نعم
هناك مظاهرات في الجامعة .. نعم هناك ازدحام شديد في المواصلات ..و
الطرق متوقفه وشبه جامدة .. بسبب تلك المظاهرات .. وأصبحنا نذهب إلى
كليتنا قي 3 ساعات ..ونعود منها في 4 ساعات . نعم نشعر بإرهاق غيرعادي..
لكننا لم نتوقف عن العمل ولن نتوقف عن العمل.. وبدأناه فعلاً من أول
يوم دراسة.. من يوم السبت 11 / 10/ 2014م .. تنظيم مواعيد .. إلقاء
محاضرات ..إرشاد طلابي .. سيمنار علمي .. وسنستمر في العمل .. من عنده
ضمير .. سيضع مصر في عينيه .. ولن تُغلق الجامعات المصرية ..كما يُنادي
البعض من الشعب الذي لا يريد أن يعمل ..وبعض من النخب ورجالات الإعلام
المنافقين ..الذين لا يبحثون إلا عن مصالحهم الشخصية .. وطلابنا في عيوننا
لأننا بدونهم لا نساوي شيئاً .. نراعيهم بالعمل والتعليم الجاد .. نعم
ننتقد الأوضاع من أجل اصلاح مصر .. لكن لا نسعى لهدم مصر .. #ولـ_تحيا_مصر_الأشخاص_زاائلون__ومصر_باقية_
(مواقف حياتية) : سلوكيات من الواقع المرير
-------------------------------------------------
سكان بعض العمارات المصرية .. كل مالك شقة أومالكة شقة .. يهتم جداً
بنظافتها ويخليها عروسة .. يُغير دائماً من أثاثها .. ويأتي بالأحدث
والأجدد.. يغير من بلاطها وسيرامكيها ومن دهانها وكمان ممكن يعملها
خشب.. ثم يضع .. أمام شقته -وآسفة للألفاظ لكني أرصد الواقع المؤلم-
مليون شبشب وجزمة .. وأكياس زبالة بتخر مية معفنة ويسيبها على السلم
بالأيام .. وكمان يضع صفيحة زبالة فيها مخلفات تانية
..وكراتين فاضية وقطع خشب مستهلكة ..وحتت قماش لزوم مسح الجزم والشباشب
.. ويضع كمان مقشة وجردل ومساحة .. وكل الأجهزة القديمة اللي اتخلص منها
على السلم وأمام شقته .. ناهيك عن رمي المناديل ورمي أعقاب السجاير
وأغلفة البسكويت وبوزو وميزو واللي بالجبنة واللي بالطماطم على السلم و
كمان بيبصقوا عليه .. ومش بس كده دا ممكن يحطوا زبالتهم كمان قدام
شقتك.. وكمان ينفضوا السجاجيد على السلم .. وكمان يغسلوها ويحطوها على بسطة
السلم ويسيبوها تخر مية بالأيام .. كمان بيحطوا زبالتهم في دخلة
العمارة ومكان إيه بقى مكان أحواض الزهور.. وكمان بيسيبوا مخلفات خروف العيد بالأيام والليالي في دخلة
العمارة بعد انتهاء العيد بزمان .. ومهما تتكلم معاهم مفيش فايدة.. لا
احترام للجار ومشاعره ولا احترام للملكية العامة .. وآدي يا سيدي بعض
السلوكيات لبعض المصريين المسلمين .. مع أن كل الأديان السماوية نهت عن
إيذاء الجار والرسول عليه الصلاة والسلام قد أوصى بالجار.. نعمل إيه .. لله الأمر من قبل ومن بعد .. والآخر نقول
عاوزين مصر تتقدم ..
----------------------
د.شهيرة عبد الهادي
(كلمتين بالبلدي):احترت واحتار دليلي
-------------------------------------
مفيش فايدة .. فئة ليست صغيرة من الشعب المصري .. متخصصة في صناعة .. الفرعون .. وتقعد .. تتمحلس .. وتمسح جوخ .. وتنافق رئيسها..لغاية ما تعمل منه فرعون فعلاً .. وده بيحصل على كل المستويات .. بداية من خولي الأنفار في الغيط ..مروراً.. بكل المناصب .. حتى أكبرها.. وفي نفس الوقت .. كل اللي عاوز من الـ " كبارات " دوول .. يبقى صاحب منصب .. يقعد يتمحلس للي تحت منه لغاية ما يآخد المنصب ده.. وأول ما يآخد المنصب ..بيكون عاوز يبقى فرعون فعلاً..و يبدأ يتحكم في خلق الله .. ويتصرف تصرفات صغيرة قوي .. ويبدأ يتجاهل كل من أوصله لهذا المنصب.. وأهم حاجة عنده أنه يحافظ على منصبه وكرسيه .. الواقع مؤلم للغاية .. والحياة الواقعية صعبة ومحزنة للغاية .. تلاقي .. طول ما انت قاعد ..تشوف .. سلوكيات غاية في الضآلة .. ده داخل على صاحب المنصب.. يآخده بالحضن وهو مبيطقوش أساساً .. ودي داخلة عليه .. تقول له .. شفتك امبارح في الحلم وكنت لابس أبيض في ابيض يا بختك .. وده يشوفه يقول له .. والله واحشني .. وهو كان لسة معاه من ساعة .. ودي عمَّالة تقول له .. أنا بابايا مات وانت بابا بقى دلوقتي .. ودي عمَّالة تقول له : انا مامتي ماتت وانت مامتي من دلوقتي .. ودي بتقول له ..أنا باقلك كل حاجة قبل ما باقولها لأي حد في بيتي شوف معزتك عندي بقى يا بويا .. وده يقول له .. أنا بحبك عشان انت شبه جوز خالتي.. وده يقوله : إسم جدي على إسم عيلة سيادتك العريقة .. و .. وده يجيب له بسكوت .. وده يوصلوا بالعربية .. ودي تديلوا شيكولاته .. وده يديلوا منديل.. مع إنه مش محتاج يعني .. لأنه مظبط أموره كويس قوي يعني .. واللي بينافقوه بحاجات أفظع من ذلك عشان يآخدوا اللي عاوزينه .. وبعد ما يخرج من المنصب .. أو بعد ما يآخدوا منه اللي كانوا عاوزين يآخدوه منه .. وده بيحصل كتير .. يلعنوا سلسلفيل جدوده ..ويبدأوا يشهروا بيه .. ويقول عليه ما قال مالك في الخمر.. وإنه كان بيستغلنا وإنه وإنه وإنه .... إلخ .. وبعد إيه .. بعد ما تكون الدنيا خربت .. وبعدين فيه حاجة غريبة جداً في الفئة دي .. مبيعرفوش يفرَّقوا .. بين الأدب والأخلاق والذوق والطيبة في المعاملة .. و بين النفاق.. ليه بقى .. عشان كلهم بينافقوا بعض .. فـ لما يلاقوك .. مؤدب محترم عاوز تعيش في سلام .. يبدأوا ينغصوا عليك عيشتك .. ويتصرفوا تصرفات غاية في التدني .. شئ مقزز ويؤدي إلى الشعور بالغثيان وتصرفات متدنية ..يبدوا .. أنها جينات في بعضٍ من الشعب المصري ومن المستحيل تغييرها .. بجد.. احترت واحتار دليلي .. ويبدوأ .. أنه .. فعلاً .. مفيش فايدة ..
----------------------
د.شهيرة عبد الهادي
( مواقف حياتية ) موقف حياتي من الواقع فعلاً يحتاج تفسير حضراتكم ليه ؟ورأي حضراتكم فيه ؟..
-----------------------------------
سكان عمارة واحدة من المصريين .. كل واحد فيهم ..لما بيسمع راديو التاني بيذيع قرآن .. أو تليفزيون التاني بيذيع قرآن .. أو بيذيع مادة آخرى .. بيروح يشتكي لبقية السكان .. إن صوت الراديو عالي.. وإن صوت التليفزيون عالي.. وعاوز يعمل خنانقة مع جاره بأي طريقة .. وهم فعلاً .. اتخانقوا مع بعض كلهم بالتتابع .. جالهم واحد في الشارع قدامهم .. قام ببناء عمارة كده في شهر زي الموضوع اللي بيحصل في جميع أنحاء مصر منذ قيام ثورة يناير ..والعمارة فيها من تحت محلات خاصة بيه شخصياً .. هو من ساعة ما العمارة خلصت .. بقى ليل نهار .. بيشغَّل القرآن بصوت عالي جداً جداً جداً.. لدرجة إن صوته بيوصل إلى داخل كل حجرات شقق هؤلاء السكان البعيدة خالص خالص خالص جوة في شققهم .. وفي الأدوار العليا كمان .. وكمان بيسيب القرآن بصوته العالي ده شغَّال .. طول الليل والنهار .. وكمان بيسيبه شغَّال ليلاً طول الليل ..بعد ما بيقفل المحلات في الليل خالص .. يعني بيقفل محلاته ..والقرآن شغَّال حتى صباح اليوم التالي وهكذا كل يوم وليلة .. ليه بقى السكان دول .. مبيشتكوش من الراجل ده ؟.. ليه مراحوش اتخانقوا معاه زي ما بيتخانقوا مع بعض ؟.. والا مثلاً هو له ظهر في الحتة وهو من كبارات الحتة ؟ .. وعشان كده خايفين منه ؟..طيب مش ده عيب بردوو ؟ .. أنهم يمسكوا في خناق بعد !! .. وما بيحفظوش على بعض !!.. ويبضايقوا في بعض علطول !!.. وميقدروش يتكلموا مع الراجل ده ؟ .. ولا إيه بالظبط ؟ .. ما تفسير حضراتكم بجد للموقف ده ؟ .. ونسمى اللي بيعملوه ده في بعض إيه ؟ .. ونسمي موقفهم ده إيه ؟ .. مع العلم بأن الموضوع ده بقالوا سنة .. من ساعة هو ما خلَّص بناء العمارة بتاعته ؟؟!!.. وآدي يا سيدي عينة من سلوكيات بعض المصريين !! ..اللي لو بصينالها ممكن نلاقي أن فيه تشابه ..أو أنها صورة مصغرة للي حصل في مصر من أيام الثورة ولغاية دلوقتي !!..
----------------------------------
د.شهيرة عبد الهادي
كل عام دراسي جامعي جديد وحضراتكم بألف خير
---------------------------------------------------------
غداً السبت 11 / 10 / 2014م أول أيام العام الجامعي الدراسي الجديد في
مصرنا الغالية .. كل عام وحضراتكم بألف خير.. أساتذتي وأستاذاتي ..زملائي
وزميلاتي ..طلابي وطالباتي ..إخواني وأخواتي .. الموظفين والموظفات ..
والمسؤولين عن الأمن والمسؤولات ..ولمن لا نستغنى عنهم أبداً.. كل العاملين
والعاملات بالكلية .. وكل شعب مصر .. وأقول لطلابي وطالباتي: أنتم في
العين والقلب أنتم زهور قلبي .. اللهم اجعله عام دراسي سعيد مجيد وبالخير
جديد .. اللهم احفظ مصر.. اللهم احفظ جامعات مصر.. اللهم احفظ كل مؤسسات
مصر.. مُتطَّهرة طاهرة من الفساد والمفسدين ..مليئة بالنبلاء وأولاد
الأكرمين ..
---------------------------
د.شهيرة عبد الهادي.
ما أنت عليه .. والمكان الذي أنت فيه .. هو نتاج تفكيرك ..
لكي تغير ما أنت عليه .. والمكان الذي أنت فيه ..
عليك أنت .. تغيير .. طريقة تفكيرك ..
وليس للقلبِ غذاءٌ ..
سوى .. استشعار ..
معاني ..
كلمة .. أحبك ..
--------------------
د.شهيرة عبد الهادي
المجموعة الرائعة دي :إتخرَّجت: السنادي:2014م:من أجمل الدفعات اللي شفتها:كلهم تقريباً متفوقات مؤدبات :وإنشاء الله فيه منهم: حيكونوا: معيدات في الكلية:يعني عضو هيئة تدريس في الجامعة مستقبلاً: ألف مبروك يا أحلى بنات
======================
قِف بالممالكِ وانظر دولة المالِ
====================
قِف بِالمَمالِكِ وَاِنظُر دَولَةَ المالِ ... وَاِذكُر رِجالاً أَدالوها بِإِجمالِ..
وَاِنقُل رُكابَ القَوافي في جَوانِبِها ... لا في جَوانِبِ رَسمِ المَنزِلِ البالي..
ما هَيكَلُ الهَرَمِ الجيزِيِّ مِن ذَهَبٍ ... في العَينِ أَزيَنَ مِن بُنيانِها الحالي..
عَلا بِها الحِرصُ أَركاناً وَأَخرَجَها ....... عَلى مِثالٍ مِنَ الدُنيا وَمِنوالِ..
فيها الشَقاءُ لِقَومٍ وَالنَعيمُ لَهُم ...... وَبُؤسُ ساعٍ وَنُعمى قاعِدٍ سالي..
وَالمالُ مُذ كانَ تِمثالٌ يُطافُ بِهِ ...... وَالناسُ مُذ خُلِقوا عُبّادُ تِمثالِ..
إِذا جَفا الدورَ فَاِنعَ النازِلينَ بِها ....... أَوِ المَمالِكَ فَاِندُبها كَأَطلالِ..
يا طالِباً لِمَعالي المُلكِ مُجتَهِداً ...... خُذها مِنَ العِلمِ أَو خُذها مِنَ المالِ..
بِالعِلمِ وَالمالِ يَبني الناسُ مُلكَهُمُ ... لمَ يُبنَ مُلكٌ عَلى جَهلٍ وَإِقلالِ..
سَراةَ مِصرَ عَهِدناكُم إِذا بُسِطَت ... يَدُ الدُعاءِ سِراعاً غَيرَ بُخّالِ..
تَبَيَّنَ الصِدقُ مِن بَينِ الأُمورِ لَكُمُ ... فَاِمضوا إِلى الماءِ لا تُلووا عَلى الآلِ..
لا يَذهَبِ الدَهرُ بَينَ التُرَّهاتِ بِكُم ... وَبَينَ زَهرٍ مِنَ الأَحلامِ قَتّالِ..
هاتوا الرِجالَ وَهاتوا المالَ وَاِحتَشِدوا ...رَأياً لِرَأيٍ وَمِثقالاً لِمِثقالِ..
هَذا هُوَ الحَجَرُ الدُرِّيُّ بَينَكُمُ ........ فَاِبنوا بِناءَ قُرَيشٍ بَيتَها العالي..
دارٌ إِذا نَزَلَت فيها وَدائِعُكُم ....... أَودَعتُمُ الحَبَّ أَرضاً ذاتَ إِغلالِ..
آمالُ مِصرَ إِلَيها طالَما طَمَحَت ..... هَل تَبخَلونَ عَلى مِصرَ بِآمالِ..
فَاِبنوا عَلى بَرَكاتِ اللَهِ وَاِغتَنِموا ... ... ما هَيَّأَ اللَهُ مِن حَظٍّ وَإِقبالِ ..
-----------------
أمير الشعراء : أحمد شوقي
أنا مصرية وافتخر..
-------------------
أنا ..
منصورية ؟..
اسكندرانية ؟ ..
صعيدية ؟..
لأ ..
أنا مصرية..
دا كل حتة من مصر..
موجودة فيا ..
مين زيك انت ..
يا مصرية ..
يا لولاية منثورة ..
في الدنيا ديه ..
دا انت طول عمرك ..
آية ومضحية ..
ربيتي جيل ورا جيل..
بـ أريحية ..
مين زيك انت..
يا مصرية ..
يا نسمة عصرية ..
يا جَمَعة مغربية ..
يا إشراقة صبحية ..
دا انت ..
بتتمني رضا ..
كل مصري ومصرية ..
عشان..
تعيشي بيهم مدّفية ..
وعشان كده ..
باقول واقول ..
انا مصرية ..
وافتخر ان انا مصرية ..
-------------
د.شهيرة عبد الهادي
7 /7 / 2013 مـ
فيه خبر كده مر مرور الكرام .. قالوه : على قناة القاهرة والناس اليوم
الخميس 9/ 10 / 2014م على لسان المذيعة جيسيكا عازر.. وهو .." أن كتابة
حيثيات الحكم على مبارك .. سوف يُكلِّف الدولة 600 ألف جنيه حيث أن
الحيثيات في 2000 ورقة والورقة بتتكلف 100 جنيه.. لأنها حتتكتب بـ 3 لغات
.. لأن كل دول العالم اللي فيها فلوس مبارك.. لازم تطلب الحيثيات دي ..
عشان ترجع الفلوس لمصر .." وإلى هنا انتهى الخبر
بجد مش عارفة أقول
إيه .. غير إني أقول .. طيب وتكاليف نقله بالطيارة رايح جاي وأكله وشربه
ولبسه وعلاجة في مستشفى 5 نجوم لمدة 4 سنين هو وأولاده ونسيت كمان صبغة
الشعر.. كل ده كان قليل .. بصراحة مش عارفة اتكلم .. يلا ممكن فعلاً عشان
يبطلوا حجج الدول دي وهنا يكون الكلام منطقي ..طيب وهل ده معناه أنه فيه
إدانة لمبارك ؟
#أنا_حاتجنن_من_اللي_بيحصل_في_مصر_
