أحمد
موسى عامل لقاء دلوقتي مع المهندس " هاني عازر" من برلين .. هاني عازر
عمال يشرح مشروعاته اللي عملها في برلين .. زي تحويل نهر برلين..وعمل
إشارات للمراكب في المية .. ومشروعات زي أن القطارات كلها في برلين بتمشي
بالكهرباء عشان الحفاظ ع البيئة .. و يقول أن ألمانيا بتطلب مساعدات
مالية من الهيئات المهتمة بالبيئة في العالم عشان المشروعات اللي بتحافظ ع
البيئة .. وفي الحقيقة تلاحظ أن مفيش حباية تراب في الأرض ولا في
النهر.. لكن اللي لفت نظري .. أن هاني عازر طول ما بيتكلم عمال يقول: عندنا
هنا في برلين أنا عملت .. عندنا هنا في ألمانيا أنا عملت .. كان نفسي
قوي ألاقيه في مصر وعمال يقول :عندنا هنا في مصر أنا عملت ..و عندنا هنا في
القاهرة أنا عملت .. وعندنا هنا في اسكندرية أنا عملت .. و عندنا هنا في
الصعيد أنا عملت .. وعندنا هنا في سيناء أنا عملت .. وووو.. لكن .. يا
خسارة ..
الليلادي ليلة النصف من شعبان .. ليلة مباركة على كل أبناء مصر .. ومن
جمال اليوم المبارك ده.. أنه صادف يوم 1 /6 .. وهو يوم مجيء العائلة
المقدسة إلى مصر .. فبقت الفرحة فرحتين .. فرحة المسلمين بليلة النصف من
شعبان ..وفرحة المسيحيين بذكرى مجيء العائلة المقدسة إلى مصر .. وعشان كده
.. أنا متفائلة إن شاء الله بالقادم .. أعياد المسلمين والمسيحيين بقالها
سنة بتيجي مع بعض.. البلد دي .. إن شاء الله عمرها ما ح تتقسم.. وح تتقسم
ازاي واللي حاميها هو ربنا وذكرها في قرآنه الكريم وجاب العائلة
المقدسة ليها .. بس احنا نتقي الله فيها كلنا مسلمين ومسيحيين ..
مسيحييو مصر طيبين .. ومسلمي ومسيحيي مصر عمرهم ما حينفصلوا عن بعض .. كل
سنة وحضراتكم طيبين يا مصريين .. وأشهد أن لا إله إلا الله وأن محمداً
رسول الله ..اللهم صل وسلم وبارك على سيدنا محمد صلى الله عليه وسلم ..
اشتريت شوية طلبات بسيطة كده للمطبخ .. وانا بادفع الحساب .. لقيت
المذيع الداخلي لـ "فتح الله" .. عمال يقول .. اشتري بسعر الجملة ووفر
في العملة .. قمت باصة في الريسيت أشوف أنا وفرت قد إيه يعني .. وبأمانة
أول مرة اعملها لأني باروح الهايبر الكبيرة عشان أوفر فعلاً وده شئ معروف
.. لقيت التوفير يمبلغ 2جنيه و56 قرش لإجمالي طلبات بمبلغ 340.5 جنيه ..
طيب لو حآخد تاكسي حيآخد مني 25 جنيه .. لو بعربيتنا شوف البنزين ومعاناة
السواقة .. بصراحة أخدت قرار .. معنتش رايحة لا فتح الله ولا عوض الله ولا
خير الله ولا حسب الله .. ويفتح الله ..
تصريحات الوزراء بتوعنا ..
-المواطن المصري أسعد مواطن في الدنيا ..
-مفيش بطالة في مصر..
-عدم وجود صفحة لوزارة الثقافة على فيس بوك وتويتر أحد أسباب التأخر الثقافي في البلد عشان مفيش تواصل مع الشباب ..
-إلغاء الكتاب المدرسي هو اللي حيحل المشكلات التعليمية الاقتصادية في مصر ..
-مستشفيات وزارة الصحة فيها إمكانيات أحسن من أي مستشفى في العالم ..
-التعليم المصري أحسن م التعليم في كل الدول النايمة والصاحية ..
#يكونوش_صايمين_رمضان_في_شعبان_
فعلاً .. هم دوول يا حبايب قلبي .. ولاد مصر .. جيش مصر .. خير أجناد
الأرض.. في الحر واقفين .. في المطر واقفين .. في الحرب واقفين .. في السلم
بردوو على الحدود واقفين ..بيدافعوا عن عرضنا " وطنا " ..مليون تحية وشكر
وعرفان ..ربنا يحميكم ..
فعلاً ..
الخير في اللي يحبك ويجيلك .. مش في اللي انت تحبه وتروحله ..
وقال إيه الإعلام المصري بقالوا فترة يقول : دعموا الأمير علي
دعموا الأمير علي .. قوم إيه ..الأمير علي ينسحب .. وبلاتر .. يآكل الجو ..
تحيا الدول العربية ..
أدين واستنكر وأشجب العمل الانتحاري الذي قام به شخص كان متنكراً في زي
النساء .. في مسجد العنود بالدمام بالسعودية اليوم الجمعة 11 شعبان 1436هـ
الموافق 29 / 5 / 2015م ..والذي أدى إلى حالة وفاة وإصابة 7 آخرين ..
والله هذا لا يُرضى الله ورسوله والمؤمنين .. لا ومليون لا للإرهاب .. أما
مشكلات الأمم فيجب أن تحل بمنهجية مختلفة .. الإرهاب ضد الإنسانية ..
الإرهاب يتنافى مع مبادئ الإسلام .. وللأسف يتم بأيدي مسلمين .. الله
يستر على القادم ..
-----------------------------------------------------
د.شهيرة عبد الهادي #Drshahera_Abd_Elhady_Ibrahem
تبدأ غداً السبت 30 / 5 / 2015 م إن شاء الله .. إختبارات نهاية الفصل
الدراسي الثاني "نهاية العام الدراسي 2014م /2015م" .. في كلية التربية (
الشاطبي ).. جامعة الإسكندرية .. تمنياتي لكل طلابي وطالباتي في جمبع
السنوات الدراسية بكل التخصصات والأقسام وبالدبلومات والماجستير
والدكتوراة بالتوفيق والنجاح ..وأقول لهم : استعينوا بالله .. واتقوا الله
.. العلم والأمانة والخلق الكريم منظومة متلازمة وباقات ورد يجب أن
يتزين بها كل طالب علم .. وبإذن الله ناجحين وموفقين .. كما أتمنى الأمن
والأمان والسلم والسلامة لكل طلابنا وطالباتنا ولإدارة الكلية ولأعضاء
هيئة التدريس والموظفين والعاملين بالكلية والملاحظين على لجان الاختبارات
ورجالات وفتيات الأمن الخاص بالكلية.. كما أتمنى كل ذلك لكل من ينتمي
لجميع جامعات مصرنا الغالية في كل مكان .. وتحيا مصر .. ويحيا شعب مصر..
ويحيا جيش مصر.. وتحيا شرطة مصر ..
-------------------------------------------------------
د.شهيرة عبد الهادي
#Drshahera_Abd_Elhady_Ibrahem
مُنذ فترة استدعاني الأديب الكبير الأستاذ مجدي شلبي ابن محافظتي "الدقهلية" رائد فن " القصة الومضة ".. للمشاركة في كتابة الرؤى التحليلية النقدية التفسيرية "للقصة الومضة " في صفحته المميزة .. وخلال الفترات المتقطعة لشرف التعاون مع سعادته .. كان لي شرف التعرف على مٌبدع في مجال " القصة الومضة " له مستقبل باهر إن شاء الله .. كانت ومضاته دائماً .. تجعلني في حالة عصف ذهني .. لرؤاي حول ومضاته .. هو الأستاذ لقمان محمد ..وطلب مني التعاون بينه وبيني أيضاً في كتابة الرؤى الخاصة بومضاته ..التي سيودعها كتاباً خاصاً به.. وكان لي شرف التعاون مع سعادته أيضاً .. وهذه أولى خطوات التعاون بيننا .. حول هذه الومضة.. وإن شاء الله يستمر التعاون في الومضات اللاحقة ..الومضة للأستاذ لقمان أما الرؤية فهي لي ..
(واقع : خرج من السينما ؛ وجد نفسه على خشبة المسرح )..
----------------------------------------------------------------------
يا تُرى هل كان لا يدري.. أن الدنيا ما هي إلا مسرح كبير .. ذهب ليشاهد .. أو بالعامية .. لـ يتفرج .. على فيلم .. ربما للتسلية .. ربما للاستفادة .. وهو يتناسى أو ربما لا يدري أنه يعيش في فيلم أكبر .. إن الفيلم السينمائي .. ربما يحاكي الطبيعة أحيانا في موضوعاته الاجتماعية والعاطفية .. ولمدة زمنية محدودة .. ربما يعطيك المشكلة ويعطيك الحل .. يعطيك البداية والنهاية .. لكنه يتحدث معها مازجاً بين الخيال والواقع .. وأيضاً يتحدث مع الواقع بتصرف .. لكنه إذا ما انتقل إلى الحياة .. وجد فيها ما يفوق الخيال .. ففيها الكثير من التناقضات .. فيها من يٌحب ويقتل حبيبه !! .. فيها من هو في مركز امتلك به مخازن الأرض ومن عليها وهو يسرق !!.. فيها كل فرد يلعب أدواراً.. منها ما هو مفروض عليه.. ومنها ما هو خارج عن إرادته .. ومنها ما لا يدركه.. ومنها ما يُدركه.. ومنها ما يعوض به نقصاً لديه .. الدنيا مسرح كبير .. نعم مسرح .. تلعب شخوصه إدواراً تبادلية في الحياة ..ربما تنجح .. ربما تفشل .. ربما تتعلم .. ربما تتألم ..ربما كسب .. ربما خسر.. ربما خرجت صفر اليدين ..
--------------------------------
د.شهيرة عبد الهادي، الأستاذ لقمان محمد
#Drshahera_Abd_Elhady_Ibrahem
صباح جديد لجمعة جديدة يصحبها أمل في مصر جديدة ..
جمعتكم .. جمعة طهر ونقاء لهما صفتي الاستمرار والبقاء.. إن شاء الله ..
يا ربي .. على مواقع التواصل الاجتماعي الآن .. ناس عمَّالة تقول : الملكية
كانت أحسن .. وناس عمَّالة تقول : السُخرة هي اللي بنت حضارة مصر ..
ربنا يستر على مصر .. ويوفق قيادتها لوأد الفتنة في مهدها .. الفتنة
نائمة لعن الله من أيقظها .. #يا_رب_مصر_لا_نريد_إلا_مصر
الراجل دهون .. هو أجدع راجل جه في تاريخ مصر كله .. القديم والحديث
واللي في النص والفرعوني والقبطي والإسلامي والمسيحي واللي ملوش
ملة واللي فات واللي ما فاتشى واللي راح واللي جاي واللي مجاشى
.. فهمها من زمان .. يسلم فمك يا شيخ .. يا خرااااااااابي ..
يبدو .. أن الحنين إلى الماضي .. هو واقعنا الذي نعيش فيه الآن ..
الفساد = شلة من الكائنات يفهمون لغة بعضهم البعض.. مفرداتها الخيانة
..منهاجهم عدم الضمير والتزوير والهبش والكذب والرشوة .. لا مباديء ولا
قيم لهم .. سلوكياتهم الغيبة والنميمة وتناول الأعراض بمنتهى البساطة في
أحاديثهم .. هدفهم تدمير الصالح نفسياً وجسمياً واقتصادياً وأسرياً .. لا
يهمهم إلا كروشهم المملوءة بالمال الحرام .. ينهشون ويسرقون لحم عرضهم
"الوطن" ..
------------------------------------------------
د.شهيرة عبد الهادي #Drshahera_Abd_Elhady_Ibrahem
تقرير في العاشرة مساءً اليوم الأحد 24 / 5 / 2015م.. يتحدث عن قرار
محافظ الدقهلية بإزالة مزارع سمكية في بلقاس على مساحة 10 آلاف فدان ..
بالطبع أصحاب المزارع ومن يعملون بها رافضين القرار ..ما يُلفت النظر.. أن
أحد تبريرات أصحاب المزارع في مطالبتهم بعدم الإزالة كما قالوه بالحرف
هو "أن المياة التي يتم فيها تربية السمك وتغذيته هي مياه الصرف الصحي
وصرف الصرف كمان ودي ميه معدومة محدش مستفيد منها حاجة ".. يعني مُصيبة
سوده .. إحنا بنآكل سمك متربي في مياه الصرف الصحي .. عشان كده الناس طول
السنة بتعاني من مغص معوي .. يا ريت زميل محترم من الجامعات و مراكز
البحوث يفهمنا جايز انا فاهمة غلط ..
-------------------------------------
د.شهيرة عبد الهادي
في العاشرة مساءً اليوم الأحد 24 / 5/ 2015م.. تقرير .. عن أن وزير التربية
والتعليم .. يريد أو يطالب أو يدرس إلغاء الكتاب المدرسي .. ووضع الكتاب
على سيديهاية .. ودي مصيبة سوده تانية .. بصراحة أنا مش عارفة حيعملوا
إيه في التعليم أكتر م اللي عملوه .. دا احنا خلاص .. التعليم في مصر
بح ..
-----------------------------------------------
د.شهيرة عبد الهادي #Drshahera_Abd_Elhady_Ibrahem
يا مستني خير من قليل أصل حقير .. زيك زي اللي مستني سمنة من ورك نملة ..
----------------------------------------
ستي الله يرحمها
إلهي وانت جاهي .. تدمر كل فاسد مُفسد .. تدميراً نفسياً جسمياً.. ويبقى زيه زي ما كان شارون لا هو عايش ولا هو ميت ..
---------------------------------------------
دعوة ولية ساعة صبحية
