بحبك .. حروفها متعلقة بين السماء والأرض ..صدقة منك ترفعها.. بقلم د.شهيرة عبد الهادي

بحبك ..
حروفها متعلقة بين السماء والأرض ..
 صدقة منك ترفعها ..
----------------------------
د.شهيرة عبد الهادي
الخميس 27 / 7 / 2017 م

مصر غجباني .. بقلم د.شهيرة عبد الهادي

يا عدو مصر ..
ومن بلدي بتسخر..
باقول لك إيه ..
مصر عجباني ..
بزحمتها ..
بمشكلاتها ..
واقول لك كمان ..
بحبها في كل حالاتها ..
بحبها في شدتها ..
بحبها بزبالتها ..
بحبها في غفوتها ..
بحبها في صحوتها ..
بحبها ..
كده على بعضها  ..
وعجباني ..
مصر ..
طول عمرها شايلاني ..
وحتى ..
لو قولت ..
في يوم ..
منها ..
آه ياني ..
بردو بحبها وعجباني ..
ويرجع حبها  ..
في ثواني  لشرياني ..
مصر دي كياني ..
مصرح تعدي ..
وح ترجع من تاني ..
مصر الحضارة ..
والعطاء الرباني ..
-------------------------
د.شهيرة عبد الهادي
الأربعاء 26 / 7 / 2017 م
Drshahera Abd Elhady Ibrahem

موسيقى يا مسافر وحدك.wmv ..ليلة حضراتكم سعيدة بإذن الله تعالى ..

عشانك رويت بستاني ..بقلم د. شهيرة عبد الهادي

عشانك  ..
رويت بستاني ..
طرح ..
ورد ..
ريحان ..
وأغاني ..
بس انت ..
كنت أناني ..
بتكتر ..
 في أحزاني ..
-------------------
د.شهيرة عبد الهادي
الأربعاء 26 / 7 / 2017 م

مقلب .. بقلم د. شهيرة عبد الهادي

مقلب ..مقالب ..
م الديابة ..أم مخالب ..
يا رب سلم .. واقلب عليهم ..
 كل المقالب ..
------------------------------
د.شهيرة عبد الهادي
الأربعاء 26 / 7 / 2017 م

حبيباتك كتير ..بقلم د.شهيرة عبد الهادي

حبيباتك كتير..
ملهماتك كتير..
لو انتبهت لهم ..
ح تطير منك ..
كل العصافير ..
خليك  يا قلبي كبير..
------------------------
د.شهيرة عبد الهادي
الأربعاء 26 / 7 / 2017 م

ما تحاولشي .. بقلم د. شهيرة عبد الهادي

ما تحاولشي ..
تفقدني الثقة بنفسي ..
لأن ..
نفسي بتحب نفسي ..
أنا عاوزاني كده ..
أنا عاجباني كده ..
أنا حباني كده ..
قول غرور ..
قول جواز مرور..
قول قد ما تقول ..
لا نفسي عمرها ..
تروحلك ..
ولا انت قد نفسي ..
ما تحاولشي ..
--------------------------
د.شهيرة عبد الهادي
الأربعاء 26 / 7 / 2017 م
Drshahera Abd Elhady Ibrahem

محتاجة مساندة روحي .. بقلم د. شهيرة عبد الهادي

محتاجة مساندة روحي ..
تصبر عليَّ ألملم جروحي ..
من غيرما اتكلم ..
 ولا يغلبني بوحي ..  
---------------------- 
د.شهيرة عبد الهادي
الأربعاء26 / 7 / 2017 م

طول عمري حمالة الأسية .. بقلم د.شهيرة عبد الهادي

طول عمري حمالة الأسية ..
وباخطي وباعدي ..
كل محنة ومحنة ..
بفضل الله ..
وبقلبي الابيض وروحي الندية ..
ولا عاوزة حاجة من ده ولا دية ..
وباعيش مرفوعة الراس ..
يا ابو قلب فقد الإحساس..
ونسيت الإنسانية والناس ..
لا حتعيش جوايا ولا برايا ..
ولا كلامك عندي له أي أهمية ..
دا العاطي هو الله والمانع هو الله ..
وله في كل حاجة حكمته الأبدية ..
وانا مؤمنة بكده ..
ودايماً ح تكون ..
إيدي عليك هي العليا ..
وكلمتي بفضل الله ..
في النهاية ح تكون ..
هي الصحيحة الصادقة الأصلية ..
------------------------------
د.شهيرة عبد الهادي
الثلاثاء 25 / 7 / 2017 م
Drshahera Abd Elhady Ibrahem

وبحبك حب أبدي .. من غير ما أقول .. ولا لتجلياته أُبدي .. بقلم د.شهيرة عبد الهادي

وبحبك حب أبدي ..
من غير ما أقول ..
ولا  لتجلياته أُبدي ..
---------------------
د.شهيرة عبد الهادي
23 / 7 / 2017 م

مهما كنت بعيد عن الصراعات .. بقلم د. شهيرة عبد الهادي

مهما كنت بعيد عن الصراعات ..
تجيك لحدك وتقول لك عواف ..
تناجيها .. يا ستي سيبتهالك ..
ومنك مش عاوز حاجة ..
ومنك مش بخاف ..
بردوو تتشعبط وتتلعبط ..
وحواليك تلف خيوطها وتتلعبك ..
وتروح وتيجي تقول لك عواف ..
---------------------------------
د.شهيرة عبد الهادي
الإثنين24 / 7 / 2017 م
Drshahera Abd Elhady Ibrahem

شجع نفسك إنت وحبها وطبطب عليها .. بقلم د. شهيرة عبد الهادي

إن ما لقتش حد يطبطب عليك في محنتك ويساعدك ..
شجع نفسك إنت وحبها وطبطب عليها ..
وخليك بين إيدين ربنا علطول ..
 ودايما قول يا رب ..
-----------------------
د.شهيرة عبد الهادي 

قالولي ازاي هتتقدم .. بقلم الشاعر عز الدين خلاف ..

قــالولي ازاي هتتقــــدم ..
وعدّادَك يدوبَــــك صفر ..

بلوغــك للهــــدف يابني ..
بِمَد الخطوه مش بالسِّحر ..

وإن تـــــاه الهدف منــك ..
عليك تفضل محلك سِــر ..

----------------------------

للشاعر عزالدين خلاف
الاحد 23 / 7 /  2017

كلمات قالها لي الشاعر احمد سيد حسين تعليقاً على منشور خاص بي

ربك كبير قادر ع الفرحه يهديكِ ..

وان كان لي يوم خاطر مديلي ف ايديكِ ..
مما عطاكِ الله يا بنت عبد الله .. 

للفرحه قولي الله .. 

تلاقيه يلبيكِ ..
-------------------
الأحد 23 / 7 / 2017 م 

كلمتين بالبلدي .. العرب ما بيحلوش قضاياهم إلا بالشعر .. بقلم د.شهيرة عبد الهادي

"العرب ..ما بيحلوش قضاياهم إلا بالشعر ..ويشتموا في أمريكا .. وهم أول ناس تهرب لما يكون عندهم مشكلة في بلدهم .. ويروحوا  يعيشوا  في أمريكا .. كلهم بتوع كلام في كلام .. إحنا وحشين أوي كلنا بلا استثناء "..
ده كان ردي على الصديق المحترم دكتور Khaled Tahhan 

----------------------------------

د.شهيرة عبد الهادي 

الأحد 23 / 7 / 2017 م

كلمتين بالبلدي ..وستظل ثورة يوليو هي الثورة البيضاء .. بقلم د. شهيرة عبد الهادي

وستظل ثورة يوليو 1952م هي الثورة البيضاء .. وسيظل هناك موقفا مشرفا لملك وزعامة حقيقية لزعيم ..وعلى فكرة كل الأقلام النظيفة التي تكتب الآن على الفيس ..هي نتيجة التعليم اللي كان تعليم بحق وكان متاح للجميع ببلاش بفضل هذه الثورة .. وأولهم أنا بنت الأسرة المتوسطة أوقل الفقيرة التي تعليمها كله حكومي وبس ..
--------------------------------
د.شهيرة عبد الهادي 
الأحد 23 / 7 / 2017 م

وبرغم التعابين والوحوش .. بقلم د. شهيرة عبد الهادي

وبرغم التعابين ..
والوحوش ..
اللي بيحوطوني ..
وما بيرحموش ..
رامية حمولي على الله ..
وما بانساهوش ..
ولغيروا ما اتحوجلوش ..
فـ بينصرني نصرة قوية ..
وبيفضحهم ويعريهم ..
اللي ما بيختشوش ..
ويخليني أشوف فيهم ..
اللي ما شفتهوش ..
ولغاية عندي ..
بتيجيني النصرة ..
وما ترحلوش ..
واشوف على وشوشهم ..
غضب الله ..
وصفات العفريت ..
اللي ما شفتهوش ..
واسمع عنهم ..
اللي ما كانش ..
ممكن اسمعه ..
ومسمعتوش ..
وما دام بتقول يا رب ..
وبتراضيه ..
ح ينصرك ..
ويحقق لك ..
اللي كنت عاوزه ..
وما نلتهوش ..
-------------------------
 د.شهيرة عبد الهادي
الأحد 23 / 7 / 2017 م

كلمتين بالبلدي .. الفيس بقى مشغول بإيه ؟ .. بقلم د.شهيرة عبد الهادي

الفيس بقى مشغول بإيه ؟ ..ما هو بردوو بيعبر عن الواقع البائس .. 
مشغول بفيديوهات وصور توضح الفرق ما بين  مسجد قبة الصخرة والمسجد الأقصى الحقيقي .. مستنداً على ضياع القضية بناء على ذلك .. يا سلام .. قال يعني القضية ما ضاعتش بأفعالكم يا عرب .. مش باقول لحضراتكم .. دي شعوب بيهمها الشكل دون الجوهر ..وبيحكموا على كل شيء في الدنيا بالشكل مش بالجوهر .. القضية إن المسجد الأقصى وقبة الصخرة وبلد كامل بيضيع بفعل أصحابه اللي هم أنتم يا بشر يا أصحاب الكلام والأشعار والأغلني والأحقاد والغل والحروب ما بين بعضكم وبعض عشان الزعامة والكرسي .. صحيح أمجاد يا عرب أمجاد..
-----------------------------------
د.شهيرة عبد الهادي 
الأحد 23 / 7 / 2017 م

كلمتين بالبلدي .. بالبلدي وببساطة وبدون سفسطة .. بقلم د. شهيرة عبد الهادي

بالبلدي وببساطة ودون سفسطة لأن ما عدش ليا نفس للكلام في أي حاجة....
 السوريون : امتى نرجع لسوريا ..العراقيون :امتى ترجع العراق عراق ..البنانيون : امتى نرجع لبنان .. الفلسطينيون أنفسهم : امتى نرجع فلسطين .. ده حال الدول العربية على سبيل المثال لا الحصر .. وبعدين .. نقول ..الأقصى .. مش ح اقول غير كلمتين في منتهى البساطة قلتهم للصديق المحترم المستشار ساميAlmustashar Samy لكن معناهم عميق للي عاوز يفهم دون سفسطة ..وهم.. احنا  كلنا العرب بمختلف دياناتنا ..اللي كلها من عند رب واحد .. وبمختلف مذاهبنا وعرقياتنا ..  أثبتنا إن احنا وحشين أوي .. إحنا وحشين أوي .. صلح بيتك الأول ودور على المصلحة العامة وبعدين اتكلم ..لأ ..مش تتكلم بقى ..فعل كلامك .. يا اللي ما تملكون إلا الكلام والمنفعة الشخصية وبس ..
-----------------------------------
د.شهيرة عبد الهادي 
الأحد 23 / 7 / 2017م

رغم الديابة دنيتي حلوة .. بقلم د.شهيرة عبد الهادي

رغم الديابه ..
حواليا ..
دنيتي حلوة ..
حلوة ..
بصفائها ..
بنقائها ..
سايباها على الله .. 
فـ بينصرني ..
ويقلّب الجمر..
في قلوب الديابة ..
برة وجوة ..
عمرك يا ديب ..
لا ح تبقى إنسان ..
ولا حتى ..
 ديب تايب بفتوى ..
دا الحقد والغل ..
دايب في دمك .. 
يا ديب ..
ما تشيله منه  .. 
كلمة صدق حلوة ..
--------------------
د.شهيرة عبد الهادي
الأحد 23 / 7 / 2017 م