت مش عربة 3 .. وعربة 3 في بداية القطار .. قُمنا عشان نروح عربة 3.. بس من داخل القطار .. معرفناش نمشي من الضلمة والكتمة والحر والريحة  .. فقعدنا لغاية ما شغّلوا النور والمكيف .. حبيت أروح  دورة المياه     ومقلكش  على  قذارتها  في منتهى  القذارة .. المصيبة السودة الثانية  بقى .. إن احنا واحنا رايحين عربيتنا .. كل واحد يعرف أننا رايحين عربية 3 بندور على مقعد 24 .. يقول .. يا باشا أأقعد في أي مكان  وبعدين اللي يجي يجي .. دا  احنا بنقعد في الطيارة  من  غير أرقام  !!! .. وكل ما يجي راكب   جديد  يقولوا له نفس الكلمتين  دول .. ليه  ؟  لأنهم محتلين  كراسي غير كراسيهم  ومش حاجزين .. وكأنه بينصحك  نصيحة غالية  وهو بيضحك وفرحان قوي   بالتعدي على حقوق الغير  .. واحنا حنطأ  ومنردش  عليه .. المهم .. قعدنا في مكاننا .. وبدأت مأساة جديدة .. كل واحد جاي ومش حاجز أصلاً من الشباك .. فـ يقعد في أي مقعد مش بتاعه  .. ويبدأ  شغل الفهلوة  والاستعباط والهمجية  والاستظراف واللعب بالبيضة والحجر والضحك ع  الدقون  .. كل واحد  يقعد في المقعد اللي يعجبه ويختار  المقعد اللي جمب الشباك .. ولما يجي صاحب المقعد اللي  التزم  وقطع تذكرة م الشباك قانوني .. يبدأ يعمل عليه تمثيلية  من تمثيليلات المصريين وفهلوتهم المعروفة  ويعمل إنه من بنها .. وميقمش له  ويظل  جالساً  في المكان اللي اغتصبه ..  ويمثل   تمثيليلة  كما لو أنه صاحب المكان ويعمل أنه بيبص م الشباك  .. لأ  ويزود التمثيليلة ويقول له  كمان .. عيب يا ابني دا أنا قد والدك  .. طيب لما انت راجل كبير وبذقن كمان  وماسك المصحف في إيدك  ومش حاجز ما تلتزم   ..  طيب ما تقول الحق   .. لكن ليه يلتزم ؟   ليه   يقول الحق ؟  ..  ليه  ميآخدش  حق غيره ويقول أنا راجل كبير!! .. شوفوا بقى المصيبة التالتة دي ..لما الشاب اللي مسروق حقه  .. طلب الكمساري  عشان يجيب له حقه .. الكمساري  لوّع في الكلام  .. ومرضيش يقول الحق .. شوفوا بقى اللي جاي بعد كده  كمان .. الكمساري نفسه جاب واحد تاني وبيدور له على مقعد .. طبعا  حضراتكم عارفين هو عمل كده ليه ؟ .. يعني هو متأكد أن فيه مقاعد لم يتم حجزها !!!.. والشئ  العجيب  أن كل واحد لما يروح  يحجز من الشباك  .. موظف الشباك يقول له معدش فيه تذاكر .. وتطلع القطار تلاقي فيه  أماكن فاضية .. وتبقى محتار في كل الظواهر اللي إنت شايفها  وسامعها  .. ومش  عارف تحدد مين اللي غلطان  .. شوفوا كمان المصيبة الكبيرة اللي جاية دي .. بدأ القطار كما لو أنه قطار قشاش  وليس مكيف .. كل ما تيجي  محطة  من أول طلخا  لغاية نهاية الخط .. وخاصة أبو حمص ودمنهور وكفر الدوار .. يحمل ركاب يحمل ركاب يحمل ركاب .. لدرجة أن المكيف  .. كان واقف في الطرقة بتاعته  بدون مبالغة   3 أضعاف اللي قاعدين على الكراسي  .. والرائحة كانت لا تطاق   والألفاظ القذرة   التي تسمعها لا تطاق   والخناقات بين الستات والرجالة لا تحتمل .. وقلة الأدب والسفالة والهمجية وعدم الاحترام وعدم النظافة وعدم النظام   وعدم الأريحية ووووو  والسلوكيات الرديئة   الحقيرة  .. تخيل سعادتك لو  هذا القطار  كان عمل حادث .. معنى ذلك أنه  سيكون فيه آلاف الضحايا بدون مبالغة .. لأنه كان مركب أضعاف أضعاف   حمولة الدرجة الثالثة والدرجة  الثانية المميزة والدرجة الثانية المكيفة .. فعلاً إحنا في بلد ملهاش صاحب .. بلد  لا يُحترم فيها القانون ولا النظام ولا النظافة .. بلد كل سنتيمتر فيه  ملئ بالفساد والرشوة والمحسوبية..   بلد سلوكيات قطاع عريض من شعبها في منتهى الرداءة .. ولن نتغير إلا إذا غيرنا من أنفسنا .. ولا بد من تطبيق قوانين صارمة .. وتفعيل القوانين المحنطة في الأدراج .. وتوقيع عقوبات صارمة على المخالف ..عاوزة أأقول  حاجة    حصلت في القطار بردوو .. على هامش هذا الواقع المرير .. وهي .. من المفارقات  العجيبة  .. أن  طفلة  في سن الرابعة عشرة تقريباً .. كانت أمامي وكان كرسيها مسروق بردوو .. سمعتني وانا  باكلم نفسي  " زعلانة من تصرفات البشر  دول " .. فقالت لي : " هو انت  من مصر؟ " .. قلت لها : " نعم من مصر" .. ولاحظت أن لهجتها  غير مصرية .. فسألتها  .. " إنت منين يا قمر" .. قالت :بابا  مصري  بس ماما عراقية  .. واحنا  كلنا جايين " سياحة في مصر ورايحين  اسكندرية  سياحة   بس بصراحة   العراق أحسن " ..وكنت  قد سمعت والدها يُناديها  " فاطمة" .. قلت لها : إزاي  يا فاطمة ؟ .. دا  العراق فيها حروب .. قالت  : فعلا  بس  مش في كل الأماكن .. إحنا  في بغداد   ومفيش  الزحمة  والحاجات اللي انا شايفاها دي  هنا  .. طبعاً أنا قلتلها وانا قلبي  بيتقطع   على بلدي   وأعصابي تعبانة  م  اللي شفته  وسمعته  : مصر أحسن بلد في الدنيا .. إحنا بننتقد أنفسنا .. عشان عاوزين بلدنا  تظل أحسن بلد في الدنيا ..يا فاطمة ..
----------------------------------------------------------------
د.شهيرة عبد الهادي
#Drshahera_Abd_Elhady_Ibrahem

تحية إلى ناصر في ذكرى ثورة 23 يوليو .. بقلم د.شهيرة عبد الهادي

تواريخ شكَّلت وتُشكِّل  وستُشكِّل ..ماضي وحاضر ومستقبل مصر .. يربط بينها .. أن الهدف واحد .. وهو .. الأمل في تحقيق .. العيش والحرية والعدالة الاجتماعية والكرامة الإنسانية .. لكل فرد من شعب مصر .. بدأت بثورة 23 يوليو 1952م .. وانتفضت في ثورة 25 يناير 2011م .. وصُحح مسارها في 30 يونيو 2013م .. ورُسمت لها خارطة طريق في 3 يوليو 2013م .. وستظل مصر .. بقدرة الله وفضله .. شعباً وجيشاً في رباط إلى يوم الدين .. مصر لن تموت .. كل عام وحضراتكم بألف خير بمناسبة ذكرى ثورة يوليو وتحية إلى ناصر ..

وحشتوني .............

السلام عليكم ورحمة الله وبركاته وكل عام وجضراتكم بألف خير يا أغلى وأجمل وأحلى أصدقاء وصديقات وإخوة وأخوات وزملاء وزميلات وأساتذة وأستاذات وأبناء وبنات في العالم كله .. ويا رب تكونوا قضيتوا رمضان جميل وعيد فطر أجمل .. وأشكر كل محترم ومحترمة قد سأل عني في فترة غيابي سواء بالتليفون والموبايل أو الرسائل وبـ اعتذر عن عدم الرد على الرسائل لأني بأمانة كنت لا أستطيع الجلوس أمام الجهاز الفترة الماضية .. ويا رب يعطيكم الصحة والعافية ويبعد عنكم المرض ويبعد عنكم شر الحاسد والكاره والباغض والحاقد والعارض ويجعل أيامكم الجاية أفضل م اللي فاتت ..آمين يا رب العالمين ..

تعالوا مع بعض نقوم بالدعاء لجيش مصر العظيم واحنا بنفطر .. بقلم د.شهيرة عبد الهادي

تعالوا كلنا نقوم بالدعاء واحنا بنفطر ..لجنودنا ..جنود جيش مصر العظيم ولاد فلاحين وعمال وصعايدة مصر .. اللي في سيناء واللي ع الحدود .. اللي صايمين .. وفي حالة حرب دائمة مع الإرهاب الأسود .. جنودنا دول بيستشهدوا وهم صايمين من يوم 10 رمضان وحتى الآن .. ومن قبلها بزمان وهم بيستشهدوا ومن بعدها وهم ح يستشهدوا ..وطول عمرهم بيستشهدوا عشان احنا نعيش .. دوول اللي بيحمونا .. إحنا بنفطر في بيوتنا .. واللي بيفكر يعمل صينية كنافة ع الفطار واللي بيفكر يطبخ إيه جديد كل يوم ع الفطار .. ودول بيموتوا ع الحدود وفي سيناء كل يوم .. اللهم قويهم .. اللهم اهلك أعداء مصر وأعداء الجيش المصري في الداخل والخارج .. اللهم ارحم شهداء جيش مصر العظيم وصبر أهاليهم وصبر شعب مصر كله .. آمين يا رب العالمين ..ولازم نفتكر أن الجيش المصري ده اللي هو من كل بيت في مصر ..راح منه ما بين 120 ألف إلى 250 ألف جندي ما بين شهيد ومفقود  ومبتور أجزاء من جسمه  ووو... إلخ ..عشان مصر وعشان فلسطين وعشان القضايا العربية .. دا بس عشان الناس اللي بتشتم فيه تفتكر ..

قتل أكثر من 100 إرهابي على يد الجيش المصري في سيناء واستشهاد 17 جندي مصري من بينهم 4 ظباط وإصابة آخرين من بينهم ظابط ..

قامت مجموعة  من الإرهابيين مُنظمة مُسلحة تسليح على أعلى مستوى بالهجوم  على 4 كمائن خاصة بالقوات المسلحة المصرية في رفح والشيخ زويد بسيناء  في الساعة السادسة والنصف من صباح اليوم الأربعاء 1 من يوليو 2015مـ الموافق 14من رمضان 1436هـ .. وتعاملت معها  القوات  المصرية التي كانت بتلك الكمائن  وقتلت منها 20  إرهابياً  في البداية .. ثم توسعت المواجهة  واشتركت القوات المسلحة المصرية  واشتبكت مع القوة الإرهابية  براً وجواً باستخام الطائرات الأباتشي ..وأسفرت  المواجهة عن أكثر من 100  قتيل إرهابي   وآخرين  أسرى ما زالوا على قيد الحياة .. ومن جانب القوات المسلحة المصرية فقد  تم استشهاد 17 جندي من بينهم 4 ظباط .. وإصابة آخرين من بينهم ظابط .. وفقاً لما أعلنه المتحدث العسكري باسم القوات المسلحة المصرية محمد سمير .. هذا ويُذكر أن بعض الصحف المصرية والمواقع المصرية كانت  تقول أن هناك أعداداً بالمئات من الجيش المصري قد تم قتلهم ..وقد ثبت إن هذه المعلومات هي شائعات .. مع ملاحظة أن الإرهابيين كانوا يرتدون ملابساً  قريبة في الشكل من ملابس الجيش المصري  وقد يكون هذا هو سبب الارتباك  واللخبطة في التقارير.. هذا ويقال أن بعض هؤلاء الإرهابيين ليسوا مصريين وأن بعضهم من تركيا وإيران وقطر .. الله يرحم شهداء مصر من جنود وظباط القوات المسلحة .. آمين ..
-------------------------------------------
د.شهيرة عبد الهادي 
#Drshahera_Abd_Elhady_Ibrahem

الله يرحمك .. خلص الكلام .. وإلى الأمام يا مصر .. وستبقي ولن تموتي يا مصر .. بالرغم من الحُزن الذي يملأ قلوبنا .. ستعيشي يا مصر ..وستقهري الإرهاب الأسود ..

الله يرحمك .. خلص الكلام .. وإلى الأمام يا مصر .. وستبقي ولن تموتي يا مصر .. بالرغم من الحُزن الذي يملأ قلوبنا .. ستعيشي يا مصر ..وستقهري الإرهاب الأسود ..

اللهم احفظ مصر من كل سوء وشر .. قولوا آمين ..

يارب مصر التي أرسلت لها يوسف ليحفظها من سنوات العجاف
يارب مصر التي أرسلت لها موسي ليحفظها من عبادة الأصنـام
يارب مصر التي أرسلت منها هاجر زوجة إبراهيم عليه الســـلام
يارب مصر التي جعلت منها مارية القبطية زوجة لحبيبك العدنان
يارب مصر التي أرسلت فيها عيسي بـ إنجيلك عليه الســــــلام
يارب مصر التي ذكرتها في قرآنك ووصفتها بالأمن والأمــــــــان
اللهم احفظ مصر من كل سوء وشر يا أرحم الراحمين ومن أراد باهلها كيداً فعليك به يارب العالمين ..
يارب لقد عجزت أيدينا على وجود الحل .. ولم تعجز ألستنا عن سؤال من بيده النجاة وفيه الرجاء والأمل ..
يارب لقد عجزت عقولنا عن التفكير .. ولم تعجز أفئدتنا على مناجاة من بيده التدبير..يارب يارب يارب ..احفظ مصر.. يارب ياعظيم ياعظيم ياعظيم ..أنت لها ولكل أمر عظيم ..أسألك أن تفرج عن الشعب المصري ..بحق بسم الله الرحمن الرحيم ..اللهم إني استودعتك مصر وأهلها.. أمنها وأمانها.. ليلها ونهارها.. أرضها وسماءها.. فـ احفظها ربي من كل سوء ..آمين آمين يا رب العالمين ..

إرضاء الشعب المصري يجب أن يكون هو الغاية .. بقلم د. شهيرة عبد الهادي

أغتيل الشهيد المستشار هشام بركات  الرمز  ذو الدلالة  وأصيب من كانوا معه .. وفي نفس اليوم  .. أغتيل مدير عام الطرق والكباري في سيناء ومعه  11 شخصاً منهم من مات ومنهم من أصيب  .. واليوم تفجيرات  كان ضحيتها  وفاة  تلاث شخصيات .. وقبلهم الكثير وبعدهم الكثير  من الشعب والجيش والشرطة والقضاء.. والوافع والأسباب والملابسات معروفة .. وما زالت المكلمات  هي السائدة في الإعلام .. والاتصالات  ذات الاقتراحات تتوالى  على البرامج  الإعلامية .. نفس الكلمات  بنفس الترتيب بنفس التوجه  والتي قيلت من قبل مئات المرات .. هذا ينادي بعودة حبيب العادلي ورجاله .. وهذا ينادي بالعدالة الناجزة .. وهذا ينادي بقانون الطواريء .. وهذا ينادي بقانون الإرهاب .. يا سادة .. الموضوع .. ليس كل ما تنادون به بالرغم من أهمية دلالته  بالتأكيد .. لكنه قد تم  ذكره من قبل مئات المرات دون جدوى  .. الموضوع .. هو .. أن ثورة 25 يناير 2011م .. قد أحدثت  خلخلة   في وجدان ووعي الشعب المصري .. لم يعد الشعب المصري .. هو شعب ما قبل 25 يناير .. الشعب المصري .. لم يعد يقنعه  ما كان يقنعه سابقاً .. ولذلك .. الموضوع يتلخص في  وجود .. إدارة واعية لها رؤية  ورسالة واستراتيجية  واضحة .. في ضوء  تلك الخلخلة التي حدثت في وجدان  ووعي الشعب المصري الجديد .. إدارة  تحقق له أهداف  الثورة  ..  في ضوء أنه شعب فلسفته  الأساسية ..أنه يريد أن يعيش .. بمعنى أنه يريد لقمة هنية بكرامة وسهولة وعدالة  وحرية وأمن وأمان  مع تعليم جيد ورعاية صحية تحترمه ووو... إلخ.. وهو ده الشعب المصري ..بعيد عن أي مكلمات .. وهذا ليس عيباً .. ففهم الشعب جيداً هو بداية النجاح  ..  ولابد من إرضاء الشعب المصري وتحقيق أماني وآمال ثورته  حتى يتعمق مفهوم  الانتماء لديه  لوطنه  وتختفي  أو تقل مساحات الخيانة الداخلية   للوطن.. ثم القصاص له  .. وحينئذ  يتم القضاء  على أو الإقلال من الإرهاب  ..  #وتحيا_مصر_
----------------------------------------------------
د.شهيرة عبد الهادي
#Drshahera_Abd_Elhady_Ibrahem

رمضانيات 1436هـ(9) ..

رمضانيات 1436هـ(9) ..
-----------------------------
ونحن في شهر التصالح ..
عبقرية النفس الشرية السوية .. أن تكون مُتصالحاً مع نفسك مع فكرك مع قولك مع فعلك مع الآخر " جواك زي برَّاك" .. في مناخ مريض يكون للمرء فيه " أكثر من وش" ..
------------------------------------------------
د.شهيرة عبد الهادي
‪#‎Drshahera_Abd_Elhady_Ibrahem‬

رمضانيات 1436هـ(8) ..

رمضانيات 1436هـ(8) ..
-----------------------------
ونحن في شهر العفة ..
عبقرية النفس الشرية السوية .. أن تكون مُتعففاً .. في مناخ مريض ندر فيه التعفف وامتهن فيه الأغنياء التسول والسرقة..
-------------------------------
د.شهيرة عبد الهادي
‪#‎Drshahera_Abd_Elhady_Ibrahem‬

معلومة مفيدة .. بقلم د. شهيرة عبد الهادي

الأفاضل والفضليات اللي عندهم ضغط وقلب وكده يعني وصايمين .. يشربوا ماء قبل الفجر مباشرة .. عشان أكبر نسبة لزوجة في الدم بتكون ساعة الفجر والواحد نايم .. وعشان كده أكتر حالات الجلطات والوفاة بتكون ساعة الفجر.. وسامحوني باين عليا عملت زي بتوع الإعلانات ههههههه .. هي معلومة بس حبيت أأقولها للاستفادة .. وطبعاً أنا معنديش حاجة ولا خايفة ولا حاجة ههههههه .. أنا قرأت الكلام ده ويا رب أكون نقلته صح ..وطبعاً المعلومة دي تنفع للجميع يعني للأصحاء أيضاً .. الأطباء بقى يصححولي لو فيه حاجة .. وربنا يدينا ويديكم الصحة والعافية وطولة العمر ويحسن خاتمتنا .. 
--------------------------------------
د.شهيرة عبد الهادي

إتبرع بضميرك من أجل مصر .. بقلم د.شهيرة عبد الهادي

إتبرع بضميرك من أجل مصر ..
================
يا ريت بدل ما يقولوا في الإعلانات " إتبرع ولو بجنيه " .. يقولوا " اتبرع بضميرك من أجل مصر" .. ويكونوا هم أول ناس تتبرع بضميرها من أجل مصر .. ويا ريت كمان من أوائل الناس اللي تتبرع بضميرها من أجل مصر .. يكونوا هم المسؤولين عن الإعلام اللي بيشكيل الوجدان المصري .. والمسؤولين عن الفن والإبداع في مصر .. و كمان يتبرع كل مسؤول في مصر بضميره من أجل مصر.. نعم كل مسؤول عن أي عمل مهما كانت بساطته إلى أكبر عمل يخدم المصريين ..
--------------------------------------------------
د.شهيرة عبد الهادي
‪#‎Drshahera_Abd_Elhady_Ibrahem‬

حول المتاجرة بالأطفال الأطفال في الإعلانات التليفزيونية خلال شهر رمضان الكريم .. بقلم د. شهيرة عبد الهادي

قلنا المسلسلات اتكلفت 900 مليون جنيه وده حرام خاصة وأن مستواها مندني خلقاً وفناً وإنه يا ريت الفلوس دي كانت راحت لأعمال خيرية أفضل .. وقلنا المسلسل مبقاش إسمه مسلسل دا بقى إسمه إعلانات تتخللها مشاهد تمثيلية .. وقلنا أنهم بيغيظونا لما بعد التكلفة دي كلها .. يجيوا في الإعلانات ويطلبوا التبرع ولو بجنيه واحد لمستشفى السرطان ومستشفى الحروق ومستشفى يعقوب وووو.... إلخ .. لكن اللي يغيظ أكتر ..ومش بس يغيظ .. دا بيخلي الواحد في حالة اكتئاب علطول .. إنهم يجيبوا طفلة محروقة في الإعلان وبتتكلم يا حبة عيني على حرقها بالكلام اللي هم حفظوه ليها .. وطفل تاني معاق وطفل تاني عنده سرطان وطفل تاني مشلول وطفل تاني مبتور جزء من جسمه .. طيب ما رأي الدين في الإتيان بالأطفال هكذا في الإعلانات ؟ ..طيب هل ده عمل إنساني ؟ هل إظهار الأطفال يا ناس كده عمل إنساني ؟.. يا ريت حد يفيدنا والله في الموضوع ده ..
----------------------------------------------
د.شهيرة عبد الهادي
‪#‎Drshahera_Abd_Elhady_Ibrahem‬

رمضانيات 1436هـ(7) ..

رمضانيات 1436هـ(7) ..
-----------------------------
ونحن في شهر الإخلاص ..
عبقرية  النفس السوية.. أن تكون مُخلصاً.. لنفسك لأسرتك لعملك لصديقك .. في مناخ مريض ندر فيه الإخلاص ..
-------------------------------
د.شهيرة عبد الهادي
‪#‎Drshahera_Abd_Elhady_Ibrahem‬

رمضانيات 1436هـ(6) ..

رمضانيات 1436هـ(6) ..
-----------------------------
ونحن في شهر المباديء ..
العبقرية .. أن تكون وفياً.. وأن تعتبر ذلك من المناقب وفضائل الأعمال .. في مناخ مريض ندر فيه الوفاء ..مناخ يعتبر الوفاء إحدى مقدمات التملق والبحث عن المصالح .. من وجهة نظر ضعفاء النفوس ممن أنت مُصر أن تكون وفياً معهم ..
-------------------------------
د.شهيرة عبد الهادي
‪#‎Drshahera_Abd_Elhady_Ibrahem‬

يا رب .. يا الله .. اللهم أنعم عليَّ وأحبتي في الله بالصحة والعافية .. آمين ..

يا رب .. يا الله .. اللهم أنعم عليَّ وأحبتي في الله بالصحة والعافية .. آمين ..