الزبادي واللبن الحليب ..بتاع الدكان اللي على القمة بتاعة شارعنا .. كان بجد أحلى زبادي وحليب ..بيتهيألي في مصر كلها ..وكان الزبادي لما تفتح العلبة كده وانت بتآكلها .. تشوف القشطة عليها وطبقة كبيرة كمان والطعم حلو أوي ..وكانت القشطة اللي بتبقى على وش الحليب بعد ما تغليه وتبرده ..طبقة كبيرة جداً ..لدرجة أن الواحد كان بيحوشها ويعمل بيها الكنافة والحلويات .. والحليب الباقي كان طعمه حلو أوي كمان وتحس أنه دسم بردو.. في الفترة الأخيرة لاحظت ..أن طعم الزبادي والحليب ما بقاش حلو خالص زي الأول .. بالرغم أنه رفع سعره يجي 100 في الميه ..فقلت للبياع على كده ..أن الزبادي والحليب بقى طعمهم وحش مش زي الأول بالرغم أنكم رفعتوا السعر؟!..قال لي ..أصل اللبن الحليب الحلو دلوقتي سعر الكيلو منه 14 جنيه .. فـ احنا مش معقول حنجيبه ..قلت له أمال بتعملوا الزبادي ده من إيه ؟ وإيه الحليب ده اللي احنا بنشتريه منكوا ؟.. قال لي .. وهو باين على وشه علامات لها ترجمات كثيرة ..أن احنا بنجيب اللبن ..بعد ما بيآخدوا منه القشطة والزبدة .. قلت له .. يعني " الشرش " أو " اللبن الخض " .. والناس اللي أصلهم من الفلاحين زي حالاتي كده .. يعرفوا معنى الكلام ده كويس .. طيب شوفتوا بقى الغش وصل لإيه ؟!.. السؤال بقى ..هم بيحطوا إيه على اللبن الحليب عشان يبقى لونه أبيض كده ؟.. وبيحطوا إيه على الشرش ده ولا الخض ده عشان يكون زبادي ؟.. أنا طبعاً قاطعته بقالي يومين .. بعد ما عرفت الكلام ده. . يبقى دلوقتي محصلة مقاطعتي هي لكل من .. اللحمة والفراخ والسمك والحليب والزبادي .. طب آكل إيه بقى بعد كده .. والختمة الشريفة على عينيا أنا حسيت أنه حيغمن عليا النهارده بعد ما خرجت من المحاضرة .. وآخدين بالكوا من " حيغمن " دي ههههه.. والبنات كانت ملاحظة ده عليا .. المهم ..ان انا لقيتني فعلاً ..زي كل المصريين العسل " طبعاً مش قصدي أقول على نفسي أني عسل ولا حاجة ههههه " ..عمالة أغني واقول .. بمناسبة القمة يعني ..ومن غلبي يعني .. " من بحري وبنحبوه على القمة بنستنوه ".. طبعاً باغني للزبادي والحليب اللي ع القمة .. عشان بس ما حدش باله يروح لبعيد ههههههه .. منكم لله يا بياعين مصر الغشاشين ويا تجار مصر الغشاشين ويا كل غشاش في مصر ومنك لله يا حكومة ..إياك يجيلك اسقربوط يا حكومة وبري بري كمان يا بعيدة ههههههه ..
-------------------------------------------
د.شهيرة عبد الهادي
7/4/2017 م
Drshahera Abd Elhady Ibrahem
