كلمة وكلمتين ..
من معسول الكلام ..
وابتدى المشوار..
غرقت الخطوات ..
في بحر الانبهار ..
موقف وموقفين ..
وابتدى النقار ..
اتبدلت المواقف..
واتحول الكلام ..
لذكرى ما بين ..
سعادة ومرار ..
ودي قصة ..
بتتكررعند..
واحد ..
اتنين ..
.
.
.
.
ومليار ..
------------------------------
د.شهيرة عبد الهادي محمد
الأحد 3 / 12 / 20177 م
وآه ع النفوس ..
لما تبيع الود ..
عشان الفلوس ..
وع العشرة تدوس ..
وان جيت في يوم ..
تعاتبها ..
تضجك.. تقهقه ..
وعينيها تقول لك ..
كان زمان يابا ..
راح زمن الود ..
راح زمن العتاب ..
راح زمن الاعتذار ..
والبوس ع الروس ..
-------------------------------
د..شهيرة عبد الهادي محمد
الأحد 3 / 12 / 2017 م
متستغربوش حضراتكم من اللي ح اقوله لأن بجد ده الواقع اللي باشوفه وعايشاه.. هو إيه بقى ..
بالبلدي كده احنا عايشين في سلسة من الازدواجية الهدامة التي تعتمد على المظهر دون الالتزام بالجوهر ..
شوفوا حضراتكم ..طول النهار يقولوا لك صل على رسول الله ..فبنصلي .. عليه أفضل الصلاة والسلام..
اللهم صل وسلم وبارك على رسول الله ..
لكن بنعمل بما جاء به رسول الله .. لأ..
رسول الله قال ..ما تكذبوش ..والكذب أصبح كالهواء نتنفسه في كل لحظة عندنا نحن العرب جميعاً بلا استثناء وبدرجة لا تحتمل ..
رسول الله قال ..ما تسرقوش .. والسرقات لا تحصى ولا تعد في المال وكل ما هو عيني وحتى في المشاعر بيسرقوها هي كمان ..
رسول الله قال ..ما تزنوش ..والموضوع ده بقى دلوقتي علني و بأنوعه المختلفة في وسائل المواصلات والشوارع وقنوات الإعلام ووو ..... إلخ ..
رسول الله قال ..ما تآكلش لحم أخيك ميتاً .. والغيبة والنميمة علطول وكلنا بنقع فيها من كتر اللي بيحصل لنا من اللي حوالينا ..
رسول الله قال.. الجار الجار الجار.. وما فيش جار بيحترم جاره دلوقتي خالص وبيسمع جاره سب الدين وكل أنواع الشتائم الفاضحة وبيعمل حفلات صاخبة أو يتخانقوا لوش الفجر ومش مهم جاره ينام ..
رسول الله قال .. صلة الرحم .. دلوقتي القرايب من الدرجة الأولى قي البلد الواحدة وفي الشارع الواحد وفي العمارة الواحدة ما بيشفوش بعض ما بيتصلوش ببعض بالسنين والإخوات ما بيشفوش بعض ما بيتصلوش ببعض بالسنة والسنتين عامد متعمد..
رسول الله قال .. النظافة من الإيمان ..والجار بيرمي زبالته قدام باب شقة جاره والكل بيرمي زبالته في الشوارع والمواصلات العامة وحتى في المتاحف وفي المكتبات والمعامل والمدرجاعت وقاعات الدرس والسينمات والمسارح ووو.... إلخ ..
رسول الله قال .. احذروا الفتنة .. والفتنة دلوقتي لها متخصصين بينشروها ناهيكعن الفتنة بين الأشخاص العاديين ودروبها اليومية ..
رسول الله قال.. اتقان العمل ..ومافيش اتقان عمل خالص ولا ضمير خالص ..
رسول الله قال.. العمل والإنتاج .. واحنا مش بتوع شغل وبتوع همبكة وأونطة ولعب بالبيضة والحجر وحنجلة وبنشتري حتى عود الكبريت وفانوس رمضان من الصين ..
وووو.......... إلخ ..
احنا عايشين في ازدواجية رهيبة .. وما أخدناش من القرآن ومن تعاليم رسولنا الكريم إلا المظهر فقط ..
على سبيل المثال لا الحصر ومن واقع مجال عملي..
في بداية المحاضرة وزي أي حد في الدنيا ..الواحد بيسمي بالله الرحمن الرحيم ويصلي على رسول الله وبعدين يبدأ في الشرح ..
نلاقي المدرج كله قال .. اللهم صل وسلم عليه .. يعني ممكن ألف طالب يردوا كده.. تخيل بقى الحماس والصوت في المدرج و شكل الرد كله إيمان في إيمان ..
وبعد دقيقة واحدة من الإيمان ده .. يتقال لي الآتي ..
يا دكتورة المحاضرة ساعتين كتير علينا أوي خليها ساعة وجزاكي الله خيراً.. وفلان بيديها ربع ساعة وجزاكي الله خيراً..وفلان بيديها 5 دقائق وجزاكي الله خيراً ..
يا دكتورة إلغي لنا خمس فصول وكفاية علينا 5 صفحات نحفظهم ونحطهم في ورقة الامتحان وجزاكي الله خيراً..
يا دكتورة قولي لنا سؤالين ولا حاجة حيجوا في الامتحان وجزاكي الله خيراً..
وفي وقت الامتحان نفسه بقى .. يا دكتورة سيبينا نغش السؤال ده زي ما غشينا السؤالين اللي فاتوا وجزاكي الله خيراً .. يا دكتورة مشي أمورك وجزاكي الله خيراً ..
تخيلوا بينطلب مني أخالف تعاليم ربنا والتأسي بسلوك الرسول الكريم ويتقال لي جزاكي الله خيراً عشان ب أخالفها ..
وإن أنا ماعملتش كده وخالفتها ..علطول ..جزاكي الله خيراً دي .. تتحول لشكوى ضدي .. يتقال فيها كل الافتراءات اللي في الدنيا و يتقال فيها ما قال مالك في الخمر ..منهم .. هم هم .. اللي كانوا بيقولوا جزاكي الله خيراً واللي كانوا بيقولوا اللهم صل وسلم وبارك على سيدنا محمد واللي كانوا بيقولوا عليه الصلاة والسلام ..
أقول ..يا ناس.. لما ربنا .. وصف .. الرسول ..قال عنه حاجة واحدة بس .. "إنه ذو خلق عظيم" ..
لا قال معاه ليسانس ولا بكالوريوس ولا دكتوراة ولا طبيب ولا مهندس ولا ولا ولا ووو... إلخ ..
رسولنا كان خير معلم وقدوة للبشرية في الأخلاق والتربية والتعليم والقيم والمباديء وأسس السلوك القويم ..
واحنا ما عرفناش عنه .. إلا .. صلي على رسول الله ..
لكن نتأسى بأخلاقياته .. لأ ..
----------------------------------------
د.شهيرة عبد الهادي محمد
الأحد 3 / 12 / 2017 م
كل الحضور ..
حضروا ..
وشوش ..
ووشوش..
جميلة الهلة ..
بادور فيها ..
عليك ..
مش عاوزة ..
منك ..
غير طلة ..
بس انت ..
ما جيت ..
ولا عديت ..
خلتني ..
اعيش معاهم ..
بابتسامة مصنوعة ..
بدون طلة ..
-----------------------------
د.شهيرة عبد الهادي محمد
الجمعة 24 / 11 / 20177 م
وآه من اللي عايش بوشين ..
عمرك ما تعرف حقيقتة ..
ولا تعرف هو مين من الاتنين..
وإن حاولت في يوم تكسبه ..
هتلاقي نفسك تايه بين البينين ..
لا عارف رحت فين ولا جيت منين ..
وآهِ وآه من اللي عايش بوشين ..
--------------------------------------
د.شهيرة عبد الهادي محمد
الجمعة 1 / 12 / 20177 م
كل الأسامي ..
اللي شبه ..
اسمك ..
بتشدني ..
بس اسمك ..
انت بس ..
حروفه هي ..
اللي بتودني ..
--------------------------
د.شهيرة عبد الهادي محمد
الجمعة 24 / 11 / 20177 م
راقصتني ..
كلماته ..
(عندما قال؟؟؟ )..
انتِ ..
اصفى قلب..
انتِ ..
اصفى روح ..
جاءت ..
من بعبد ..
من بعيد ..
تراود ..
اشتياقي ..
ثم ..
تركتني ..
احدث ..
حنيني ..
اراوده ..
عن نفسه ..
على ..
نغمات ..
حروف متعرجة ..
من بوح ..
(تذكرني انه كان ؟؟؟ )..
------------------------------
د.شهيرة عبد الهادي محمد.
الجمعة 24 / 11 / 20177م
انا طير ومدبوح ..
غنايا ..
في الفضا نوح ..
ما حد ..
حاسس بي ..
عايش ..
الباقي كم عكري ..
حلاوة روح ..
-----------------------
د.شهيرة عبد الهادي محمد
" من قال لها أهلها يا عورة ..لعبت بها الناس الكورة "..
على فكرة المثل ده ينفع يكون مثل وطني بردو ..
مش كده والا إيه ..
بس اللي يفكر يعمل في مصر حاجة ..
حيلاقي الملايين اللي تعمي له عيونه ..
------------------------------------
د.شهيرة عبد الهادي
الثلاثاء 10 / 10 / 2017 م
يا ماشي فوق أرض مصر وانت بتدوسها..
حاسب وانت ماشي على ترابها واحرسها..
لو التاريخ كتب عنها..
حتوطي على أرضها تبوسها..
-------------------------------
منقول بتصرف
د.شهيرة عبد الهادي
الثلاثاء 10 / 10/ 2017 م
بالبلدي كده ..
الناس مستغربة ليه الموقف من الدكتورة مشيرة خطاب كمرىشحة عن مصروأفريقيا لمنصب مديرعام اليونسكو .. طيب ما تبصوا لحالنا داخل مصر ..مجتمعنا مجتمع ذكوري بامتياز بيتغنى بالمرأة ..وأول ما تمسك مركز ولا منصب ولا تكون متفوقة في أي مجال أو ملتزمة بالخلق الحسن .. بيحاربها بامتياز.. وبالإضافة إلى أنه مجتمع ذكوري فهناك الكثير من العوامل الآخرى ليس مجال مناقشتها الآن خاصة بنا وبعلاقاتنا مع دول الجوار والإرث القديم و نظرة العالم لنا وعدم قدرتنا على تغيير تلك النظرة ثم التناول الإعلامي المتدني لقضايانا المختلفة .. لأني قصدت التنويه لشيء هام وعام وهو العلاقة بين الشأن الداخلي وعقيدته الثقافية والشأن الخارجي لها..ولكننا للأسف دائماً ندفن رؤوسنا في الرمال ً ونقول ما لا نفعل .. إحنا شعوب تحتاج إلى إعادة تأهيل ..وإذا كنا نقول أن غيرنا يبيع ويشتري بالفلوس.فنحن أيضاً لا نخلوا من ذلك.. ولا نخلوا أيضاً من كثير من العيوب الانتخابية والسياسية .. لكن إحنا مش عاوزين نفوق ولا نكون صادقين مع الله ثم مع أنفسنا أبداً.. لا انفصال بين المنظومة الداخلية بعقيدتها الثقافية العلمية التربوية القيمية وتماسكها وتطبيقها في أرض الواقع وما نريد أن نصل إليه عالمياً أو بالنسبة لأي مكانة في أي بقعة بالأرض .. إحنا أصبحنا خارج نطاق الخدمة .. إحنا شبكتنا واقعة علطول..وذلك من أنفسنا نحن .. بلغة العصر يعني .. ً
-------------------------------------
د.شهيرة عبد الهادي محمد
الثلاثاء 10 /10/ 2017 م
( كلمتين بالبلدي )
الأدب مالوش علاقة بالغنى ولا بالفقر ولا بالمستوى الاجتماعي ..
والرجولة مالهاش علاقة لا بالمنصب ولا بالجاه ولا بالمال ولا بالشهرة ..
----------------------------------
د.شهيرة عبد الهادي
الثلاثاء 10 / 10 / 2017 م
حب مصر نُفخ به في جينات المصريين المتوارثة حب مصر فطري في الـ DNA لكل مصري ..
الشاب الجميل ده شكله لا يوحي إلا بأنه في العشرينيات من عمره ..ودموعه دي كانت حزناً عندما جاء جون الكونغوا للتعادل في ماتش مصر والكونغو للتأهل لكأس العالم مونديال روسيا 2018 م..الشاب ده هو مصر.. الشاب ده هو الحب الصادق التلقائي الفطري صاحب الضمير الحي اللي بيخاف على مصر..الشاب ده هو عشق مصر ..الشاب ده هو الحب الحقيقي لمصر دون رياء أو نفاق أو بحث عن كرسي أو منصب أو منفعة أو تجارة أو أي مصلحة شخصية .. الشاب ده هو أمل مصر .. أتمنى أن أعرف إسمه وعنوانه حتى أرسل له رسالة بإسمي ..تعيش يا حبيب قلب ماما شهيرة وقلب كل أم مصرية وهبت ولادها لمصر.. والحمد لله يا حبيبي أن جاء جون الفوز للفريق المصري حتى تتحول دموع حزنك يا قلبي إلى دموع فرح .. تعيش يا حبيبي ..تعيش..
-------------------------------------------------------------
د.شهيرة عبد الهادي محمد
الثلاثاء 10 / 10 / 2017 م
التعليم المصري منهار في جميع مراحله لأن " بعض " القائمين عليه منهارين علمياُ تربوياً أخلاقياً ثقافياً ومجرد " رغاوي "..
------------------------------------------
د.شهيرة عبد الهادي
الثلاثاء 10 / 10 / 2017م
صدقني حضرتك.. صدقيني حضرتك ..أنا لا أحقر من شأن أحد .. ً لأن هذا ليس منهاجي .. لكني اكتشفت بعد ثورة 25 يناير2011م .. أننا ..منظومة واهية ثقاقياً وأخلاقياً ..عند الكثيرين ممن كنت أعتبرهم رموزاً.. إلا من رحم ربي .. لقد أثبتنا أننا مجرد قشور.. نكتب وفقط ..نتكلم وفقط ..مع إيماني الشديد بقيمة الكلمة وأنها تغير أمماً للأفضل .. ولكن يبدو أن ذلك ليس في بلادنا .. حتى .. نحن من نكتب على الفيس .. أو أقول : أنا حتى لا يغضب مني أحد .. غير قادرين على تغيير الواقع المرير.. وبذلك أنا أحاول ان أقدم شيء لنفسي .. وذلك بتغيير نفسي للأفضل ..أي تعيل سلوكي وفكري ورؤيتي ومنهجي ..على قدر طاقتي البشرية .. لعلي أكون قدوة لطلابي ولو عند واحد منهم فقط ..أو عند واحد ممن يتعاملون معي على أرض الواقع ..
-------------------------------
د.شهيرة عبد الهادي محمد
الثلاثاء 10 / 10 / 2017 م-
الأحذية متلمعة ومحطوطة في الفتارين ..
واالعيش والكتاب مرمي ع الرصيف..
يشيل ويحط عليه الدبان قنطارين ..
----------------------------------
عمي حسن السواق
منشور في :
10 / 10 / 2017 م
أتعرف يا طبيب دواء قلبي ..
فداء القلب أعظم من هزالي ..
نسائل ما الدواء إذا مرضنا ..
ودواء القلب أولى بالسؤالِ ..
------------------------------
د.محمد المقرن
منشور في :
10 / 10 / 2017 م
أحلى حاجة أن جوجل عامل علم مصر النهارده رمزاً له ..
يا رب ارفع رايتك يا مصر في كل زمان ومكان وما يشمت فيكي حد أبداً ..
يا نن عين شعبك وحياة عمره كله ..
-----------------------------------
د.شهيرة عبد الهادي
منشور في 9 / 10 / 2017 م
بمناسبة صعود مصر لكأس العالم
وفوزها على الكونغو 2 /1
