الجمعة، 24 أكتوبر 2014
الخميس، 23 أكتوبر 2014
عام هجري سعيد..كل عام وحضراتكم ..وكل من هو إنسان في العالم بخير.. .... بقلم د.شهيرة عبد الهادي
إن شاء الله.. يوم السبت 25 /10 /2014م .. سيوافق 1 من محرم 1436 هـ ..كل عام وحضراتكم بألف خير بمناسبة حلول هذا العام الهجري الجديد .. يا جميع إخوتي وأخواتي ..قراء " ملتقى محبي الله والوطن" .. قراء " مدونة محبي الله والوطن" .. وقراء " مجلة مواقف حياتية " .. وقراء " مجلة كلمتين بالبلدي " .. وقراء صفحتي الشخصية " .. وقراء " كل الجروبات التي أنشر فيها " .. ولجميع القراء المحترمين الذين يقرأون لي في أي مكان وأي زمان .. وكل مصري ومصرية في جميع أرجاء " مصر " الحبيبة .. وفي كل الدول العربية .. وفي كل الدول الإسلامية .. وفي كل الدول الإنسانية .. في العالم أجمع ..
ومع استقبال هذا العام الهجري الجديد .. أطلب من الله .. وهو .. طبيبي ومُعالجي النفسي .. أن .. يجعلني .. أهجر نفسي إلى نفسي .. وأدعوا لحضراتكم بنفس الدعاء .. لعل فيه الخير والفلاح والنجاح والسماح ..
نعم .. أتمنى أن أهجر نفسي إلى نفسي .. وأن تعود نفسي إلى نفسي ..
نعم .. اللهم أعني يا الله على أن هجر أي صفة غير مرغوب فيها إلى الصفة التي ترضاها يا الله تباركت وتعاليت يا الله ..
فأنني لست ملاكاً .. وإنما .. أن بشر لي أخطائي ولي هناتي .. ولي عثراتي .. ولي كبواتي ..ولي غفواتي ..
نعم .. اللهم أعني على أن أهجر سوء الظن بنفسي وبالآخر إلى حسن الظن بنفسي وبالآخر وإلى حسن الفطن ..
نعم .. اللهم أعني على أن أهجر الحقد والحسد والغل والبغضاء والكراهية إلى حُب الخير للجميع وحب الجميع في الله ولله وبالله ..
نعم .. اللهم أعني على أن أعفوا عمن ظلمني وأن أعفوا عن ظلم نفسي لنفسي ..
نعم .. اللهم أعني على أن أكون مصدر السلام والوئام والمودة والرحمة لنفسي ولمن حولي ..
نعم .. اللهم أعني على أن أمد يد المساعدة على قدر طاقتي لغيري حتى لو عن طريق التمنيات الجميلة والابتسامة والنية الصافية والقلب الأبيض ..
نعم .. اللهم أعني على أن لا أمتطي الموجة ولا أتبع طريق المصالح الشخصية وأن أتعامل مع الناس بقلبٍ صافٍ ونيةٍ صافيةٍ ..
نعم .. اللهم أعني على أن أراعيك يا الله ثم أراعي ضميري في كل حرفٍ أكتبه لا أُخادع قارئاً ولا مُستمعاً ..
نعم .. اللهم أعني على الإخلاص في القول والفعل والعمل والحب والعطاء والوفاء والصفاء والنقاء والعدل النسبي فأنا بشر يا الله .. أنا بشر يا الله .. أنا بشر يا الله .. وأنت أعلم .. ما بنفسي ..وتعلم خلجاتي وسكناتي وآهاتي وأناتي وهناتي ..
نعم .. اللهم أعني على أن أقول دائماً .. سبحان الله .. سبحان الله وبحمده عدد خلقه ورضا نفسه وزنة عرشه ومداد كلماته .. آمين يا أرحم الراحمين ويا رب العالمين ..
نعم .. أطلب منك أنت يا الله .. ومن لي غيرك يا الله .. يا سندي .. يا طبيبي .. يا معالجي النفسي .. يا من آتي إليه في أي مكان وأي زمان .. آمين آمين يا رب العالمين ..
نعم .. اللهم اجعل هذا العام الهجري الجديد 1436هو عام الإنسانية على العالم أجمع لنقل دائماً .. كل عام والإنسانية بخير .. كل عام وكل إنسان بخير .. في عالم نتمناه .. أن يكون في سلوكياته إنسان ..
----------------
د.شهيرة عبد الهادي
الأربعاء، 22 أكتوبر 2014
الثلاثاء، 21 أكتوبر 2014
حكايتي مع السباك ...بقلم د.شهيرة عبد الهادي
=============
إلى الناس العسل.. اللي كانوا زعلانين على السباك .. وبيتهيألهم أن انا بأر عليه .. وبيقولوا: هو كل يوم..مش بيآخد المبلغ ده.. وهو ممكن يمرض ويقعد في السرير شهر وميشتغلش ..ودي أرزاق.. واحنا بنتعامل معاه من باب الصدقة والشفقة..ويا بخت من كان رزقه في بيعه وشراه ووووووو.. وانا مش زعلانة من الرأي ده والله.. بالعكس دا رأي يدل على نبل أخلاق صاحبه.. وعشان كده قلت الناس العسل.. شوفوا بقى اللي حصل يا ناس يا عسل.. الحوض اللي انتهى من إصلاحه امبارح..كان.. بيخر مية.. طول الليل.. والناس اللي تحت..اشتكت..شوفتوا بقى.. صنايعية مصر ؟؟؟؟؟؟؟؟؟؟؟؟؟ ..هم دووول بعض صنايعية مصر..لا يمكن يشتغلوا بضمير.. ولازم يسيب شغله ناقص حتة عشان تجيبه.. مرة واتنين.. وكل مرة بفلوس جديدة.. وصدقوني انا باقول الواقع المراللي احنا فيه.. ينقصنا في مصر الضمير..
--------------------------
د.شهيرة عبد الهادي
-----------------
د.شهيرة عبد الهادي
الاثنين، 20 أكتوبر 2014
سباك مصري آخر ألاجة .... بقلم د.شهيرة عبد الهادي
---------------------------
د.شهيرة عبد الهادي
أنا وردة مصرية .... بقلم د.شهيرة عبد الهادي
طالعة من أرض ..
مصر العربية ..
يفوح أريجي..
في كل خطوة ليه ..
يتنفسه الشرف ..
وتتنفسه العفة بحذر..
ما أنا بنت مصر الأبية ..
أنثر عبيري ..
في كل مزهرية ..
ينمو شذاي و ينتشر..
في الصيف وفي المطر ..
يوصل لكل ..
مصري ومصرية ..
وكل عربي وعربية ..
في الريف والحضر..
ما أنا وردة مصرية ..
طالعة من أرض ..
مصر العربية ..
------------------------
د.شهيرة عبد الهادي
الأحد، 19 أكتوبر 2014
(كلمتين بالبلدي ) ليه احنا كده يا شعب مصر ؟؟!!... بقلم د.شهيرة عبد الهادي
-------------------------------------------------
حقيقة أنا حزينة.. لماذا ؟ .. لأنه ..أثناء ذهابي إلى عملي أمس الأحد 19 /10 / 2014م.. أخذت المسافة من إشارة الشبان المسلمين.. وحتى باب الكلية على الترام.. سيراً على الأقدام .. وكان .. أمامي فئات مختلفة من الشعب المصري الذي له كل الاحترام والتقدير دائماً وفي كل الأحوال .. يسيرون في نفس الاتجاه .. نحو.. المجمع النظري للكليات الذي يحوي كليات كثيرة متنوعة ..أو البنك الأهلي أو لأي مكان آخر حول المجمع .. لكني رأيت ما يُؤسفني ويُحزنني.. من بعضهم .. من .. الكبير والصغير .. الرجال والسيدات.. الطلاب والطالبات .. فقد كانت لفئة ليست بالصغيرة منهم .. سلوكيات كلها ..همجية ..وعدم نظام.. وعدم نظافة ..وعدم احترام للكبير .. كما كان هناك كم غير معقول من الشحاذين أو ممتهني حرفة الشحاذة .. الذين لا يظهرون إلا مع بداية العام الدراسي الجامعي يجلسون بجوار سور المجمع في صورة تهينهم وهي صورة غير آدمية .. فقد .. رأيت أحد الطلاب ..بعد أن انتهى من شرب العصير الخاص به .. قام برمي فارغ العصير قصداً في الشارع وعلى مرمى بصر الجميع .. وباقي مجموعته احتذوا حذوه وقاموا برمي فوارغهم وهم يضحكون !!! ..رأيت طالباً آخر .. بعد أن استخدم المنديل استخدامه الشخصي .. قام بتعليق المنديل على عامود النور الذي على الرصيف ما بين أسلاك هذا العامود وهو يقوم بعمل حركات تدل على الانتصار وكأنه هزم العامود !! .. رأيت طالبة آخرى تقوم برمي فارغة زجاجة مياه على الرصيف وهي تضحك وتتمايل !!.. رأيت وسمعت من الرجال الكبار في العمر الزمني .. من يشتمون بعضهم بألفاظ سيئة على مسمع من كل المارة !!.. ثم أثناء السير .. هناك من الشباب والشابات الذين يسيرون ببطئ .. وإذا طلبت منهم إفساح المكان ينظرون إليك باشمئزاز ويقولون : ماشي يا حااااجة ماااشي يا حاااج !! .. أو يضربون الحاج والحاجة بالكتف غير القانوني وهم يسيرون بجواره ولا يحترمون كبر سنه!! .. أو يضربونه بأغراضهم التي يحملونها !!.. المهم يضربوه وبضربوه وكأنهم لا يرونه !! .. ثم عند دخول الطلاب والطالبات إلى الكلية في الصباح أو الخروج منها في المساء .. رأيت ما يُحزنني .. هجوم بصورة عشوائية غير عادية وبدون نظام على الإطلاق .. على مكان الدخول و الخروج مع أنه مكان ضيق !!.. رأيت عند قيام الطلاب والطالبات بكتابة أسماؤهم في كشوف ما لأي عمل ما .. أنه يحدث نفس الشئ.. من ..عدم النظام ..والهجوم الضاري .. وبصورة غير عادية من العشوائية .. والهمجية ..على الكشوف لدرجة أنهم يُطلقون عليها بمفرداتهم الجديثة " معجنة " !!.. والكشوف تتقطع وتتبهدل وتتسخ وتتطاير !! .. لماذا نحن هكذا يا شعب مصر ؟.. هل لابد أن يكون هناك من يُنظمنا دائماً ؟ .. هل لابد أن يكون هناك من يمشينا بالحديد والنار دائماً ؟ .. لماذا لا نكن نحن منظمين من تلقاء أنفسنا ؟ .. لماذا لا نحترم نظافة الملكية العامة من تلقاء أنفسنا ؟.. لماذا لا تكون أساليبنا وتصرفاتنا حضارية من تلقاء أنفسنا ؟ .. مع أن كل شئ بالنظام وبالهدوء وبالتصرفات والسلوكيات المتحضرة سينتهي في أقل وقت ممكن .. حقيقة .. نحن في مصر .. نضيع ونهدر أوقاتاً وأوقاتاً .. بسبب ..العشوائية ..والهمجية.. وعدم احترام النظام.. وعدم احترام الملكية العامة ونظافتها .. هل أصبحنا شعبا قد احترف الفوضى وعشق الفساد ؟ .. يا سادة لن تنتهي الفوضى من حياتنا ..ولن يتم القضاء على الفساد .. إلا إذا كنا شعباً واعياً فاهماً متحضراً.. حريص على الوقت ..حريص على تنفيذ القانون ..حريص على النظام .. حرام عليكم والله .. دا ربنا سبحانه وتعالى قد خلق كل شئ ..بنظام .. الصلاة بنطام .. والصوم بنظام ..والعمرة بنظام ..والحج بنظام.. والزكاة بنظام .. حتى نطق الشهادتين بنظام .. الكواكب تسير في الفلك بنظام .. كما أن كل الأديان السماوية قد تحدثت عن الأخلاق ..والرقي ..والقانون..والدستور.. والنظام .. والنظافة .. ليه احنا كده يا شعب مصر؟؟؟!!!
-------------------------
د.شهيرة عبد الهادي
يا طالع الشجرة - علي الحجار
يا طَالع الشجره .. هات لي معاك بُكره
ويكون على قَدي .. وتكون عِينيه سَمرا
العَدل فـ يمِينُه .. والشمس فـ جبِينُه
يِمشي على مَهلي .. و إن تُهت يندَهلي
صَلِّيت جَميع فَـرّضي .. زَكِّيت و مش مَرّضِي
خايف أموت قَبلَك .. ما تلِمنيش أرضي
يا طالع الشجره .. لو جِه معاك بُكره
خَلِّيه يكون ضِحكه .. تِكسي بها الفقرا
--------------------------------------
كلمات : محمد عبد القادر
ألحان وتوزيع : ياسر عبد الرحمن
غناء: علي الحجار
السبت، 18 أكتوبر 2014
الجمعة، 17 أكتوبر 2014
ممكن أستشير حضراتكم .......... بقلم د.شهيرة عبد الهادي
-------------------------
السلام عليكم ورحمة الله وبركاته .. فيه موضوع كده عاوزة آخد رأي حضراتكم فيه .. كنت مترددة اكتب فيه ..بس اتكرر وبجد بصورة غريبة وعشان كده .. حاقوله ومش حاتكسف بقى زي كل مرة .. لأني فعلاً باسترشد بآراء حضراتكم .. وهو..مش عارفة .. لاحظنت أنه كل يوم جمعة .. استغفر الله العظيم ..لازم تحصل لي حاجة .. وتبقى الأمور متلخبطة معايا .. والنفسية مش هي.. والمود مش هو .. وكل ما آجي اعمل حاجة .. تتلخبط .. وكل ما آجي امسك حاجة تقع مني تتكسر ..مش عارفة .. النهارده .. كنت باعمل كيكة .. باظت مني .. آجي احط السكر ينطحن .. ألاقي الكبة سابت الجهاز وطارت في الهواء .. آجي اضرب السمنه مع السكر تقوم واقعة مني على الأرض .. آجي أحط المضرب .. يقوم ناطط وسايبني وماشي .. أه والله زي ما باقول كده .. افتكرت ..إن في مصر .. واستغفر الله..بيقولوا .. يوم الجمعة ده فيه ساعة نحس؟ .. استغفر الله .. استغفر الله .. وافتكرت ..لما ..الممثلة اللي اسمها " هالة صدقي" دي قالت مع مفيد فوزي في برنامجه مفاتيح : إنه كانت فيه واحدة قريبتهم .. عاملالهم عمل .. إنهم يتفرقوا .. وهم فعلاً اتفرقوا .. ويوم ما اتجمعوا مع بعض ابوهم مات .. وافتكرت الشيخ عمرو الليثي اللي بيجي كتير مع عمرو الليثي في واحد من الناس ..لما اتكلم عن السحر.. وقال :انه موجود .. بأمانة .. أنا ..مؤمنة بالحسد .. لكن بالساعة النحس دي .. لا طبعاً .. أستغفر الله .. وبالأعمال .. لا طبعاً .. ولو أن الشيخ عمرو الليثي ده قال أنها موجودة ومنتشرة .. وكمان فيه واحدة في الشارع بتؤكد عليها والناس بتخاف منها .. لكن .. أستغفر الله .. استغفر الله ..استغفر الله .. استغفر الله .. الواحد لا يمكن يعني يثق في كده .. ولا يعمل كده .. بس أهو الواحد بيسأل حضراتكم .. ويشوف ويتعلم .. وربنا يبعد عنا الأذى و المؤذيين والمؤذيات .. لكن بجد اللي بيحصل كل يوم جمعة ده مش لاقية له تفسير .. وقعدت اقول لنفسي .. جايز عشان الحاجات اللي عليا.. واللي المفروض اعملها كتير ..وانا مش منظمة وباتلخبط .. وجايز لأني اتأخرت في قراءة سورة الكهف .. وجايز لأن مخي دائماً مشغول .. وجايز لأني باسرح كتير .. وجايز هو نوع من الكسل .. وجايز انا اللي ست بيت خايبة ههههههههه .. طب انا بجد شاطرة لما باحط حاجة في دماغي لازم اتقنها .. وجايز الواحد مش قادر يقف على رجليه .. أهو باحاول أشوف الأسباب بنفسي .. لكني .. افتكرت لما كنت في السعودية .. كنا كلنا بنشتكي مصريات وسعوديات .. نفس الشكوى من الموضوع ده .. مع أننا كنا نآخد أجازة خميس وجمعة .. يعني كان عندنا براح.. للانتهاء من أعمالنا المنزلية ..يومي الخميس والجمعة ..ومع ذلك .. كنا في النهاية مبنلحقش نعمل حاجة .. والكل كان بيشتكي نفس الشكوى ..وكان بيشتكي من اللخبطة اللي بتحصل في هذا اليوم .. مش عارفة إيه رأي حضراتكم ؟ .. وما هو الحل من وجهة نظر حضراتكم ؟..
---------------------------
د.شهيرة عبد الهادي
من عبق الماضي ...... بقلم د.شهيرة عبد الهادي
----------------
حبيت اعمل كيكة.. عشان اثبت لنفسي ان انا ست بيت يعني ههههه..قعدت افتكر في المقادير بتاعتها .. وانا باحاول افتكر .. قلت ما تروحي ع النت وتجيبي مقادير كيكة وتعمليها وخلاص .. رحت وجبت المقادير.. وانا باعملها .. كان يوم غريب ..المضرب طار مني وانا باضرب السمنة مع السكر .. والكبة بتاعة الخلاط وانا باطحن السكر .. سابت الجهاز وغضبت ومشيت وطارت في الهواء .. أه والله زي ما بقول كده.. واتلخبطت مني الكيكة وخسرت ورميتها .. وعملت واحدة جديدة و بردوو مسلمتش .. ما انا ست بيت شاطرة بقى ههههه.. وكان يوم كله لخبطة في لخبطة ..وهنا بقى افتكرت .. إن جدتي أو ستي أم ابويا .. أو تيتة أونينا أو نناه أو أنَّا أو تتاه أو توته أو تيتي.. بمفردات اليومين دول في زمن الحداثة .. كانت أمية لا تقرأ ولا تكتب .. لكنها .. كانت لما تحب تعمل لنا قرص .. ولا بنتسبانيا .. ولا فطير مشلتت ..ولا فطير درة باللبن الرايب و مخربش.. ولا أبوري بالبيض أو بالسمنة والسكر ..ولا أي حاجة .. كانت بتعمله بالبركة .. يعني ولا مقادير ولاحاجة .. أو تعاير الكمية بإيديها .. ولا كان عندها نت ولا نتيت ولا ناس بتنتت .. وكانت قبل ما تعمل أي حاجة لازم تصلي الأول .. وبعدين تقوم تعمل الحاجة دي ..فـ تدخل القاعة الجوانية في الدار.. والقاعة الجوانية دي كانت في الدور الأرضي من البيت جنب الشنشار.. وكانت منها للسلم اللي بيطلَّع للمقاعد اللي فوق في الدور التاني من الدار ..وكان بيبقى فيها كل خزين البيت .. الدقيق والرز والزيت والسمنة والبيض والسكر والشاي وووو .. و كانت ستي قبل ما تآخد الدقيق .. كانت بتقعد تتشاهد عليه .. وتقعد تقرأ عليه قرآن كريم .. فقد حفظت القرآن سماعي من جدي خريج الأزهر الشريف.. واللي كان بيحفظهولها كل يوم .. وكانت وهي بتعجن وتقَّرص القرص متخليش حد يشوفها .. وطول ما هي بتعجن في العجين وهي بتقرآ في القرآن .. وكانت القرص اللي بتعملها .. والله ما دقت حلاوة طعمها في أي حاجة كلتها لغاية النهاردة .. الله يرحمك يا ستي .. كانت البركة والقرآن الكريم .. وراء كل أكلة جميلة بتعمليها .. ستي الله يرحمها .. عمرها ما قطعت الصلاة .. حتى وهي في آخر أيامها ..عندما فقدت القدرة على التحكم في العمليات الفسيولوجية .. وكانت تنسى كل حاجة في الدنيا .. ما عدا.. الصلاة .. تقوم تصلي في ميعاد آذان كل صلاة ..وفقاً للساعة البيولوجية اللي جواها ..والله يرحمك يا جدي.. كان راجل طيب قوي والله.. كان حريص على أنه يحفظ ستي القرآن .. وحريص على أنه يخلينا نصلي .. كان لازم يصحينا نصلي الفجر.. ويجيب لينا الفول والطعمية من عند الخالة "صنصف" وهو ده اسمها "صنصف" .. إلى جانب قرص ستي المشهورة الصبح عشان نفطر.. ووقت صلاة الضحى كان يجيب لنا ترمس من تحت الريح ..من عند الخالة "سكر" أيوه هي اسمها سكر .. وتحت الريح في قريتنا .. كان زي الشانزليزيه كده يعني ههههه .. ولا خليها زي المنشية احسن .. بس كان في بلدنا الريفية الجميلة .. اللي بقت دلوقتي ولا ريفية ولا حاجة .. واحنا في اسكندرية اللي بقينا ريفيين ..والريف بقى بندري .. والدنيا اتلخبط حالها واتقلب موالها .. والبركة قلت .. والدين بقت الناس بـ تتاجر بيه .. بدلاً من أن تحتذيه ..
--------------------------
د.شهيرة عبد الهادي
ف الغابة ضباع ... بقلم عماد طنطاوي
ف الغابة ضباع
وأسد طماع
مليانة بناس بتدوس على ناس
والقوة أساس
لو فيها ضعيف
بيموت وخلاص
ولا حد بيعرف مات إزاى
ليه دايما نكره صوت الناى؟
علشان مهموم؟
طب قولى الدنيا دى كام مظلوم!!!
أنا مرة حبيبتى قالتلى حكاية
ما أنا دايما كنت بصدق لما تقول
لو حتى جابتلى صباع الموز وقالتلى دا فول
كان بلبل مات على شجرة توت
والدنيا سكوت
والأرض بتعجن قبل الفجر خبيز الموت
وتلون ريش المطر النازل أسود فاتح
ف يطير ويرفرف حزن حزين
على إيد الأرض اللى بتعجن
وعجيبة يا دنيا بتتلون حسب الأحوال
المطر الصبح بيزرع تحت الشمس حياة
وف عز العتمة بينزل يدفن
الحية السودة أم الاجراس بتدق طبول
وفيران الأرض بتحفر قبر
والعش الل حاضن إيد البلبل
بيعشى عياله اللى إنفطروا بكلام الصبر
والموت أقدار
والدود بيسن سنانه بمبرد جوع
ومخبى عياله ف قلب فروع
والدفنة ضرورى قبل الفجر
دا الليل ستار
والأسد النايم على شجرة
مستنى مراته بكيس الأكل
بيحب الدنيا هدوء
وبيكره صوت الثوار
قرآن الفجر بيبدأ شيخ الجامع سرده
والوقت بيسرق كل الناس
الصاحى عشان الجوع بيعذب جوفه
والصاحى عشان بيفارق كل ماعنده
وطابور الموت بيسابق دولا ودول
وبيدخل عش البلبل ياخده
وبيبدأ وتر الحزن العزف
للموت ألحان
البلبل مات
والدفنة مافيش ولا واحد فيها
يمكن علشان الميت كان غلبان
فالكل نسيها
وبتشرق شمس الصبح كأن ما كان
وبيصحى الأسد النايم يبدأ يومه
لا بيسأل مين
ولا حتى بيعرف ليه وإزاى
وشوية بيطلب حبة شاى
وبيعدل بيها دماغه المايله
وبشبه امبارح انه بيحلم ان ف واحد مات
فبيشرب حتى الشاى بسكات
ويكمل نومه
وبيفضل حزن الناس مكتوم
وبتمشى الدنيا زى ما تمشى
وكل مايجى الليل ويعدى يموت مظلوم
ولا حد بيعرف ليه وإزاى
وكفاية بيفضل وجع الموت فى ضلوع الناس
والاسد النايم مستكفى بجراية العيش من ست
مع حبة شاى
-------------------------
كلمات : عماد طنتطاوي
الاشتراك في:
الرسائل (Atom)